影片
更多
2011-10-31
1620 浏览
灣仔慶雲街係邊呀？相信唔係好多人知，但係灣仔石水渠街嘅藍屋，相信就好多人都認識；而慶雲街就係其中一條連貫石水渠街與堅彌地街嘅橫街，其餘三條分別係景星街 (最近皇后大道東)、吉安街、隆安街 (最入、最高嗰條)。我之所以認識石水渠街，並非由於藍屋，是由於聖雅各福群會，想當年，每天經過，都只係見到當時嘅居民和街坊，營營役役咁為自己嘅生活奔波勞碌，而我就幾乎每天都沿著石水渠街，由皇后大道東走上聖雅各福群會開會、攪活動，只因當年身兼公益少年團會長，需代表學校參與社會服務，所以每天放學後，都經常走到聖雅各福群會。大家都可能會覺得奇怪，明明一列四個門牌，為何偏偏有一幢冇漆上藍色呢？原來這幢74號A一直都係由私人持有，所以政府當年只係將72，72A及74號三幢漆上藍色，而且聽聞當年嘅油漆工人，純粹將水務署用剩嘅藍色漆油，順手攞黎油，所以才會出現藍色牆身嘅情況，並非故意漆上藍色。係藍屋後面嗰條橫街，就係慶雲街，係慶雲街中間，有一個紅色嘅霓虹管招牌，非常搶眼，”大龍鳳”三個字，好特出咁浮現係眼前。驟眼看過去，以為是一間懷舊冰室之類，但當你行到門口，探頭一望，才發覺大龍鳳原來係一間酒吧，一間以六、七十年代舊
我之所以認識石水渠街，並非由於藍屋，是由於聖雅各福群會，想當年，每天經過，都只係見到當時嘅居民和街坊，營營役役咁為自己嘅生活奔波勞碌，而我就幾乎每天都沿著石水渠街，由皇后大道東走上聖雅各福群會開會、攪活動，只因當年身兼公益少年團會長，需代表學校參與社會服務，所以每天放學後，都經常走到聖雅各福群會。
大家都可能會覺得奇怪，明明一列四個門牌，為何偏偏有一幢冇漆上藍色呢？原來這幢74號A一直都係由私人持有，所以政府當年只係將72，72A及74號三幢漆上藍色，而且聽聞當年嘅油漆工人，純粹將水務署用剩嘅藍色漆油，順手攞黎油，所以才會出現藍色牆身嘅情況，並非故意漆上藍色。
係藍屋後面嗰條橫街，就係慶雲街，係慶雲街中間，有一個紅色嘅霓虹管招牌，非常搶眼，”大龍鳳”三個字，好特出咁浮現係眼前。
驟眼看過去，以為是一間懷舊冰室之類，但當你行到門口，探頭一望，才發覺大龍鳳原來係一間酒吧，一間以六、七十年代舊香港為主題嘅酒吧，地方唔大，數百呎，左手邊係水吧，右手邊沿著牆身擺咗一排枱櫈；水吧吧枱嘅正面，貼滿傳統綠色白色嘅格仔紙皮石，絕對係一個七十年代嘅典型廚房或厠所嘅裝修；係吧枱上面，掛有一個黑色吊架，吊架下方，掛滿唔同大小嘅酒杯，吊架上面，則擺滿好多懷舊嘅物品，有火水爐、火水燈、暖水壺、公雞碗、公雞茶壺、鐵皮食物罐、鐵皮玩具等等，全部都係古董，並非復刻版。
係吧枱入面，設備頗先進，雖然地方唔大，但可謂五臟俱全，有一個容量唔細嘅雪柜，一對透明玻璃門，讓客人望得一清二楚，入面嘅酒，存量唔算多，但勝在選擇多，紅、白酒、香檳、vodka、rum、果味酒、啤酒、果汁、汽水等等，樣樣俱全；係雪柜旁，亦有威士忌、干邑等；仲有一台生啤機，提供五款生啤，有Beck’s，生力，Stella，Hoegaarden及Boddington，以一間只得數百呎嘅酒吧來說，選擇真的不少。
