魚米 (翠屏(北)商場)

呢日中午同老佛爺及佢朋友嚟到呢度食午餐，我叫咗黑魚米線，麻辣湯底，由於唔係套餐，飲品要加錢，既然係湯米線，唔要飲品都得，麻辣要小辣。呢度嘅米線，一定附上一件響鈴，件響鈴好脆，但都係索湯汁好食啲。唔知係唔係因為響鈴比較好儲存，無生筋、麵筋或豆腐卜咁易膉嘅關係，所以只有響鈴而無其他索汁神器呢？黑魚即係生魚，又叫烏魚，可能用漿粉醃過，而且似係急凍貨，所以得個滑，而無魚嘅鮮味，配料除咗有芽菜同韮菜外，居然有豬絞肉，即免治豬肉，魚湯居然放豬肉？搞邊科呀？個湯底係正嘅，食到麻嘅味道之餘又有啲辣，但唔會過辣，呢個程度嘅麻辣啱我，而且聞到麻辣嘅香味，正！只係略嫌碗湯鹹咗少少，淡返啲就完美啦！食完之後，意猶未盡，叫咗碟黑金流沙芝麻球，一人一粒，即叫即炸，出嚟熱辣辣，滿滿芝麻粒，賣相已經引死人，咬落口啲溶漿湧咗出嚟，而且一定要慢慢食，粉皮係黑芝麻，餡料似係花生加芝麻，因為食到花生粒，但花生香味唔太濃，食完個個讚。呢度嘅小食，除咗芝麻丸外，小酥肉都好好食，下次試埋個豆腐至得。…查看更多

因為啲火腿有祲酸味，所以呢間嘢有好幾年都無再幫襯，由於老佛爺話呢間啲嘢好食咗，而我早前亦試過佢嘅下午茶及晚飯，覺得對版，所以呢日試下佢哋嘅早餐，事隔多年，個餐牌早已經唔同哂，想起早幾日去過附近嘅海記美食食早餐，所以叫返近似嘅嘢作對比，呢次叫咗沙嗲牛肉麵、「頂級」午餐肉、炒蛋、丹麥酥配熱奶茶。先講杯奶茶，呢度有啡糖及砂糖供應，唔似海記及部份食店咁，只得砂糖，既然有得揀，我當然落啡糖啦！落完糖攪勻，杯茶嘅味道比海記淡好多，啲奶似乎落多咗，令茶味出得唔夠，茶係滑嘅，亦好過大家樂。丹麥酥搽咗牛油再烘，好脆，但覺得係阿茂整餅，做咗多餘嘢，丹麥酥本身已經重牛肉味，再加埋牛油，就過咗火，根本就咁烘熱就已經得，唔需要再搽牛油。炒蛋食到牛油嘅香味，蛋夠傑，但就變成唔夠滑，呢個炒蛋，大家樂同系嘅一粥麵就做得比較出色。午餐肉，佢話係頂級，我實在搞唔明點樣頂級法，莫非升級做火腿午餐肉就叫頂級？但若果唔係用長城牌嘅白豬仔，就未到頂級，但食落口又無白豬仔獨有嘅香味，即使次少少嘅天龍都唔似，若果話普通嘅午餐肉，午餐肉一哥嘅美荷爾同韓國牌子遠東都好食過佢，頂級呢兩個字，絕對有貨不對辦之嫌。沙嗲牛肉麵有啲驚喜係碗湯用沙嗲湯底，但味道偏淡，唔夠濃，牛肉亦無相應跟進，令碗湯嘅沙嗲味濃返啲，牛肉份量雖然多，而且有用梳打粉醃過，可惜同大多數茶記及快餐店一樣，啲肉未有完全鬆開，食落有渣，唔能夠完全咬開，麵條煮得剛剛熟，但由於麵質關係，所以即使熟都好，都係唔夠滑。呢間嘢起檯角貼住張紙有wifi，又可以用手機落單（見最後一張相），但又係貨不對辦，二維碼係開到嚟點餐，但根本無個網路名稱（sorry ，影得唔好，無留意影唔到全個網路名稱及密碼），所以諗住好似麥當勞咁用佢哋嘅流動數據上網都唔得，即係廢嘅。雖然係咁，但我應該會至少嚟多次，試下佢嘅沙嗲湯黑魚片米線，感覺呢個配搭有啲怪。另外，畀我發現個餐牌上，有一個餐係圖片與文字描述不相同嘅情況，唔知你又搵唔搵到？突然間諗，呢度做西式快餐都好多舖頭有做，但係無粥舖，而呢條邨都係屬於老人邨，佢哋亦有聯營品牌係賣粥，點解唔轉營賣粥呢？…查看更多

