京都一の傳 (已結業)

話說阿頭請食飯，所以揀左依間新開既日本野，聽講係日本以外第一間既海外分店，岩岩開業仲有日本總廚坐鎮，就等我試下係咪真係咁堅！舖頭既裝修幾有氣派，係高檔日本餐廳既感覺，佢晚餐既餐牌都係一樣既懷石料理套餐，只係個主菜選擇唔同，咁我就揀左依間餐廳最出名既銀鱈魚西京燒！首先上既係前菜八款盛合，擺盤好精緻，店員特別講解其中一款望落似豆腐既唔係豆腐，而係用芝麻粉整成既一款前菜，食落幾特別，口感似再腍身少少既羊羹，仲有淡淡既芝麻香！炙燒和午壽司好高質，食之前由店員係面前親自噴上醬汁，再用火槍去燒，令到和牛有少少焦香，和牛入口即溶，值得推介！不過到我最期待既銀鱈魚西京燒，第一啖食落竟然有椰子味，感覺有D怪，魚既肉質就正常水準，可惜溫度唔夠，只係微暖，整體感覺好一般！值得一提係依度既米飯，好有飯香同帶有少少煙韌，好食到食完一碗會再添！