太平館瑞士汁炒牛河
喱度出名瑞士汁 當然要試下佢 上碟只見好深色一pat醬咁 賣相麻麻 食落仲好失望 碟河粉䶢到我食咗兩啖已經頂唔順狂灌水 真係同好味扯唔上關係 雖然佢塊牛肉都嫩口 河粉亦炒得幾有穫氣 但真係調味太重手 無辦法支持落去
凍/熱齋啡
用作解膩 唔係即溶咖啡嚟 都幾香濃 唔錯
太平館式焗疏乎厘二人茶餐
同樣包兩杯冷或熱飲 一上碟好驚喜 真係好大份 等於我一個頭咁大 不過喱個要有耐性地等待 足足要35分鐘左右 一切開充滿蛋香 面層好似海綿蛋糕咁 中間嘅質地就好似濕濕地 咬落似食棉花糖 圍邊似係焗燶海綿蛋糕咁 每個位都有唔同質感 充滿層次感 但我最愛都係頂層 軟綿綿蛋糕狀 焗到幾香口 中間略嫌濕得濟 入口化開變糖水咁 完全似食緊bbq後嘅棉花糖 喱個價錢我覺得有啲貴 可能覺得疏夫厘並唔係咩名貴蛋糕 我本身亦唔覺疏夫厘係好好味嘅東西 但佢個樣的確係靚嘅 拎嚟打咭都唔錯
總括而言 喱間餐廳 我試過一次就足夠 以上兩樣嘢都無令我食過翻噚味 係個疏夫厘嘅size大到咁 叫好特別 但味道就係平平無奇 餐廳格局舒服 全部梳化卡位座 而且侍應們都係打bowtie 白裇衫黑西褲 整體感覺同環境設計都好有懷舊氣息 幾有特色嘅餐廳 有空幫襯下喱間充滿歷史感嘅餐廳都係唔錯選擇 而且侍應有禮唔會似舊冰室咁催人落單 仲可以慢慢坐住等 茶餐好快到 只係要等疏夫厘 食完又唔趕人走 好難得
11