早前颱風襲港，在8號風球懸掛，但外面無風的情況下，家中廚房意外被佔據，打開手機想食老麥，但又意外地無優惠，於是落街搵食，嚟到呢間門口睇下有乜好食，見到有個鴨髀餐，好特別，雞髀餐就經常見，間中食，鴨髀餐就第一次見，於是入去試下乜料。呢個餐係鴨髀配兩款小食加飲品，我叫咗小酥肉及薯條，配熱水蜜桃。結果嚟到時出咗意外，竟然係鴨髀配薯條及西多，於是向店員反映，佢居然話額外送一份小酥肉畀我，而唔係換走件西多，呢個店員認真唔話得，我諗唯一解釋係西多唔係咁多人點，所以寧願益客吧！但即使唔多人點，都可以留畀員工自己食啫，點解要益客？或者驚我食過卦，唔理啦，反正我有著數，一次過可以試食三樣小食。杯水蜜桃先嚟，好甜，明顯係糖漿水，試過一次就夠。薯條係無鹽，店員姐姐好好人，拎咗成支茄汁畀我，唔似得麥當勞咁孤寒，一細包一細包咁畀，啲薯條係無鹽粗身薯條，食落口係熱嘅，比麥當勞或大家樂都好食好多。西多係花生醬餡西多，但餡料唔多，比較啱我，麵包亦厚身，比大家樂好食好多。小酥肉絕對係一個驚喜，豬肉條外裹住漿粉去炸，外酥內軟，而且還灑上香料粉，係咩香料粉我唔肯定，但其中一樣肯定係花椒，但應該咁只花椒一樣香料。外酥內軟嘅炸豬肉條，加上足層滲透出花椒香味嘅調味粉，將呢碟小酥肉推向另一個層次，非常非常非常（重要事情要講三次）好食。另一個驚喜絕對係主角鴨髀，炸得非常非常非常透徹，肉質結實，份量非常之充足，與其話係鴨髀，不如話係鴨下裝更為貼切，幾乎每一啖都有鴨肉香味滲入口腔之中，咩叫齒頰留香？我諗就係呢種情況。$41一個下午茶餐，有炸鴨下裝、薯條、半份西多士、小酥肉及熱飲，帶畀我連環驚喜，絕對超值。就因為呢一個下午茶，帶畀我連環驚喜，令我對呢間食店改觀，並在之後繼續幫襯。…查看更多

