多寶美食

营业中

休息中

上一間結業後，新呢間未幫襯過。今次喺大南街寄完順豐就行去熟悉嘅位置，過吓口癮。嗌咗件臭豆腐，交出十蚊，臭豆腐迅速喺後面廚房傳遞出嚟。醬料唔係一兜兜加支木片棍嗰種，風味驟減。唧入必加嘅甜醬同豆瓣醬，再喺邊緣慢慢咬開.. 脆卜卜熱焫焫！但並不能大口進食因為實在太熱！一邊吹走冒出嘅煙，一邊嘗試唔焫親個嘴咁緊接住咬第二啖、第三啖，都因為有豆瓣醬同甜醬嘅加持，鹹辣甜滿足味蕾.. 件豆腐本身就冇乜味。豆腐大小合理，唯只有竹籤一支，難以拮起，索性撕開紙袋食用。仲記得第一次食臭豆腐，係細個去長沙灣探嫲嫲。過咗某條馬路，有個伯伯推住架木頭車喺度賣臭豆腐，爸爸買俾我哋試，真係好好味！當時賣五蚊一件，而d未炸嘅豆腐就擺喺架木頭車下隔嘅一個膠桶入面.. 流動小販真係好有香港特色！至於味道，我都講唔出個原因，但就係同大個咗之後食嘅唔同，嗰種美味至今都未能被超越。