假期同家人去饮茶，去咗间以为系新嘢嘅《真味鲜厨》，望到啲餐牌，cher！海港集团嘅！本身对海港嘅印象都唔系话太好，佢嘅食物质素嘅落差可以好大，今餐可以好好食，会期待下一次，但再次帮衬时，就差到唔想再帮衬，所以都冇话佢呢间唔同名嘅茶楼抱有好大嘅期望，但不来也来了，就睇下系好定差。我地点咗分几次点咗14样点心，最后嚟得13样，其中一样问咗两次都系有落到单，真系摸不著头脑。我哋最后食咗黑椒金钱肚、香煎萝卜糕、蟹籽烧卖皇、潮州粉果、蚝皇叉烧包、家乡煎薄罉、鲍汁凤爪、翡翠虾饺皇、刴椒蒸鱼云、黑椒牛仔骨、金沙银萝肠、生滚鲷鱼片粥、大豉汁蒸排骨。呢13样嘢，「蟹籽烧卖皇」我真心觉得最唔好食，呢个系佢整得唔好食，佢冇猪肉味之余仲要系有阵唔知咩味，酒味？定系啲肉变咗？感觉又唔似，同埋佢个皮系瘀瘀黑黑咁，一啲生气都冇。另外一个我觉得唔好食嘅系「潮州粉果」，呢个系我唔喜欢佢个味道同质感，就同佢本身嘅制作无关。其他11样系正常嘅点心嘅味道，要讲惊喜嘅系有四款我一响唔食嘅两款点心，一个系「凤爪」，好少可觉得啲凤爪好饱满同好有骨胶原；第二个系「刴椒蒸鱼云」，我一向唔食咁多骨嘅嘢，我只系试下味，但最后有一半系我食哂。佢做到好惹味，虽然鱼云一定系多骨，但佢嘅香味系好难令人抵抗，有啲想知佢个汁系用咩嚟整；另外一个赞嘅系「金沙银萝肠」，虽然佢有啲似炸两，但味道系唔同，佢系用肠粉包萝卜嘅春卷！ 萝卜粒清甜，加上春卷酥脆，而且份量都唔少，实在系好夸张。第三样系「生滚鲷鱼片粥」，咁怕食鱼嘅我都觉得味道唔错，鲷鱼片有好多块，仲要好大块，肉质好爽同埋冇乜骨，呢个真心赞嘅。叫咗咁多嘢，谂住都唔平，连茶钱加一，埋单只系$403，比我地想像中平好多。…查看更多