這天晚上，難得家人團聚，來到這家食店吃晚餐，一行4人，每人點了一份餐，分別是：燒鰻魚蛋包飯煎魚柳菜飯滷肉碎黃立鯧飯胡椒豬肚鹽焗雞配米粉熱檸茶、熱奶茶及凍檸茶各一杯他們點的都是飯跟飲料，唯獨是我點的餐沒配飲料，但價錢卻是最貴的。前兩者我沒吃過，味道如何我不清楚，但賣相甚為吸引，據他們說味道很好，蛋很滑，但鰻魚飯的汁略嫌少了一點兒。餐牌雖然寫魚柳是煎，但目測是炸的，今時今日的香港，事事講求快速，那會給時間來煎？做夢吧！鯧魚，我吃了一點點，是炸魚，魚皮炸得非常脆，這裡的魚一般是炸的，喜歡吃炸魚的人，不容錯過。即便是蒸魚，我臨離開之前，看過鄰檯的，非常香而且賣相也吸引，下次應該會嚐一嚐。至於我點的東西呢！哇塞！熱烘烘的一個鐵爐從服務員手中小心翼翼的端上來，下端仍是冒火，上方是冒煙的，熱氣騰騰，冬天來吃更是合宜。材料非常非常豐富，有豬肚、鹽焗雞、娃娃菜、蘿蔔、芫荽、鹹酸菜、香芹、小雲耳，從相片也可以看到份量非常之多。味道方面，從顏色及韌度來看，米粉應該是滿姨米粉，喜歡吃的會覺得非常好吃；豬肚、鹹酸菜、香芹、小雲耳的味道不錯，蘿蔔很甜很嫩，吃得出是新鮮沒有加糖的，鹽焗雞很很鹹不滑的那種鹹焗雞，嚴格來說是鹹雞不是鹽焗雞，我可以接受，但如果可以滑一點，沒那麼鹹會更好，芫荽是長腳芫荽（即長枝葉），這種芫荽的味道沒短腳的芫荽那麼香，如果改用短腳的，效果會更好。湯方面是魚湯，但過鹹，不單沒有胡椒的辣味，就連胡椒粒、胡椒碎也看不見、找不到，絕對是失敗。話雖如此，這一頓飯還是滿意的，而且這裡晚餐的選擇很多，就連小食都有6款選擇，我也翻了好幾遍餐牌才決定吃什麼，而我亦只拍了部份餐牌，有興趣的話，請自行前往品嚐。…查看更多

魚米呢間舖，講真... 都係麻麻地啦。😐首先講個價錢，確實唔算貴，對於平民食客嚟講都算係可以接受嘅。💰👌 但係你知啦，平嘢有平嘢嘅道理。佢哋嘅魚湯米線配原條炸魚，聽落好似幾吸引。🐟🍜 但係一食就知道啲魚唔係太新鮮，明顯係用雪藏魚整㗎。😕 仲有啊，以前嗰條左口魚大大條，而家細咗好多，真係有啲失望。📏😔至於豬軟骨菜飯呢，睇到出係預先整好，到時再微波爐叮返熱咁。🔥🍚 咁樣整出嚟嘅嘢食，你都知係點啦，冇咩驚喜可言。🤷‍♂️如果你只係想平平地填飽個肚，魚米都算係一個choice啦。🥄👍 但係如果你對食物有啲要求嘅，可能會覺得有啲失望。😞環境就普普通通啦，冇乜特別。🏠 職員態度都算可以，唔會好差，但都唔會特別好。🙂總括嚟講，魚米都係間中食下啦。🤔 如果你剛好喺附近又肚餓，又想慳啲錢，咁入去食啲嘢都無妨。🍽️但係唔好抱太大期望喎！😉 記住，你俾咩價錢，就會得到咩質素嘅嘢食。💡 所以唔好對佢要求太高啦，咁先唔會太失望。😅如果你想食啲好啲嘅嘢，可能要諗下第二間喇。🤔💭 香港有咁多好嘢食，總有啲更好嘅選擇嘅！😊👍…查看更多

