A，小酥肉、炸南瓜粒、炸魚、椒鹽炸豆腐，配熱飲
B，蘿蔔牛筋腩菜飯，配熱飲
話說早前同老佛爺去飲下午茶，佢老人家話要食飯，但下午茶餐有飯食嘅供應唔多，即使有，款式都非常少，呢間都唔例外，佢於是死死地氣揀咗午餐之一嘅蘿蔔牛筋腩菜飯，而我就繼續試嘢，叫咗一個下午茶餐，包括炸魚及兩個小食，我呢次叫咗未試過嘅炸南瓜及食過返尋味嘅小酥肉，只加小食椒鹽豆腐，咁啱個價錢同老佛爺個午餐價錢一樣，真係估都估佢唔到，當然最後由我包底食埋佢食唔哂嗰部份，唔想浪費，製造廚餘嘛。
味道方面，牛腩同牛筋燜得夠腍，要食碎餐嘅老佛爺都食得到，味道都好好，有八角嘅五香味，蘿蔔鮮甜夠腍，牛筋燜得好滑，size唔大，對老佛爺剛剛好，但對我嚟講係太細，唔過癮；菜飯啲菜有啲硬，佢居然食到，出乎我意料之外。
魚有魚味，瓜有瓜味，小酥肉炸完後有調味，三樣食物各自各精彩，各自各好食，可惜附上嘅沙律醬少咗啲，多啲就更會好味啲。
椒鹽豆腐外脆內軟，可惜太薄，而且椒鹽味唔濃，唔及煎釀三寶嘅炸豆腐好食。
總括嚟講，呢餐嘅質素係滿意嘅。
