豊勝手丼 (已搬遷) 新店位置

見蘋果有優惠$100換原板海膽飯套餐，連前菜及飯，不設加一，即管試下，提前幾日訂位。平日晚上六點幾去到，餐廳只有16個座位，唔見有其他食客，向店員出示電子優惠券，佢哋好似未見過咁，按使用時有啲生疏，已心知唔多人幫襯。套餐黎到有啲似兒童餐，整體縮細左，海膽係韓國海膽，比日本原板細板好多，木板如iPhone 4般大小，每片海膽如女士嘅尾指指甲的大小，唔腥但亦冇乜海膽味，薄薄一層飯連三片唔脆的紫菜同幾片生薑，生薑醃得唔錯，前菜係蔴醬沙律菜同豆腐，普普通通，配日式餐廳例牌的味噌湯，食完成個餐都仲有空虛的感覺，每款份量都好少，見墻上寫住壽司飯免費添加，問下店員係咪有得加飯，店員竟然話冇，可能我地用優惠券啦，但睇返個餐牌，魚生飯都只係$148，我哋都唔算好優惠啫，連我一個女人仔都唔夠飽，最後去左附近快餐店打個邊爐。