下午茶menu好抵，主要都係番茄湯冬蔭公湯清雞湯配公仔麵米粉通心粉，配小豬扒雞扒手撕雞扎肉等等，加$8有份腸仔+炒蛋+多士，優惠價可加小食，配熱飲，可加錢飲凍飲/特飲。
最鍾意食香茅小豬扒冬蔭公公仔麵
冬蔭公有時比較辣有時就中等
小豬扒唔硬，冇乜肥膏，好食
$8嘅炒蛋+腸仔+多士，好抵，一定要加
優惠價配小食
春卷3條 $12
齋春卷，只有紅蘿蔔絲椰菜絲咁，但炸得好脆又唔油，入面料都多，滿滿菜絲
小食$16 5件香茅小豬扒
冇浸落湯度仲脆口，乾身啲脆口啲仲好食，又唔會好乾
$12 2隻香茅雞中翼
泰式凍奶茶，好香濃，同港式真係好有分別，值得一試
我最愛就泰式凍檸茶，冇檸檬唔洗吉檸檬，係用新鮮青檸汁
menu仲有好多其他嘢食，例如船河、炒粉麵飯、咖哩飯、炸魚柳、海南雞飯等等。
另外服務好，一入嚟每個有見到你嘅店員都會同你打招呼歡迎光臨叫你隨便坐，走個陣都會有店員多謝你再見。
連經理都會落單同送餐，唔會扮睇唔到你。
冷氣夠，坐得舒服，枱之間夠距離，平日可以慢慢食慢慢坐都冇人趕，慢慢飲杯野飲玩下手機睇下劇都得。一個人想坐4人卡位都冇問題，試過冇晒卡位得番6人卡位都可以照比你坐，唔係滿座都唔會要你搭枱。
