iBakery 愛烘焙餐廳

营业中

休息中

今天中午與同事忽發奇想，去支持吓社企，結果去咗I bakery. 去到等咗1分鐘就可以入座，招呼亦不錯，地方乾淨，座位寬敞，價錢合理，心想可以係到搞部門午餐喎。我們點了一個香草蕃茄寬條面，同一個煎鴨胸配新薯，每個餐都有湯送，當日係磨菇湯。個磨菇湯既稀且淡，全不creamy, 有如飲水一樣，簡單啲講，茶記例湯咁的質素，嗰吓個心打個突，不過心諗可能負責添湯嗰個唔記得攪一攪先啫，唔緊要，可能主菜有驚喜呢！最先來的是鴨胸，一上枱見汁同肉分開，唔錯呀，再望真啲，煎到幾燶吓喎，食落雖然唔太硬，但都幾乾吓，勉強過關的，反正我唔食皮，個汁又唔差。再來香草意粉，大鑊。同事食咗幾啖，就話只食到草青味，再食件菇試吓，就食到一陣酸味。我試咗少少意粉，嘩，只有單調香草醬的草青味，我叫同事加鹽試吓，都係頂唔順，同事仲話好油，食咗半碟，無再食。結果，我地離開餐廳時，由想支持社企，變到真係支持唔到呢間社企，好彩試咗菜先啫，如果唔係部門午餐係到搞，就真係大件事。