貓耳朵

前日同朋友滿懷期待去試咗呢間新開餐廳🍝點知室內滿座，店員友善咁問：「坐戶外得唔得呀😊？」 我哋望一望門口——見有兩把太陽傘☂️同一部大風機💨坐鎮，心諗：「都幾周到喎🤔 」，於是欣然接受呢場「戶外浪漫體驗🥰」
點知呢份浪漫，有效期限只有五分鐘🥲。我哋坐低唔夠五分鐘，戶外區都迅速滿座。太陽都出埋嚟陽光猛曬🌞，遲我哋五分鐘入座嘅最後一枱客人，竟然獲得店員主動為佢哋開太陽傘🤷🏻‍♀️ 我哋見把傘完全遮唔到我哋，於是立即舉手示意🙋🏻‍♀️，指住身邊嗰把遮問：「唔該可唔可以開埋呢把？」店員聽完，淡然吐出五字真言：「呢把開唔到🙂」再補一句：「開咗會撞到果一把🙂」
就係咁，我哋算係相對早坐低嘅戶外先驅，瞬間變成相對可憐嘅日光下棄嬰🥲當時拎籌嘅人已經愈嚟愈多，不斷有人喺我哋張櫈同背脊之間擠過😓 而我哋就咁坐定定，喺正午太陽直射之下，無數次被人踢櫈腳，口乾乾，冇水飲🚰、冇嘢食🍽️，連一粒前菜都未見過，進行一場純粹嘅手工製光合作用☀️。作為起身後第一餐，我滿心期待嘅係溫暖食物🥣，點知換來係紫外線同路人嘅目光——成個過程漫長到讓我重新思考人類與植物嘅界線🤔
而隔籬枱，被風機眷顧嘅幸運兒，由頭到尾喺涼風送爽下談笑風生，好滿足咁食完佢哋完整嘅午餐施然離開🥲。我哋呢？我哋睇住遲我哋五分鐘入座嘅人有遮有陰，而我哋只有陽光送暖同等待😞 但與此同時，隔籬枱嘅勇士見到幸運兒離開，立時戰步向前🏃🏻‍♂️調節風機方向，我哋先從光合作用間驚醒過來，原來風機係可以郁嘅😲 但我見到佢啲汗濕透咗成個背脊🥵，我都唔忍心特別再郁部風機，由我哋呢個棄嬰繼續承受陽光嘅溫暖啦🌞
光合作用咗一陣，終於等餐飲，然後再一輪光合作用🙂，先有前菜小食上枱，我哋已經由飢餓進化到「靈魂出竅狀態😶‍🌫️」。
餐飲
凍美式咖啡☕️：口味強酸
冷泡茶🍵：口味澀
試圖同特別方法拉扯返我靈魂返嚟😪，但其實將我哋飛往太陽嘅靈魂扯咗返嚟嘅，係餐廳「驚喜」不斷嘅食物🧐
燒粟米🌽：完全冇味。粟米本身嘅甜？燒過嘅香？唔好意思，我食唔到…
餐湯🥣：水開稀到以為自己飲緊帶色暖水
泰式青醬羅勒大啡菇吸管粉&藍青口煙肉菠菜忌廉汁寬帶麵🍝：個手工意粉其實唔差，但淨係個意粉唔差，其他全部都差🖕🏻🖕🏻
一碟就青醬淡，唔夾羅勒同啡菇；另一碟就青口雪味濃，忌廉汁稀似水，浪費咗個麵。
佢哋將唯一做得唔錯嘅意粉，配上一堆災難級安排，結果就係——樣樣都半桶水，伏伏齊鳴😩

最精彩係，當我哋終於食完（或者叫「完成進食動作」）準備埋單💸，先見到隔籬枱（即係後來自己出手轉風機嗰位勇士）嘅意粉終於送到🥲。換言之，我哋曬足全程先有得食☀️，佢哋就等足全程先有得食⏳——大家時空交錯，各自修行，相當禪意。
至於點解冇相？我部手機一早熱到自動熄機👋🏻，而我本人，亦已進入光合作用後嘅虛無狀態😶
總括嚟講，今次體驗讓我頓悟🤔：
1.原來人真係可以透過唔食嘢只曬太陽而獲得能量🔋
2.原來我對食都有要求🤨