喺旺角行街，行到肚餓，很想食日本嘢，經過見到呢間壽司店，就即刻入去坐低。雖然係小店，座位唔多，但係絕對坐得舒服，唔迫夾。
坐吧枱嘅客人仲可以見到壽司師傅整壽司。
手機落單，想食咩可以慢慢揀。因為我同朋友咩都想試，所以叫咗兩個set-鮪世壽司盛(時令壽司八件)同埋極上壽司盛！
跟餐仲有茶碗蒸，麵豉湯同埋沙律。
麵豉湯嘅麵豉味香濃，茶碗蒸嘅雞蛋蒸得好滑。
極上壽司盛總共有10款壽司，包括
玉子，三文魚，油甘魚，帆立貝，𩶘魚，深海池魚，特大赤海蝦，金目鯛，大本鮪魚腩，燒三文魚卷。
而鮪世壽司盛就有八件時令壽司，包括鮑魚，海膽，北寄貝，吞拿魚，赤貝，深海池魚，鯛魚。
刺身新鮮，鮮甜肥美，厚切大大嚿，口感十足，真係好滿足。而壽司飯粒粒飽滿，食落亦都好香醋味。
好特別，第一次見原隻鮑魚壽司，重要唔算細隻，非常奢侈，而食落就非常之有咬口。
海膽壽司啲海膽真係堆積如山，成舊擺入口係海膽爆炸嘅感覺，非常之幸福。
帆立貝好鮮甜，大大片啖啖肉，真係食完想再叫多幾舊，停唔到口。
吞拿魚腩一咬落去，滿滿嘅油脂B晒出嚟，好香油脂味，但係一啲都唔膩。赤蝦蝦肉晶瑩，食落爽口，好新鮮。玉子燒好厚身，超級香蛋味，甜度啱啱好，好有日本食嘅感覺。
