霜月居酒屋

营业中

休息中

經過幾次門口，望過吓Menu都想試吓，今晚終於就嚟堂食，結果係極度失望，成肚火。入席時餐廳唔多人，只有一張枱有人坐，我地亦好快落單，叫咗豬軟骨拉麵同鰻魚炒飯。 結果！！！！等咗廿分鐘有多，豬軟骨拉麵先出！而鰻魚炒飯係足足等咗一個鐘！有冇搞錯！？中途催過，樓面哥哥話個飯炒緊，結果再等多成廿分鐘先出餐，其實炒個飯有咩可能炒咁耐？？極度浪費客人嘅時間！ 最神奇嘅係，兩樣食物都唔熱，只係暖，大概攝氏50幾度，乜唔係啱啱煮起架咩？點解可以唔熱？？至於食物質素，平心而論啲豬軟骨係ok，入味而且夠軟，不過拉麵同湯底都一般，湯底有即食麵配料嘅味。而個鰻魚炒飯，飯係林嘅，睇相都睇得出，味道只有日式醬油、麻油味，可以話係一啲鑊氣都冇，完全唔值$138。結論係廚房工作混亂，出餐極慢，食物性價比低，同區人表示唔會再幫襯。