東海滬 (已結業)

年底有不少家庭聚會，而這一次是為了兒子的生日，一家人齊齊整整就近父母的住處美孚食個 Sunday lunch。兄長提議了位於第4期平台的《東海滬》。執筆時，查了資料，原來在不久之前結業了。但都努力地介紹一下，回味一下吧。《東海滬》，一看名字，就知道是一間上海菜，也知道是《東海飲食集團》旗下的餐廳。位於美孚新邨住宅的平台上，若不是美孚街坊，外來人的確唔會識得搵上黎。 我們的午餐聚，應該是一個套餐吧，由冷盤開始，有醉雞。酒味沒有過份的濃，可以食到香口的雞肉雞油味。再加上雞件雞皮十分之嫩滑，酒味亦沒有搶走雞的味道，很不錯。 四喜烤麩，唯一令我覺得不太好的，就是不夠汁。不過，其實這烤麩已經把應有的汁盡吸，有醬味有甜味，很上海的味道。 海蜇頭青瓜的海蜇頭非常之爽口，微微的辣感包裹住青瓜的清新口感，是一個可口醒胃的餐前府盤。 干扁四季豆夠辣，炒得非常之香口。作為一個一個不折不扣的香港人，我好想用黎撈下飯呀! 黃金蝦仁，是原隻鮮蝦炸出的美味食品，香口的美食，小朋友最是開心。 糖醋肉排，甜甜的，粒粒充滿了肉。同樣，是一個會令小朋友極開心的食品，而且，配上飯，這糖醋肉排會更加之好食。 肉絲炒粉皮，是一個熱食的粉皮。很少會想到叫熱食的粉皮，原來熱辣辣，帶點咸香地去食這東西，也是很好吃的。 雲吞雞，是一個老少咸宜的江南美食。茶肉雲吞加上大白菜，放入濃濃的雞湯內煮，香口，香滑。 飲雲吞雞湯，當然要食埋隻雞啦。平常煲完湯，隻雞要點豉油先會好食，但是日的雞，就咁食，沾一沾湯食，更是好味道。 叫了個蛋白炒飯，青茶加蛋白炒飯，輕輕地有鹽味帶出的咸香，味道不重，感覺健康。 食上海菜，點少得一包一貼。京式鮮肉灌湯鍋貼，是一個很正宗又很美味的鍋貼。更特別的，是鍋貼充滿了肉汁，說是灌湯鍋貼我完全同意，因為咬開鍋貼，鮮味的肉汁直頭爆出來。 灌湯小籠包，是皮厚的那一種小籠包，也是我最喜歡的那一種。皮厚，有質感，咬落香口，而且有肉汁的味道滲進了餃皮的內則，當然，也有爆汁的感覺啦。 場地不大，而且地點寧靜。這《東海滬》，其實是一個宴請朋友的好地方。…查看更多

同阿媽慶祝生日，總共有成17個人。諗住開兩枱叫兩個八人餐在睇吓加啲乜嘢食。可惜佢已經冇做呢個套餐喇！但是侍應話可以將六個人餐嘅價錢÷6乘返八做返一個八人餐嘅份量。但係嘢食睇落去嘅吸引力不大,所以決定散嗌。頭盤叫咗呢幾樣，流心蛋不錯，醉雞就無酒味。鍾意食上海粗炒同埋炒年糕，侍應有提我地上海炒年糕同上海粗炒嘅味道會一樣，所以建議我哋年糕用雪菜炒。食到最尾覺得唔夠仲要加多個炒飯。叫咗香酥鴨佢有面皮俾我哋包，但始終唔明白點解呢個餸嘅鴨係有骨😅 點心方面叫咗小籠包同埋生煎包。酸辣湯冇得一鍋上，只可以一碗一碗咁叫。但呢個酸辣湯真係又唔酸又唔辣囉由於都係唔係幾夠食所以叫咗個生炒骨。甜品冇叫因為自己又準備蛋糕，而侍應都好主動話幫手同我地影大合照同正宗上海菜一樣每碟嘅份量都唔會好大，所以叫咗好多野之後都仲要加炒飯同埋生炒骨。…查看更多

