濃姐茶餐廳 (裝修中)

去開新蒲崗，最常返兜嘅茶記肯定係濃姐茶餐廳，無他，因為價錢夠平，選擇夠多，姨姨仲非常 nice。我最鍾意啲茶記提供 All Day Breakfast（即下午茶時間都可以叫早餐），去親多數都會叫。記錄下最近三次幫襯：第一次食沙嗲牛肉麵拼雙腸奄列方包，第二次食原條炸魚柳 + 火腿炒蛋 + 茄汁焗豆 + 牛油方包 + 公仔麵，全部簡簡單單，大件夾抵食。呢度嘅奶茶奶滑茶濃，冷熱都好飲。第三次夜晚嚟到，食沙嗲牛河，雖然沙嗲味唔算濃，但係配料（牛肉，紅椒，青椒，洋蔥等）非常多，加上足料中湯，呢餐又係好滿意。