最近backdate寫番之前啲食肆，去到備長食串燒，於是今個星期响區內試咗間新店鳥居。今日繼續搵香口嘢，索性全日跨區，去咗鄰區嘅黑炙。
要咗燒物定食B。
由於店方選用竹碳鹽，所有食材燒完上枱都仍可看到淡淡的灰點印。
沙律－切粒青瓜配以麵豉，清爽鹹香🌿
銀鱈魚－軟彈肥滑而非一般嘅腍削，魚皮吸埋醬汁甜美，同鉄人鮨花整嘅一樣係最好🐟
豚肉露荀卷－露荀嫩口無渣多汁，肥膏薄薄依附露荀，有少少油脂香，個人認為多番少少肉會更香🐖
車厘茄－酸甜爆汁，夾雜其他肉食減低滯膩感🍅
冬菇－燒得略乾，但加上燒汁同吃不錯，調味適中冇過鹹🍄
雞翼－皮脆肉嫩滑多汁，邊位少少焦香夠脆🐤
安格斯牛柳－軟腍重牛味，店方拿捏生熟度準成冇令肉過熟過韌。有一嚿黐住少少肥膏好香牛油味🍖
蕃薯－紅皮黃心，蕃薯味濃，纖維細密幼滑軟腍，食完唔覺滯🍠
白飯－食落有種稻米略焦嘅香甜，軟硬適中，除咗蟹一嘅鮮甜美白飯，呢度嘅係我食過咁多間店最好🍚
麵豉湯－香䓤味四溢但麵豉味稍淡，整體不錯🍲
咖啡－甘香夠濃度夠熱，隻杯外表cyber metallic，好薄輕身但保溫不錯又唔辣手。
茶－選用麥茶清熱解毒而非綠茶，好香麥味，濃淡適中🍵
服務要讚！店員先上5款串燒，避免放涼影響食味同客人冇嘢食齋等，放低嗰陣講明仲有安格斯牛同蕃薯後上；問起茶種類，店員即細心問是否不對口味👍
店內設計獨特，富有強烈金屬感但並非粗獷，metallic but elegant🌌
一定要約朋友去食晚餐﹏