就咁睇相，你未必會知呢間食店死因起邊，但你睇落去就會佢點解生意慘淡啦！話說今早心血來潮想嚟幫襯呢間好耐未嚟過嘅連鎖食店，魚米，在嚟呢間舖頭之前，我必需經過佢一個舖位之隔嘅意樂，一望入去，生意非常好，星期日朝早，接近10點，幾乎坐滿，反觀呢間魚米，唔係小貓三四隻，而係少貓一兩隻，大量坐位任坐。我隨便搵個卡位坐低，拎起餐牌，原來轉咗，但第一眼畀我搵到呢次嚟食嘅目標：餐蛋治配熱奶茶，承惠$29，烘底加$1，即一共$30，呢個價錢絕對有競爭力，因為佢樓上嗰間翠屏茶餐廳，唔烘底都要$34，對面嘅譚仔連烘底都要$29，同區嘅百分百，麵包厚啲，烘底要$35，你話佢呢個價係唔係算係有競爭力？咁問題出起起邊？死罪一，杯奶茶出事：我慣性唔試味，先落糖攪勻再試味，咁就出事啦！哇！甜到呢，好似落咗煉奶咁甜，而且無茶香、無奶味，雖然唔嚡口，但一味得個甜字，完全唔掂。死罪二，餐蛋治：雖然佢標榜係頂級餐肉，但實情係呃鬼食豆腐，塊餐肉一啲都唔香，咁都叫頂級？頂佢個肺就有份；仲有，個炒蛋唔修邊，露咗出嚟，賣相已經打折扣莫非係故意咁做，令人覺得佢用咗好多料？死罪三，服務：堂堂一間連鎖經營食肆，居然唔出單畀客，到我出去收銀埋單時，負責收銀嘅亦完全無講幾錢，我於是碌大對眼望實佢出張收條，嗰吓佢意識到我似乎想到張收條，就問我係唔係想要張收條，我當然話係啦！點知你會唔會收錯數㗎，好彩收款金額正確，我可以安心出門離開。起我進食期間，有個無著制服嘅女人起度講電話，埋怨生意呢間舖頭生意唔好，我有理由相信佢係呢間店舖嘅負責人。鬼咩！咁嘅食物質素同服務態度，同佢嘅競爭對手完全比下去啦！而事實上，就起我入嚟呢半個鐘，只有兩個人入嚟食嘢，外賣亦只有一單。而我離開之後，即朝早10點半，返轉頭去睇吓意樂，望入去係完全滿座，再過馬路，去佢對面嘅大家樂同譚仔望下，大家樂接近滿座，相信同佢哋有一班基本捧場客有關，而譚仔嘅入座率就同魚米有得比，之但係譚仔嘅午市係超好生意，可以拉上補下，而魚米可唔可以做到咁？我絕對有保留。…查看更多

一早行過食咗個早餐一入去已經相當奇怪不過兩三台客但係每一張枱都擺滿上一手食客食完嘅餐具成間嘢完全冇人做嘢兩個阿姐行嚟行去唔知做燈膽壞咗都唔換講返份早餐雞扒餐肉炒蛋熱咖啡 39蚊正正常常冇乜特別同一般連鎖快餐店差唔多但係餐廳嘅服務 極度惡劣因為後尾發現原來間餐廳唔係冇人做嘢起碼見到兩個樓面同埋一個清潔阿姐全部加埋得四枱人但係客人食完嘅餐具依然就咁擺咗喺枱面有新嘅人客入嚟根本唔知坐邊度好佢都係一間連鎖嘅食店睇嚟管理層要好好整治下班阿姐…查看更多

