我哋6:00左右去到，原來7:00前埋單有優惠，哎吔，早知早啲去啦😂。
我哋揀咗D餐任食日本黑毛和牛A4+ $338，有12款湯選擇，竟然有沙爹牛肉湯底，真係好地道喎🤣，我哋加咗$50叫埋個鴛鴦鍋，揀咗金湯椰子雞鍋。
職員介紹，湯底嚟到，先飲啖湯，再打邊爐woo!沙爹牛肉湯底好夠味，啲牛肉仲好好食。金湯椰子雞鍋個湯都好正，啲雞仲好肥美，係我最愛嘅三黃雞呀！
自助吧有各式各樣嘅食物，有多款開胃涼菜，涼拌木耳、青瓜、麻油菠菜、麻辣豬耳、雞腎、紅油豆芽等……。
冷盤：鮮甜青口、涼拌粉皮、時令水果、翡翠螺、凍甜蝦等……
仲有數十款丸類、蔬菜類、粉麵等……，有勁長嘅蟹柳🥰，仲有唔少得嘅炸魚皮、炸響鈴。
熟食：豬頸肉、避風塘炸粟米、鹽酥雞、炸地瓜條等……，避風塘炸粟米超好食呀！勁香口👍！
啲食物你諗到嘅，同諗唔到嘅，都應有盡有。
除咗出去自助吧拎食物外，就係QR Code落單，超推介日本黑毛和牛A4+，唔會好漏，油脂分布平均，好香牛肉味，而同樣係進口牛嘅
極上安格斯牛小排同樣出色，牛味濃，有口感。
除咗牛之外，我都叫咗脆鯇腩，魚肉非常爽脆，油脂豐富，最愛。串串鮮海蝦都係必推之選，蝦肉爽口鮮甜。
飲品方面有大量款式供應，包括啤酒，仲有自家製有營茶，微糖及無糖系列，啱晒飲少甜嘅我，唔飲凍嘢仲可以選擇沖番杯熱飲嘅茶飲。
甜品：有原味軟雪糕、糖果配料及多種雪糕杯(da dino,牛奶公司）及雪條選擇。牛奶公司嘅香芋味雪糕杯，我一口氣食咗兩杯，係兒時嘅味道啊🥰，好好食，勁開心。
整體嚟講：呢個價錢，無論係食物質素同款式都冇得輸，座位舒適、冷氣充足，下次要早啲去先🤭。
另加10%服務費
69
