首先上枱嘅日本和牛肩肉盛，切得厚薄啱啱好，烤到表面微焦，咬落口先係脆卜卜嘅外皮，跟住就係油香四溢嘅肉汁，軟嫩到幾乎唔使嚼，咽落肚仲留返陣淡淡奶香，單係呢碟就值回票價！
燒鵝肝多士真係「邪惡」到痹，一份2件，厚切鵝肝煎到半流心，用叉一壓就滲出油香，墊底嘅多士口感似蛋糕，烘得超脆，一啖咬落去，脆、軟、滑三種口感夾埋，油膩感被多士嘅麥香中和得岩岩好。
蔥燒厚切牛舌亦好有驚喜，厚切牛舌燒到邊位微焦，咬落彈牙得嚟又唔韌，蔥粒嘅辛香完全滲入肉紋，嚼嘅時候滿口鮮味。
最後嘅牛骨髓石頭鍋飯簡直係靈魂！熱辣辣嘅石鍋將飯粒逼到粒粒分明，底層仲有金黃脆卜卜嘅鍋巴，挖一勺融化嘅牛骨髓拌飯，綿密得似奶油，連埋脆鍋巴一齊食，口感層次超豐富！
仲有醬油蝦鮮甜彈牙，蝦頭爆曬膏，白飯小偷名不虛傳！泡菜煎餅外脆內軟，不過太飽食唔晒！最後飲返杯冰凍菠蘿梳打同青瓜青檸梳打，成餐飯好完美，個肚飽到一個點！仲想下次帶埋屋企人再嚟！