經常光顧，水準每次都係好穩定。今次幫朋友慶祝生日，冇影到相😅，叫咗：醉豬手（夠酒味，爽口）醉雞（夠酒味，但今次雞唔夠新鮮，有少少梅左）肴肉（好味）四喜烤麩 （味道可以，細碟咗d)素鵝（味道適中）海蜇頭（海蜇少咗啲，配菜青瓜就好多）雞絲粉皮（醬料粉皮都OK嘅，雞絲較少）小籠包（皮薄湯濃，好味）生煎包（好多汁，味道好味，但包唔夠彈性）銀絲卷 蒸同炸 （冇咩特別）回鍋肉 （好味）鹹肉津白（津白太少，仲要好散，賣相唔得，好似一碗普通烚菜咁）上海粗炒（唔夠鑊氣，配菜太少，似醬油撈麵多D）擔擔面（香濃油唔算多，麵唔夠彈牙）雪菜肉絲拉麵（味道適中，拉麵唔彈牙，好普通）蟠桃壽桃包 （好好味，蛋黃流油嘅）…查看更多

最近愛上吃擔擔麵和小籠包，今天到了東海滬吃飯，一看進去，感覺待會會有吃裝潢的感覺。言歸正傳，今天也就只點了擔擔麵和小籠包，先說擔擔麵。這麵有點過辣，不是太吃得到芝麻醬的味道，也不是太見到有肉燥，味道不算差，就是不太對胃口。還有就是小籠包，這個好吃。皮薄多湯，讓人想要多叫一籠。…查看更多

今日中秋節同屋企人食飯，加上同個仔慶祝生日，Book左六點鐘食飯，六點前到都要等到六點幾先入得去，七點幾就話last order 唔俾再叫嘢食，然後叫我地八點前要走。我問佢你遲咗比我地入，都要遲D比我地走。侍應態度好差，話佢八點鐘有班客都要入嚟，一定要我哋八點鐘走，最後我哋都唔想再同佢理論，費事令到自己勞氣。我哋走嗰時隔離果張枱又同嗰個侍應爭執，最後佢哋同經理投訴，仲嬲過我地好多。以後都唔會再去，貼錢買難受。…查看更多

之前跟好友來過位於美孚新邨的東海滬晚餐，平日晚上收工搭西鐵由元朗出來大約廿分鐘，六點半左右去到的我做咗第一枱晚餐客(^_^;) 本身在open rice訂咗枱，一入到才知道套餐冇得減$50，但我個人想食醉雞，所以沒有叫套餐，只是散叫~~~廿年雕皇醉雞($68)係我每次都會叫的前菜，今次好友想試棒棒雞絲粉皮，花生醬的配搭，吃了感覺不錯~~~ 嫩雞煨麵($50)係昕昕至愛，如果她在場，一定跟我爭住食~~~ 上海灌湯小籠飽($40)每次必叫，皮薄多汁，真係好想食多D~~~ 東海招牌壽桃包($22個)，難得好友生日，當然叫壽包來慶祝~~~ 薑茶湯丸($28)，個人最喜歡的黑芝麻湯丸，其實叫呢個甜品係為咗食夠$300報東海小廚師點心製作班，本身活動報名費要$38，只要在東海集團食肆惠顧滿$380就可以用$150報名，今次連埋報名費用了大約$480埋單，感覺呢餐真係抵咗~~~ 雖然用唔到Openrice減$50的優惠，但報到自己和昕昕喜歡的點心班係值得的=]…查看更多

要食好嘢一定要識揀，今日家姐生日，我帶咗家姐，哥哥各一家去美孚食上海菜，我哥哥住在附近都未去過，有好嘢我一定要介紹，環境舒服食物招呼小籠包皮薄餡靚又多汁，我一個人都可以食二籠必食甜品燕麥芋頭一試難忘，熱辣辣，香噴噴必食還有酸辣湯簡值到其實我哋今晚都食咗好多嘢，都不能盡錄，總之就係好…查看更多