係水吧對面嘅牆身，掛咗好多舊海報和舊照片，主要都係生力啤或政府宣傳嘅海報或相片，相信亦都係真跡；牆身則塗上英泥，再漆上水泥色，刻意營造出一種好原始、未經處理嘅感覺，係牆身嘅某處，故意漏補幾個牆孔，特出這裡嘅古舊情懷，但我就覺得太過刻意了。
再行入d，有一個迷你廚房，中間開咗一個長形嘅窗，可以窺探到入面嘅工作情況，係嗰窗上面，就掛有一個黑底金圖案嘅圓形木雕，嗰圖案當然就係舖頭嘅大名，一對龍鳳，不過這個木雕，非常新簇，唔似古董，若有所失；係廚房對面嘅牆身，則掛咗好多唔同嘅鐘，有九個之多，有圓有方，最突出嘅，一定係中間最大嗰個長方形嘅鐘，一個長方形鐵箱，中間係一個圓形嘅鐘面，係鐘面下面，有六個制，睇唔到嗰d係咩制，但依我估計，似係以前學校用嘅校鐘，可以預早調校好時間，夠鐘落堂，就會響鐘；但係好奇怪，原來呢九個鐘，全部都唔行，仲要全部都停留係唔同嘅時間上面，唔知呢九個時間，對店主來講，是否有特別意義。
直望到尾嘅牆身上面，則掛有三個用鐵片打造而成嘅”大龍鳳”字樣，亦都係好粗獷、好原始嘅味道。
隔離就係洗手間嘅位置，呢個範圍，用咗木圍身，上面亦都掛咗一個款式簡單嘅大圓鐘，時間停留咗係1點55分唔知幾多秒，唔知係嗰一分嗰一秒行入去的話，會否好似叮噹嘅時光機咁，將我哋帶返去七十年代呢？係嗰大圓鐘下面，仲掛著一張細細張嘅廣告，廣告內容係”新屎坑、三日香”，幾有創意，有趣。
既然新屎坑，只得三日香，都係襯早試吓；一推開度木門，真係好似返番七十年代咁，厠格唔大，牆身嘅下半截貼上與水吧相同嘅綠色白色格仔紙皮石，地板則貼上另一款紙皮石，一樣係綠色白色格仔；而上半截嘅牆身，則貼滿舊報紙，有星島日報、南華早報，仲有一份係新夜報，再望一望嗰日期，嘩，原來係1974年嘅報紙，再望一望另一邊，原來係1978年嘅星島日報，當年一間錦繡花園別墅，只需要十四至十七萬，美孚720呎單位，都係廿一萬，三十多年後嘅今日，冇伍、六佰萬，都唔駛諗；洗手盆則設於厠格外，男女共用，水龍頭是傳統黃銅水龍頭，惟一美中不足嘅，就係洗手盆，因為呢個並唔係傳統嘅款式；係牆身仲掛著一塊1974年嘅告示牌，大致嘅內容係勸籲當時樓上嘅住戶不要將雜物掉進厠所內，以免淤塞。
我望一望手上嘅錶，六點未到，全場只有一枱客人，坐近門口處，我就揀咗埋面，廚房對出嘅一張枱坐下，待應好快就俾咗張menu我，係一張手寫嘅menu，夾係一個透明嘅硬膠file入面，一面係set dinner，另一面係snack menu，但係只得英文，冇中文，點解係一個咁有舊香港情懷嘅酒吧內，只得一個全英文嘅menu，有d大剎風景；但係睇真d，係呢個硬膠file入面，有一張舊報紙墊底，係一張1978年嘅星島日報，嘩，又係一張咁有歷史嘅報紙，呢張唔係地產版，係馬經版，睇吓嗰排位，仲有第七班馬跑，果然經典；至於drink list則欠奉，我就要咗杯Hoegaarden，加個蝦醬雞翼同白松露炒蛋，咦，雖然嗰menu係英文啫，點解我又要用英文同嗰待應溝通嘅，原來呢度d待應，全部都唔係龍的傳人，中文係”有限公司”，只好用英文溝通。
