芝加哥串燒酒場 (明雲閣)

放假入咗元朗搵朋友聚一聚，太耐冇見，吹水為目標，地頭蟲帶咗我去元朗呢間人氣酒吧，環境好之餘，野食仲好高質素添。部分時段生啤做緊買一送一，杯杯都好巨型，非常抵飲。除咗生啤之外，亦都有烈酒/紅酒/白酒/清酒/cocktails,亦有多款無酒精飲品選擇。食物方面有飯類/烏冬，店內主打串燒，串燒種類繁多，以高質食材為主打， 貴價食材有生蠔/燒海鮮/和牛…亦有平民價之選，燒茄子/丸類/蔬菜…等等。Xo醬廣島蠔(半打) 隻隻飽滿肥美，鮮嫩多汁，xo醬惹味非常。香蔥燒蟶子皇 一份有兩隻，絕對係新鮮嘅海鮮，肉質爽彈鮮甜，完全冇沙，啖啖肉。燒羊架 帶有點點羊騷味，肉厚多汁，食落超juicy。炭燒牛扒 雖然牛扒唔算好厚，但係拿捏生熟程度非常好，唔會過老，肉質軟熟， 唔嚡口。牛舌非常彈牙，和牛串入口即化。campari orange 好似飲緊橙汁咁，帶有微量酒精，清新可口。sex on the beach 多種果味混於一身，香氣滿溢，充滿夏日氣息。裝修型格，有戶外同戶內座位，有歌聽有電視睇，氣氛一流。