主打越式菜既佢地係餐廳風格上走年輕路線，
牆上面仲有一大幅有型Street Art塗鴉畫，
平民得黎都幾有格調啊
牛油單骨雞中翼 $58
炸雞翼一上枱我已經聞到好香#牛油 味，
仲有超多蒜粒鋪係面！
我第一眼望落去都睇唔出原來係雞翼黎，
外表炸到金黃色，賣相吸引
雞皮咬落鬆脆香口，炸粉唔會過厚，
肉質方面都算得上幾滑。
將炸蒜粒連雞翼一啖咁食，
濃郁既蒜香令成件事變得更惹味！
不過食完個口會好口渴同一大陣蒜味，
大家記得要飲返多d水中和返啦！
同埋值得一提既係雞翼拆成單骨之後好方便進食，
貪靚既女士們都一樣可以保持儀態，
唔怕食到隻手污糟哂啦
香芒軟殼蟹米紙卷 $68
係半透明既米紙卷下隱約見到鮮黃色既芒果肉同生菜，
軟殼蟹等等其他豐富配料，
真係令人食指大動！
米紙口感煙韌，芒果幾甜，
仲同香脆既軟殼蟹好match添！
加上有粉絲，蘿蔔絲，青瓜絲 同生菜做配料，
感覺非常清新健康，一d都唔heavy。
就咁食可能會覺得唔夠味同乾身ga，
所以記得要點埋越式酸辣汁黎食，
酸酸地咁就夠哂胃口啦！
原個椰青海鮮焗飯 $88
Li個焗飯賣相相當有氣勢，
用左一大個椰青裝住焗飯上枱，
營造到一種椰漿同海鮮多到漏哂出黎既效果！
海鮮有蝦同魷魚圈，
雖然係雪藏貨色，但食落都算彈牙，
而且份量仲幾足料ga！
因為焗左係椰青入面，炒飯既味道都會帶有淡淡椰香，
同椰漿撈勻黎食仲會有甜椰奶味！
不過其實椰漿同海鮮係用黎鋪面為主，
椰青入面都係齋炒飯比較多，
如果椰漿可以多d攞黎撈飯就更好啦！
總括黎講Li間越式餐廳既食物整體質素唔錯，
而且食物定價比起同商場既其他餐廳算大眾化，價性比高
環境服務亦都幾好，係一家大細食飯又或者同朋友聚會既好選擇呢！
