銅鑼灣有唔少樓上西餐廳，今次嚟openrice得獎嘅The Musicbox Grill House and Bar，歌單簡得幾好氣氛唔錯。
1
二人套餐$768
凱撒沙律：沙律菜新鮮，有脆卜卜嘅麵包粒、芝士碎、煙肉碎，味道唔單調。
新英倫周打蜆湯：口感順滑，鹹中帶點奶香。
香蒜牛油煮蜆：以為平平無奇，竟然係呢個晚餐最驚喜嘅一道菜。大蜆體型大隻，肉質飽滿，吐沙乾淨。汁底非常鮮甜，絕對可以當湯飲，酌量加入碟邊嘅辣椒碎，微辣更顯鮮味。伴碟嘅法包灑上芝士碎再焗，鹹香酥脆。如果想食得豐富啲，加$188可以轉成海鮮拼盤。
煎三文魚配酸辣龍舌蘭忌廉汁：魚皮朝脆，魚肉唔會太嚡，熟度剛好。一旁嘅薯仔同埋蘆筍都唔馬虎，薯仔輕輕炸過，烤蘆筍清甜爽脆。
1
燒美國頂級肉眼牛扒：原本套餐已經包咗10安士嘅阿根廷安格斯肉眼牛扒，加$138upgrade做12安士冇失望。肉味濃郁，肉質軟嫩細滑，切開仲係粉紅色，大大塊兩個人分享啱啱好。一旁嘅燒蘑菇多汁，透出火燒嘅煙熏香氣。
精選甜品：個人偏愛焦糖燉蛋，唔會太甜，滑溜無比。芝士蛋糕不過不失。
餐飲：無糖凍檸茶作結尾，解解膩！
