基隆茶餐廳

营业中

休息中

喺網上認識呢間食肆，老闆係個有心人每逢初一十五會免費派齋飯畀長者。因為這個平台的使用者對這間食肆的評價也相當之高，所以專程來此一試。位置唔顯眼，但好嘅食物質素就可以維持一班熟客，呢個係好嘅經營之道。店裏面環境比較擠迫，如果唔係有防疫措施，坐滿人真係要走過通道都有困難。但係一般街坊生意茶記食飽就走，其實就冇乜所謂，對環境要求無需太高，反而食物質素重要。餐牌都係一般茶餐廳嘅炒粉麵飯，冇乜特別。我好鍾意用下午茶時段去測試餐廳嘅品質，因為份量比較少可以走多兩轉去其他食肆試其他嘢，價錢又比較便宜。今次叫咗呢個下午茶餐有一小碟嘅豆腐魚柳飯，同一杯熱飲奶茶，盛惠38大元。分量對大男人來講可能會有啲唔夠，各位師兄自己考慮。我講過我反而鍾意佢細所以就冇所謂，好味最重要。碟飯冇令我失望呀，豆腐咬開軟滑新鮮有豆味。最欣賞個咖啡色茨汁，做到有好清香嘅蠔油味之外，唔會死鹹或者油膩膩，廚師再加幾條新鮮嘅蔥去吊一吊味，真正做到色香味俱全兼夾有鑊氣。魚柳講真就麻麻，炸皮比較厚，而且食得出有味精。奶茶免費送嘅，唔係最好最細滑順喉果隻，但係絕對見得人，好多其他茶餐廳嘅$20杯都未必有咁嘅水平，呢杯絕對收貨。