嚮和風料理

同同事lunch去咗北角呢間「嚮和風料理」，裝修簡約，用QR code落單方便，最正係免加一，慳返多少。
今次專登試佢個黑芝麻牛肋野菜特式飯 ($72)，果然有驚喜：
黑芝麻咖喱真係好特別！ 成碟黑媽媽但香氣十足，估唔到黑芝麻同咖喱可以咁夾。芝麻味好濃之餘，咖喱嘅微辣同香料味都出，質地夠杰身，一食就知落足料煮。用QR code落單仲可以揀「多汁」，撈飯一流。

牛肋肉炆得夠晒腍，入味又易咬，唔會黐牙。

野菜種類多又煮得啱啱好：有西蘭花、椰菜花、翠玉瓜（爽口）、薯仔、爆汁蕃茄仔、豆角同紅蘿蔔（好入味）。每樣都keep到應有口感，唔會煮到爛蓉蓉，配搭落去好有心思，感覺夠健康。

特式飯本身係南瓜粟米飯，食到粒粒南瓜蓉同粟米，口感豐富。如果唔鍾意，可以轉白飯或烏冬。食量細記得揀「少飯」（正常份量都幾足，大食嘅可以加$4多飯）。

總結： 想試啲唔同嘅日式咖喱，呢個黑芝麻版本真心推介！牛肋肉夠腍，野菜份量同處理都見心思，加上免加一同QR落單夠方便，$72呢個價位嚟講幾抵食。會再嚟試其他飯品。