麻甩爐海鮮雞煲私房菜

营业中

休息中

出面食雞煲火鍋通常都係得兩個鐘左右就要走人，每次都食到趕頭趕命，最近朋友就帶咗我嚟呢間火鍋雞煲，呢度有三個小時食，時間可以食得鬆動少少。餐廳環境幾寬敞，店內有 CCTV 俾客人睇到店外情況，泊車都安心啲，飲品雪櫃雖然得三格，但係種類都唔少，而且啤酒仲可以任飲。餐牌提供海鮮、牛肉、烤魚三款套餐，自己係海鮮控當然食痛風餐，打邊爐之前就要揀咗雞煲先，雞煲有五種味道選擇，我哋揀咗招牌麻甩味。每個套餐都會送嘅刺身拼盤，三文魚可以無限量添食。雞煲打開蓋後香味即刻湧晒出嚟，味道唔算太辣不過幾惹味，而且雞嘅份量都唔少。食完雞煲就到揀湯底，湯底有八種味道，揀咗出面比較少見到嘅蜆湯底，先食完蜆肉再加火鍋湯。海鮮套餐嘅一次性拼盤有扇貝、鮑魚、花甲、蜆同蝦，蝦同蜆之後都可以任叫。套餐提供二款牛肉，肥牛雪花紋幾靚有牛味。