今日朝早落樓下食早餐，只係帶咗手機同八達通，先去最近嘅美心，先起外面玻璃望入去，見到啲檯唔係有人坐呢就係啲人食完啲餐具未執拾，睇見都有啲唔開胃，推門入去望下個餐牌，話是日粥品，但又無講話乜嘢粥，萬一係我唔鍾意嘅皮蛋瘦肉粥就大檸樂啦！於是過馬路，過對面，去好耐都無幫襯過嘅魚米。一打開門，食客比美心少一半以上，更重要係啲檯呀，全部都乾乾淨淨，無一張係有食客食完嘅餐具，地方任坐，而且坐得比美心舒服好多，食物即使唔好食，單係環境已經值得加分啦！打開個餐牌，首先打動我嘅係餐牌第一頁右下方嘅芝士滑蛋漢堡扒牛角包，$35連熱飲，抵食啦！再望下，餐牌上方嘅餐，比較下原先選定嘅餐，雖然無咗芝士同滑蛋，但有流心煎蛋，仲有腸仔、火腿同餐肉，都只係貴$3啫，咁梗係叫呢個啦！嘢食好快嚟到，牛角包係我至愛之一，我之前都講過話牛角包要好食，就必需符合兩個條件，而且缺一不可：一要脆口，二要有牛油香味，但佢呢個牛角包就兩者都欠奉，失望😨😰😫腸仔，正正常常嘅雞肉腸，唔會過鹹，但無驚喜，可接受。餐肉，正正常常嘅火腿唔餐肉，同樣都係唔鹹，亦無驚喜，可接受，睇得出有煎過，但若果煎得香啲嘅話，效果會更好。煎蛋，絕對無呃人，真係流心蛋，但明顯係預先煎好，啲邊唔脆，個蛋唔熱，如果係即煎嘅話，味道會正好多。漢堡扒，無比較就無傷害，佢呢個似係凍肉舖買到嗰隻，但同老麥嘅豬柳拍埋一齊嘅話，高下立見，老麥嘅好食得太多太多啦！火腿，食落居然有啲酸味😱😵😕，完全係香港前教育局局長嘅花名，佢係呢個餐入面最差嘅食物🤢🤢🤢。最後，到杯奶茶，無茶味，唔得香，即使用咗啡糖都無用，咁嘅食物質素，加上唔似得美心有免費Wifi，難怪會比對面美心少一半人以上，即係小貓三四隻，呢間舖唯一優勝地方係乾淨，因為當我食完無耐，店員立即嚟收拾餐具，抵讚👍👍👍。順帶一提，呢間舖頭，乜鬼調味料都唔見有起張檯或櫃桶內，連茶記最常有嘅鹽、胡椒粉、辣椒油等通通都欠奉，唔講下下要開聲問職員攞？還是佢哋對自己出品太有信心，知道啲客唔需要加任何調味料都食得稱心如意？又抑或覺得一間店舖，只有兩個樓面，會令佢哋太得閒，所以要佢哋做日本首相，幫客拎呢樣調味料，果樣調味料？越諗越唔明，難怪啲怪越來越少，唔係無原因嘅。到最後出去畀錢，又發生咗一件我諗極都唔明嘅事：我間店員接唔接受BOC pay，佢答話無呢個收款功能，咁我只能夠畀八達通啦！但奇怪係佢出嘅收據居然係中銀抬頭嘅，咁即係話佢呢間食店係以中銀作為主要營業收入存款嘅銀行啦。以中銀作為主要收入存款銀行嘅公司，居然無中銀嘅電子支付工具，係唔係好怪呢🤔🙄😳？…查看更多

今晚大家都有點累，又凍，決定叫魚米！清蒸黃立倉 HK$79.00 少少䶢和少少油膩豬軟骨牛肉雞翼米線（加底）HK$79.00豬軟骨真的肥得很，多油到。。。娃娃菜 HK$25.00 還可以 okay la~東江雜菜煲 HK$58.00這碗所謂的「雜菜煲」的最下面用了不知甚麼類似粗身的河粉，來做配菜（墊底），實在很難食。扣分！整體而言，下次還是叫回「譚仔」，起碼不會太多油，又不會無啦啦多了不知甚麼河粉之類在菜裡面。…查看更多

