餐廳環境幾乾淨，類似茶餐廳冰室咁既坐位，枱上有佢地自己整既辣菜脯比客人自己落😁
車仔麵
麵底（$12）牛腩（$14）豬大腸（$14）雞翼尖（$10）
呢度既車仔麵配搭好多元化，無論麵底定餸，諗得出既都基本上有，湯底仲有多款醬汁選擇，我就揀左腩汁，三款餸我都覺得揀岩，牛腩肉嫩，豬大腸大大粒，最正係個雞翼尖，整得好入味🍜
招牌煎餃8隻（$45）
煎餃有3款口味，韮菜豬肉，椰菜雲耳豬肉，芝士粟米，我地揀左雙拼椰菜同韮菜，芝士粟米就要加$3，佢地個餃子好有驚喜，裡面充滿肉汁，真係用皮簿餡靚黎形容都不為過🥟
爆漿阿華田西多士（$38）
呢個西多士都係佢地既招牌，餐廳牆身貼既西多士相出黎，賣相好吸引，西多士既中間係滿滿既流心奶，好正，個西多士可以揀花生醬或榛子醬，榛子醬就要加$2，我地都照揀榛子醬，覺得咁先夾個西多士，佢佈滿曬阿華田粉，啖啖都食到香濃既阿華田味😋
凍檸茶（跟餐+$8）
就係普通一杯茶記凍檸茶，冇咩特別🍹
呢間車仔麵店估唔到佢其他食物係咁有驚喜，佢地車仔麵本身都做得好，煎餃同個西多就真係大開眼界，過黎食既話記得留肚食西多🤩
