正華餐廳

今集做試伏專員，諗住搵下新野試既時候見到呢間新開無耐既正華食店，之前上網睇過人講話係主食石磨腸粉同粉麵類既，而且標榜係純手工製，咁就一於試下啦。

先入黎坐底睇下餐牌，餐廳環境幾企理，小店細細間10張枱唔夠，餐牌上食物種類不算太多，主打都係石磨腸粉同粉麵。

家鄉肉雲吞湯河粉
河粉比較薄，而且比較碎濕濕，食到後尾更加碎到夾唔起，失敗，湯底比較單調，飲落都有d味精，之後好頸渴，失敗，肉雲吞唔知係咩肉，斷估係豬肉加左d粉溝埋，無肉汁，唯獨幾好既係雲吞皮幾薄，都係失敗，食到尾都真係食唔落。

家鄉肉雲吞河粉

$35

石磨蝦腸粉
28蚊既手工腸粉，3條分開左9件，平均1件都分唔到1粒蝦，成腸粉數埋得5-6粒蝦仔，洗唔洗咁慳皮，蝦粒都係d急凍蝦，細細粒無特別，腸粉都算ok滑既，不過無乜米香味，28蚊真係求其去間酒樓都好過佢。

石磨蝦腸粉

$28

豆漿
全餐最正常，10蚊1枝仔，唔會話好甜，豆味少少啦算合格。

豆漿

$10

整體黎講真係一個字差，全部野散叫無套餐，食物質素差，價錢唔算平，粉麵黎講呢個價錢求其去間潮式粉麵店食好過佢多多聲，腸粉去返粥店食又好過佢，雖然我好支持小店，但呢間撐唔落，不推薦。