最尾決定揀咗二人套餐！有湯、小食、主菜、蔬菜、白飯同甜品，好豐富！
湯揀左椰子雞湯，飲落清甜椰香味好濃，好開胃。雞肉仲好多同一啲都唔乾身，啲菇吸哂湯好正
小食就叫咗豬肉串燒，豬肉燒完肉質都好軟滑，靈魂嘅沙嗲醬汁仲好香！
主食本身嗌海南雞，但係太好賣賣晒！所以轉咗燒雞。一上枱已經切好晒，燒得好靚，外皮香脆雞肉就好嫩滑
菜就揀左飛天通菜，炒得幾有鑊氣，香香辣辣夠哂惹味
另外加多左個生菜包，好貼心有得揀唔辣，肉碎好香泰式香料嘅味道，包住食又多汁又清爽
飲品叫咗泰式奶茶，夠晒正宗，又甜又香。
甜品分別係椰青味大菜糕同埋芒果嘅大菜糕，口感幾爽，又唔會太甜
今餐好豐富，仲有好多其他選擇下次可以試
