素一素

营业中

休息中

近排因為一啲原因多咗選擇素食，然後先至發現香港嘅素食選擇真係好少，一係就好貴，一係就係好傳統嘅中式素食，再唔係就係沙律嗰啲。今次嚟到工業區荔枝角，估唔到都有素食可以選擇，香港工業中心本來係批發為主，但原來地庫係有一個小型嘅美食廣場，雖然格局好似有啲奇怪，喺個小小嘅路口行落去，但係落到去發現都幾企理，素食嘅空間好乾淨整齊。因為我係晚餐時間嚟，可以選擇食套餐，先有一個中式湯水，冇諗過唔用肉都可以煲得好鮮甜，然後選擇叉燒黑松露炒蛋，仲有一個係咕嚕肉，配襯紅米飯，成個餐份量啱啱好。千祈唔好覺得素食就一定好清淡，我好鍾意個蜜汁叉燒，佢係用咗柚子蜜，我覺得同豬肉叉燒去比較嘅話，其實呢個仲好食，起碼唔使擔心啲叉燒太肥有肥膏。松露炒蛋都做得好，另外咕嚕肉我覺得真係唔講唔知佢係素，酸酸甜甜好開胃。幾十蚊一個晚餐，性價比都算唔錯，我見到午餐嘅兩餸飯仲吸引仲平，喺附近做嘢嘅人有機會過嚟試吓！