七彩蝦片，炸得鬆脆，幾開心既前菜。
杏汁白肺湯，十分足料，肺洗得潔白爽口，湯十分清甜。
蠔豉生菜包，蠔豉餡料既濃味，配埋生菜清爽，啱啱好互相配合，濃而不膩。
錦鹵雲吞，雲吞皮炸到好香口，汁料酸酸甜甜幾開胃，入面有豐富既青紅椒、肉、豬潤等等配料。
酥炸蟹鉗，表面香脆，入面厚實好有質感同彈性。
小炒王，韭菜、西芹、鮮魷、腰果等等炒得夠晒鑊氣。
紅燒斑尾，大大條，魚肉夠滑，表皮泡過油好香口。
花雕蛋白蒸海蝦，蛋白有好濃既花雕味。 海蝦新鮮，肉質厚實入晒味。
豉汁盤龍鱔，蒸得啱啱好，鱔肉鮮嫩滑口。
金黃蒜香雞，皮脆肉嫩，加埋蒜更加香口。
窩蛋免治牛肉飯，賣相晶瑩通透。
馬拉糕，夠鬆化，食到蔗糖味而又甜度適中。
另外，酒樓週圍既陳設，都係時代既見證。 喺佢消失之前，好值得嚟下。
