泰‧雅

营业中

休息中

好耐無試新野，今日收工去屯門練箭前一支公搵下野食，係雅都呢邊呢間泰雅咁多好評又未試過，就一於試下真唔真先，門面就連埋餐牌，一眼望晒，款式都唔少有主餐同小食甜品，但就無大路既海南雞飯同無骨豬手。泰式燒豬頸肉飯+薯絲蝦卷今日就試下招牌既豬頸肉飯，跟個小食薯絲蝦卷就加12蚊有2件，先講講豬頸肉大約有10塊，但比較薄同細塊d，面頭都加左d炸蒜增加風味，豬頸肉燒得幾香，唔會好乾，我都真係睇住一落單後個哥哥仔先放上烤爐燒，幾新鮮，跟個泰式醬汁幾特別，少少酸少少辣，幾開胃，飯既質量就一般啦，唔係d咩靚米，但好在唔會濕先，算ok，配菜有2塊青瓜同1塊蕃茄，都幾新鮮。薯絲蝦卷都係新鮮炸起熱辣辣，外皮炸得好脆，蝦肉就唔算多，但幾有特色，12蚊2件可以試試。飲品黎講本身想加10蚊要個涼粉冰，但店員話今日無冰只好要枝裝椰青水就加6蚊，if牌子都算ok啦。整體黎講食物質素算唔錯，價錢都幾平民，可以返食。