雞爺海南雞

印象中香港仔好似只有一間海南雞專門店，今日就試下呢間雞爺海南雞，知道佢下午茶平少少特登下午茶嚟，平咗十蚊雞一個飯，好，二話不說就食個招牌海南雞飯，下午茶可以加12蚊加多個小食，整多個泰式鳳凰雞丸，例牌凍奶茶走甜，海南雞飯嘅份量都算ok，黃油飯都係有水準，而核心嘅甜酸醬都做得非常唔錯，一啲碟頭青瓜蕃茄都比足，雞皮係少少彈牙嘅，算係做足本分，雞肉都幾滑，以一間專門做海南雞飯嘅餐廳嚟講，係合格嘅，小食就普通啦，普通嘅炸物，凍奶茶老實講就同出面茶餐廳畀差少少，不過應該飲啲特色飲品嘅，個人喜好凍奶茶啫，如果有機會經過香港仔都係一個唔錯嘅海南雞選擇…查看更多

喺香港仔返工返咗差唔多成年時間,早餐來 來去去都係茶記,老麥,再唔係去飲下茶嘆 一盅兩件,真係食到嘔知食乜嘢好!今日泊底架車行落舊街果邊見到雞爺有有個 職員喺門口拉客話有早餐,望下個餐牌見到 又價錢ok就入去試下!其實雞爺我都唔係第一次食，之前食過幾次下午茶都覺得勝價比高，味道算中上，今次佢個早餐真係誠意十足，一碗泰粉+1個餸同多士+凍飲都係$38，真係抵過茶記同老麥，我今次叫豬頸肉金邊粉+太陽蛋，雞蛋煎得靚有脆邊，厚多士夠熱夠鬆脆有牛油香，豬頸肉燒得好香，湯底我覺得冇下午茶時間咁鹹我中意，奶茶我覺得好飲過附近嗰啲荷X活同金X！最重要本身今日冇諗住寫食評，但店員講開原來早餐啱啱先開始做幾日，而家生意好難做唯有變通下，所以希望我寫既真實食評幫到小店生意可以繼續生存！…查看更多

心思思去咗香港仔嘅雞爺，試咗佢哋嘅海南雞飯，外賣自取。包裝算唔錯，飯、雞、醬料分開裝，唔會一攤就爛晒。打開盒一刻聞到陣陣香味，白飯粒粒分明，唔會濕到一pat。雞肉方面，斬件厚薄適中，肉質嫩滑，皮下有啲雞油香，但唔會覺得膩。重點係冇雪味，證明用料新鮮。醬料有泰式酸辣醬同甜豉油，兩樣都係自家製，唔係用現成樽裝嗰啲，值得加分。另外服務態度一流，尤其係短頭髮嘅女士，清晰介紹本店招牌海南雞飯，貼心詢問客人需要。份量嚟講，一個人食啱啱好，如果係大食啲可以加多飯。價錢方面，性價比ok，唔算平，但以質素嚟講接受到。唯一要挑剔嘅係，外賣盒用膠盒，焗住啲飯有少少焗氣，如果用通風啲嘅包裝會更好。…查看更多

心血來潮，來到香港仔食午飯，叫左一個海南雞麵，一個海南雞飯，雞好食，油飯好香，但服務上有待改進，有一位上左年紀的頭髮女士，同我們落單時，我地已經覺得佢唔耐煩，問多佢幾條問題，佢都好似唔係好想答咁，今時今日既服務態度，為何可以這樣，雖然佢帶左口罩，但見到佢已不喜悅的眼神，其實做服務性行業，都明白佢地辛苦之處，之後佢拎碗麵埋來時，啲湯不小心跌左落我條褲度，佢見到就咁走開，但有一位四眼男仔，佢好快速見到，即使那張紙巾俾我，同我講唔好意思，為何一名服務員，不小心整到我，沒有講對不起之餘，仲要其他同事幫手處理，我覺得真係好好笑，但無論如何，食物係好好食，但這名女士真係要好好處理自己的工作態度，如果唔係，老闆真係多得佢唔少😂😂幫手趕走哂啲客…查看更多