不一會，一杯清綠色嘅飲品擺係我面前，係一個傳統嘅高身水杯，係杯面有一層好簿、好稀嘅白色泡沫，如果有一碌蔗擺係我面前，我真係會以為呢杯係蔗汁，所以我叫嗰待應過來，問過究竟，佢好肯定咁同我講，呢杯係Hoegaarden，只不過冇杯，所以才咁樣倒俾我，等我飲完，仲有一杯，我問佢是否happy hour，所以買一送一，佢又話唔係，總之就$40兩杯咁嘅size，奇怪 (其實係嗰雪柜入面，明明仲有好多啤酒杯，雖然唔係Hoegaarden，但係總好過用一隻咁嘅水杯來倒啤酒)！飲咗一啖，總覺得味道怪怪咁，一來唔夠泡沫，冇咗滑溜感，二來味道好似偏淡，唔夠甘香。
蝦醬雞翼先上，一望之下，以為有十隻，睇真d，原來全部雞翼都已經斬半，實際上只係五隻，哈哈，賣相似乎麻麻哋，顏色偏深色，非常乾身，儘管一試吧；咬了一口，好好食，蝦醬味道香濃，十分惹味，千萬唔好俾佢乾涸嘅表面所呃，外表香脆，內裡卻嫩滑多汁，炸得恰到好處，而且半隻雞翼，可以令炸面增多，一來容易進食，二來啖啖都有脆皮和嫩肉，的確係一個有心思嘅處理方法；伴碟嘅生菜，放係炸得香脆嘅雞翼下面，雞翼嘅熱力，把生菜弄得半生不熟，唔爽脆，唔好食，倒不如淨上雞翼，不要浪費。至於白松露炒蛋，賣相一樣唔吸引，蛋炒得水汪汪咁，伴以三件烘得乾身嘅法飽，唯一覺得欣慰嘅，係白松露醬嘅香味，十分香郁，未食，已經聞到佢嘅香味，而且份量唔少，灑上炒蛋上，非常誘人，再望真d，係蛋上面嗰d並唔係水，係油，係白松露醬嘅油；按捺不住了，第一時間，搯了一口蛋，混和白松露醬，一啖食落去，松露嘅香味，係口腔中爆發出來，滿口都係松露嘅味道，雞蛋嘅味道已經感覺唔到，佢嘅功能，只係將白松露醬嘅香味散發出來，但係始終都欠缺咗少少嘅咬感，嗰三件乾身嘅法飽正好發揮佢哋嘅作用，將D蛋同白松露醬，仔細地放上件法飽上，再一口咬落去，嘩，簡直係人間極品，只需$68，就可以品嚐到白松露嘅香味，非常抵食，一口又一口，轉眼間，一碟白松露炒蛋已經俾我掃清。
開心嘅時間，總係過得比較快，不經不覺，已經坐上一個鐘，埋單$156，一杯啤酒加兩個小食，唔貴，仲可以品嚐到白松露嘅香味，我覺得超值，雖然杯啤酒比較差，希望下次會好d。坦白講，對於真真正正嘅舊食肆、老店子，確實令我有一份莫名嘅欽敬和尊崇，但對於這種刻意懷舊嘅復刻店，總係覺得有丁點兒人工化，欠缺了一份人情味、風土味，大龍鳳已經比其他復刻店好，至少有好多裝飾、擺設都係真古董，當中尤以舊報紙最吸引，希望大家都可以多d支持那些舊店老舖，令佢哋可以繼續下去。
张贴
