芝加哥串燒酒場

今次食嘅係位於中環蘭桂坊嘅芝加哥串燒酒場。店入面播住強勁嘅音樂，再配埋射燈，即使係天都未黑，已經非常有氣氛。店舖採用QR code落單，一望已經俾佢非常之長嘅Menu震懾到。牛肉，豬肉，羊肉，雞肉，海鮮仲有甜品；可以話係一定有你想食嘅嘢。價錢方面平由廿幾蚊起去A5和牛扒都有，可以平有平食，想食好少少又得！今次同朋友決定以量取勝，乜都食啲。首先想講呢度嘢食真係幾抵。一口和牛串，原本以為只會係普通嘅牛肉，點知真係和牛，入口滿滿嘅牛脂香，價錢仲要唔使$30，超抵食。仲有鹽燒豬頸肉，一樣超肥美，都只係$19。仲要份量都唔算細，每串都起碼有五舊肉起。仲有呢度嘅火候掌握得非常之唔錯，大部份菜色都燒得啱啱好。例如佢嘅芝士大虎蝦，蝦身一啲都唔老，再配埋邪惡嘅芝士，真心好食。另外亦都叫咗鹽燒扇貝，燒完都keep幾多汁。最後仲有白鱔同宮崎雞扒，兩樣嘢都係燒到皮脆但肉質仲係鮮嫩嘅，非常有水準。最後都想講吓呢度都有幾多特別嘅菜式，例如有乳豬串食。最驚訝嘅係竟然有甜品牛乳卷，食成餐想食返少少甜嘢啱啱好。總結下，個人覺得依串燒店以中環嚟真心抵食，而且佢嘅選擇都幾多，如果想喺港島食串燒都幾推薦大家嚟試吓。