早前去了美孚探朋友, 並在佢介紹下去了附近的東海滬食飯. 這裡除了單點外, 仲有套餐. 我地覺得套餐抵食, 便點了一個二人餐. 江南涼菜三選一, 我地選了揚州肴肉. 湯羮三選一, 我地選了宋嫂魚羮. 小菜有成二十款, 選二個, 我地選了葱爆牛肉和雪菜毛豆百頁. 點心兩選一, 我地選了素花蒸餃. 揚州肴肉是我最愛的前菜. 肴肉面是一層像啫喱口感, 內裡的肉帶有咸香. 宋嫂魚羮. 湯最基本夠熱, 這個啱晒我. 材料也相當豐富, 口感十足. 葱爆牛肉. 上枱香味撲鼻. 牛肉夠稔身, 入口有淡淡葱的香味. 這個菜式較為惹味, 與飯一齊食係最好不過. 雪菜毛豆百頁. 點了一點濃味菜式, 點番一款較清淡的菜式. 百頁本身帶有豆香味, 味道偏淡, 配上較重味的雪菜, 味道剛剛好. 素花蒸餃. 包得夠精緻. 味道調教適中. 這個套餐只需要$208, 真係好抵食. 最後點多了一個甜品, 就是金陵驢打滾. 入口煙煙韌韌, 饀料甜度適中, 非常好味.…查看更多

