堅信號上海生煎皇 (眾安街) (已搬遷) 新店位置

尋晚放工同愛人行荃灣千色店，穿過千色匯行到眾安街，睇到對面有一埋人買外賣，原來係間叫堅信上海生煎包嘅特色小舖，用咗家傳戶曉日本卡通小丸子嘅二、三線男同學嚟做主題，包括有永澤、山根、山田、藤木、濱崎、豬太郎⋯⋯雖然佢哋唔係主角，好多人都講唔出佢哋個名，不過已經好入屋，一睇就知道佢哋係同小丸子有關，好有親切感，令到我哋都好想入去打卡。招牌用得生煎包嚟招攬，生煎包一定唔少得啦，$20/2個，$36/4個，個生煎包都幾實淨，好彩等候期間已熟讀檯上展示嘅山煎包教學三部曲，如果唔係好易俾佢啲肉汁辣親，整體食落都唔錯，係嫌佢個包皮接口位過厚。小籠包$36/4個，不過不失，都算多湯汁。迷你蟲草花雲吞雞，$26/盅，如果食佢哋套餐追加$18就會更抵，湯內有兩粒雲吞一隻小雞鎚，呢碗湯真係有啲喜出望外，湯底濃郁，帶點好似花旗參嘅甘，雲吞皮薄餡料足，小雞鎚肉質唔會食到煲湯渣咁，有咬口有雞味。雪菜黃魚濃湯拉麵 $66，寫住＂即點即做，需時15分鐘＂，見到都吸引，嚟到確實好味，第一啖先飲湯，鮮甜濃郁，黃魚炸得香無腥味，麵質彈牙，值得推介👍🏼