今日本身凍凍地，想食d熱野。（平時隔離有兩間餐廳都食開）比次機會你，睇下會唔會成為第3間食堂。試試而間野，個咖啡黎到果時，飲第一口，已經同隔離兩間有對比。（算，中午唔好咁高要求）觀感無咖啡油，點叫即磨咖啡？口感，無味，要落糖先有味。個餐黎埋，xyz!!!!!!!。。。第一次覺得中午咁唔底食，唔怪得無乜人。👏成個粉面餐，陣係食粉。49蚊，陣係食粉好似貴左少少，原來d餸係咁貴。得果6粒細！魷魚圈！炸粉多個魷魚。隔離兩間起碼有d野落個胃。打完而篇食評，飽哂熱哂多謝哂，一肚氣同嬲到熱。食完唔飽，仍要去再食其他野。…查看更多

魚米吃過了大圍那間..這間是第二次吃的魚米....老實說了...34蚊任揀3餸配熱飲，凍飲加3蚊...3餸仲有豬扒、雞扒、漢堡扒揀...算係咁了...11點去到還有早餐牌...就叫了3餸面....雞扒、雪菜肉絲和餐肉配通粉加凍奶茶少甜少冰...等5分鐘就來到...值得一提是雞扒應是剛炸起...分不出即炸還是番炸，總之是夠熱的..餐肉就得一般了...但個辣椒油就夠晒辣，衰在杯凍奶茶很耐才到....另外加5蚊有個牛角包，很大的，5蚊在面包鋪是買不到了...一定要加了！…查看更多

超正平民早餐😍😍。牛角包超香，又唔會太油，個酥皮咸香味濃，空氣感唔錯，超級醒神🥐🥐。雖然好邪惡，不過我好鍾意食牛角包🤣🤣。炒蛋唔會好老🍳🍳，但系又唔會好生 (我完全食唔到生蛋)，呢個ok, 幾香。有啲雜菌系度🍄🍄，都幾足料下架。火腿通粉好出色😍😍，雖然個火腿有啲hea, 不過我又唔介意賣相嘅😂😂。最緊要系雞湯底清澈香濃，通粉唔會淋哂咁，又唔會硬，又爽又軟，正喎。超鍾意呢個湯底。…查看更多

星期六朝早起身，最好就去嘆番個早餐，剛好趕及11:30前去到餐廳，極速叫個自選早餐。$37有個牛油多士，仲有三款餸，揀咗魚蛋、雞翼同餐肉，都算幾多選擇，湯底OK，食完唔會口渴，食完好飽㗎，嘆埋杯熱檸茶，即刻醒神晒！…查看更多

今日工作比較忙就開個外賣app睇下有咩外賣好食，由於天氣比較乾燥，就揀左濕濕地嘅米線食，外賣app好方便，每個項目都可以調整例如辣度，份量，好仔細每個餐要另外增加$10附加費，不過為左懶就比佢啦！🕞輪後時間🕤 有點失望，本身個預定到達時間一次又一次延後，最後足足等左75分鐘先到真心可以改善一下，例如有服務承諾落單後大約幾時會到！揀咗先魚湯五福臨門米線，試左個湯有魚味，不過偏鹹，幾款餸系魚片頭比較好食，其他都一般。賣相就可能因為外賣比較難控制🔆總結一下🔆：下次應該唔會外賣，堂食還可以，不過也可能等侯時間過長，所以降低左品質 ！希望有所改善，宜家比較少出街，要盡量避免人多擠迫，如果可以坐座家中都食到美味嘅午餐就開心…查看更多

平時諗唔到食咩附近有冇乜好食就局住試吓呢一間魚米，佢嘅款式都算好多嘅你都有好多小食咁就可以配合自己鍾意嘅口味啊唔同嘅米線或者飯或者小食。嗰日就叫咗個黃花魚米線，條魚係新鮮炸起嘅但係又係冇乜鮮味而且炸得有啲乾，完全唔滑。不過佢就係原條魚上感覺上好豐富米線嘅份量都足夠嘅，軟硬度就爭小小我略嫌佢啲米線煮得有啲晏食完有一點胃痛但係個湯底都叫唔錯佢有少少芽菜同埋腐竹,幾香。不過地方有一啲窄，而且衛生一般。…查看更多