大和堂咖啡店

大和堂所在嘅騎樓式建築，已經有100年歷史，超古色古香。

作為一個懷舊控，成日會遊舊區～而九龍城就係我其中一個出沒蒲點～
今次我就去咗有百年建築歷史嘅「大和堂」咖啡店！呢度位於九龍城衙前塱道，建於1920年，係典型嘅廣州騎樓式建築。

保留藥行舊物，重新活化，現在嘅咖啡店融合咗新舊元素。

「大和堂」前身係賣蔘茸中藥嘅藥行，經歷三代人，1940年，有「再世華佗」之稱嘅鍾伯明醫師開始係度主診，後來由長子鍾福明接手，直至2012年兩代醫師去世，由親戚改為藥材行，2017年正式結業，先輾轉活化成懷舊咖啡店。喺度飲咖啡，仿佛登上時光機，店內盡是古色古香嘅百子櫃、鐵閘及金漆牌匾，感受濃濃嘅老香港情懷。

店內食物中西合壁，加入唔少廚師巧思，味道別樹一格。

​喺食物方面，呢邊都提供好多中西合壁嘅美食～今次我order咗佢哋招牌牛肉漢堡、鴨肝菠蘿油同埋玫瑰鮮奶咖啡～

不愧係招牌菜，香脆包皮配Juicy牛肉，一個字，正！

$138

呢度牛肉漢堡真心掂！先講吓個包皮，經過烤烘，包皮好酥脆，有點似豬仔包皮！內層搽滿牛油，好邪惡！❤️至於漢堡牛肉，紮實而厚，肉汁豐腴，同半熔芝士食，食時一口口幸福感😙而且呢邊薯條配我至愛嘅松露醬及茄汁，厚切啖啖肉，點醬汁食，正！（我仲追加多個松露醬呢！）😙

1

菠蘿油一啲都唔油，好香桂花味，不過份量比想像中細，唔多抵食。

$78

至於最得意嘅食物，莫過於係大和堂菠蘿油！咪睇佢個樣同普通港式菠蘿油一樣，實際味道並唔平凡！外層係自家製牛油麵包，入面嘅「厚牛油」先係戲肉，係由桂花酒浸泡的鴨肝製成，食上口唔止膩，仲有濃濃桂花香！😌不過，大和堂菠蘿油size較細，基本上兩啖食完，價錢卻要HK$78，味道雖唔錯，但感覺唔多抵食。​

古色古香嘅杯子，洋溢懷舊氣息。

$44

作為Cafe，大和堂做嘅咖啡都唔錯，玫瑰鮮奶咖啡香醇濃郁，質感較豐厚，帶少許堅果香（反而玫瑰香唔出），好易入口。飲完個底會見到「和」字，感覺好搞笑😂

仁心仁術心型鏡牌，係店內必影嘅item！

有機會大家一定要嚟試！不過咖啡店位置有啲僻，而家因為疫情關係，有時會早收，嚟之前最好打個電話confirm一下。另外，佢哋入座60分鐘就要交枱，對於想嚟Hea下、休閒嘅人就未必適合啦。