行過，路過，唔好錯過心諗唔知食乜好，咁啱行過見到個價錢，都有D考慮，會唔會好細份？抱住試下無壞嘅心態，點知就中招估唔到咁好味，海南雞起哂骨，啖啖肉又夠滑油飯夠乾身，食落有少少椰香味，豬頸肉亦烤得香口，加配$12木瓜沙律夠脆口，唯獨撈檬唔夠凍，有少少暖影響左口感！$18無骨鳯爪夠入味，一飯一檬，兩小食兩飲品，加埋都無$142，性價比超高，下次去要試下青咖喱同冬陰公粉，睇到隔離枱食，睇落都唔錯，以後喺香港仔又多一個飯堂…查看更多

香港仔食肆種類五花八門，唔怕冇啖好食，而雞爺海南雞非常值得推介，基本上八成食客都係叫海南雞飯，有老火湯送，加多幾蚊有埋餐飲。海南雞非常嫩口，亦唔多骨，油飯就不過不失。餐廳嘅外賣機不斷有新訂單，證明餐廳非常受歡迎。…查看更多

食到悶死香港仔。突然來了一個爺。不賣叉燒不賣鵝。海南雞飯最耍家。飯如小山份量足。擺盤美麗似朵花。雞鮮肉嫰入口滑。不是老柴考門牙。層皮唔食都讚下。顏色黃澄似城巴。人人忽略一碟醬。此店留心要大誇。帶酸微辣好好味。誠乃味覺嘉年華。招牌雞隻確係正。其實撈檬都唔差。九成滿座下午茶。價錢實惠請阿媽。可惜冷氣唔多夠。人齊時段有點怕。檸茶冰塊比較少。幾分鐘後變暖茶。冷飲飲筒是紙造。時間一長便糊化。飲來飲去飲唔到。一杯檸茶把幾火。款式有限少選擇。專心造雞無其他。客服勤快有笑容。有碗話碗非亂車。容易執笠香港仔。望你運氣好一些。…查看更多

十分欣賞間海南雞店！份量好大，今日咁啱經過，嚟呢度食下午茶！海南雞肉嫩滑，下午茶有好多選擇每碗只係30至$40 ，非常抵食，熱飲加兩蚊，凍飲加$4！而且店員服務非常好！唔怪得見到咁多街坊嚟食麵底方面，免費可以轉檬粉、河粉、金邊粉、米線，超級多選擇！今次同朋友食咗撈檬同埋冬陰功湯底，撈檬就正常發揮，冬陰功湯底有啲驚喜！濃烈嘅冬陰功風味，真係好似去咗泰國咁，而且唔係好辣，帶一啲甜味！湯底濃郁，但小辣，食得出廚師好有心機烹調🤭…查看更多

香港仔lunch已經食到冇嘢好食，最近新開左一間海南雞飯，就試一試食😀餐廳裏面有啲迫，繁忙時間並未必會有位，都要等一陣⋯⋯基本上入到去餐廳裏面七到八成人都係食緊海南雞飯！佢有分lunch同下午茶時段，明明都係同一個Menu，由於公司固定食飯時間，所以我要俾貴啲😣油飯係粒粒分明嘅，油香亦都好重，軟硬亦都係適中；海南雞都非常滑嫩，熟嘅程度係啱啱好，冇骨亦都頗大份，泰式辣醬同埋啲油飯係非常之夾！整體嚟講，係我食過最好食嘅海南雞飯！…查看更多

行過見到有間新嘢就走咗入去試吓.1)海南雞OK滑,不過個飯好乾,冇雞油.2)青咖哩居然冇得選雞已經喺失敗咗一半,選豬扒,塊豬扒炸到過哂龍,變咗舊柴,青咖哩一D都唔似青咖哩,好差.…查看更多