如熟識美孚的話，應該知道雖然美孚新邨內的餐廳大大小小有很多間，不過在選擇之列內而又吃得落口的，十隻手指也數得出 (應該也多給了)。回家才知無飯食，唯有出外用膳。想吃上海菜，而美孚的上海菜餐廳只有4間(不計曼克頓那間): 平台那間並不是考慮之列，另外兩間只提供麵食，最後一間就是東海滬。之前屋企家庭飯局也到過，家人的評價也不錯，於是晚飯就選擇這家。 東海滬位處美孚廣場3樓，經屋苑平台走過去極為方便，經商場的扶手電梯上去也可以，不過就要多走幾級樓梯了。 不論店內的環境與衛生，都比同屋苑內的餐廳酒樓都要舒適乾淨，假如跟樓下那間"富X"對比的話，情況就如天堂與地獄啊! 7點仍未到正式食飯時間，可以安排我們坐卡座，不過7點半過後就幾乎滿座了。 餐牌選擇跟款式都很多，有散叫也有套餐，不用傷腦筋的可以點套餐，而且價錢以中菜來說不算貴，比起吃西餐還要經濟實惠，不過晚市就要算上茶介來，每位$12。 二人餐也有兩個選擇，具彈性而又划算一點的，可以選擇東海滬二人餐 $208，套餐包括有涼菜、湯羹、小菜、點心，以這價錢又可吃到不同款式，也很不錯呢! 江南涼菜三選一涼菜選擇有: 揚州肴肉、雞絲粉皮、手拍青瓜，最喜愛的雞絲粉皮當然是首選。 炎夏天氣又是冷盤出場的時候，以雞絲、青瓜作佐料，伴上香濃幼滑的麻醬與粉皮混和，簡單開胃又透心涼的消暑菜式，自然是受歡迎。 嫩滑雞肉沒帶有雪藏味，夾帶青瓜的清新味道，清爽不油膩；粉皮厚薄適中，且帶有冰涼感；麻醬稀稠度適中，沒有太濃而搶去味道，若然份量再多點，令粉皮更均勻地沾上，效果會更是理想。可口味美得令人吃極不厭，只是二人份量，不太夠喉而已。 東海滬點心二選一點心選擇有兩款: 灌湯小籠包和素花蒸餃，小籠包當然是吃上海菜的必然選擇。因為是二人餐關係，所以一籠只有兩隻。 剛剛蒸起非常燙手，雖然餃皮摺疊賣相不甚是漂亮，但總算是搓得頗薄身，夾起時也要格外小心，以免湯汁流出造成浪費啊。 咬破少許餃皮讓湯汁流到匙羹中，先品嚐一下湯汁，鮮甜又不油膩，味道不錯。豬肉餡料份量也挺豐富，幾乎充斥整個小籠包，鮮嫩味香，蘸上陳醋調味更是惹味，很想多來一個呢! 平時吃小籠包蘸的醋汁多是加入薑絲，而東海滬則加入薑蓉，較特別的吃法呢。 湯羹三選一湯羹有: 酸辣湯、文思豆腐羹、宋嫂魚羹，加$48就可以轉為金肘花膠燉津白。落單時還以為只選一款，店員講解後才知道原來可以一人一盅，真好呢! 這個時期要多吸收魚類及花膠的營養，於是宋嫂魚羹、金肘花膠燉津白就各來一盅。宋嫂魚羹 湯羹的稀稠度控制得不錯，不似喝下厚身芡汁般。入口鮮甜，鮮味可口，加入少許陳醋，酸酸的味道更是好喝。伴隨的佐料有: 豆腐絲、冬菇絲、筍絲、蛋白花等，魚肉亦很鮮嫩滑潤，加上切得幼細，吃下感覺有點像蟹肉呢! 金肘花膠燉津白 食材也挺豐富，除了金華火腿和一大棵津白外，還有一大片的花膠。津白清甜入味，又不會燉爛，令外觀與味道取得平衡。 一大片的花膠燉得十分腍軟，很滑溜亦很有咬口，提升了湯的鮮味之餘，亦令湯頭充滿膠質，色澤也不錯，更沒有低級花膠的腥味，相信採用的品質也挺高。湯頭清得一點油膩也沒有，非常滋潤順喉，好喝啊~! 精選小菜兩款小菜有二十款選擇之多，篩選也要用上點時間，最後點了較為重口味的糖醋肉排和干煸四季豆。糖醋肉排 色澤紅亮油潤的醬汁，帶蕃茄的酸香，酸酸甜甜的更是開胃。肉排切得較大塊，有點像豬扒般，不過也挺入味，肉質也夠腍軟鮮嫩，酥炸過後加入醬汁的肉排表面仍帶點點脆口，加上份量不會太多，足夠二人分享。 干煸四季豆 四季豆因用油炸過，難免會泛有油光，幸好不算太油膩，吃下乾爽沒有草青味，帶焦香的爽脆，炒過的肉碎亦很惹味，增進不少食慾。雖當中加有辣椒，不過份量不多，沒有想像中的辣勁，加上鹹度亦適中，是下飯的一流選擇。 京式鮮肉灌湯鍋貼 $40/4隻因對兩隻小籠包不夠喉，於是多點碟灌湯鍋貼來滿足。 鍋貼看似包得很飽滿，一道道的摺痕清晰可見，鍋貼底部煎香了，不是特別油膩，微脆香口，皮厚薄亦適中，咬開內裡的湯汁也挺豐富，可跟小籠包媲美一下。豬肉餡多而鮮美細滑，輕輕蘸上陳醋也是好吃。 金陵驢打滾 $35最後點上這款京式的傳統宮廷甜點作終結。 兩件合併在一起的驢打滾，層次分明，糯米皮稍為煙韌了點，略為黏口，影響既有入口綿軟口感，也許是凍食的問題而導致，之前吃過的是熱食版本，比凍食來得美味呢。而微甜的紅豆蓉餡不會太膩，黃豆粉也灑得充分，撇除溫度問題，這碟驢打滾也是美味的。 難得美孚有間好吃的上海菜餐廳，真是值得慶幸，而且每道菜式都具有一定的水準，定價亦不算太貴，每樣均叫人滿意，這美味的選擇，不論是二人世界，還是家庭飯聚都是屋苑內的選擇之列中呢。…查看更多

今次去探朋友，朋友帶了我們食了間唔錯又抵食嘅上海菜餐廳，其實餐廳位置十分方便，在商場內絕對唔難搵！座位闊落舒適，見到都有好多街坊幫襯！朋友就話係佢嘅飯堂之一！今次食完後都覺得抵吃，所以想分享一下！而今晚就點了個四人晚飯$448，有江南京菜而當中六款可以揀兩款，而當中王牌嘅雞絲粉皮，彈牙煙韌，夠晒味道，而另外推介嘅糖心薰蛋亦係流心香滑，充滿煙燻嘅味道！而個湯就點了酸辣湯，材料十足，有彈牙冬菇條，嫩滑雞肉絲，爽口嘅竹筍，帶少少酸又帶少少辣，入口十分醒胃！而主菜從餐牌中選了三款，當然必吃嘅回鍋肉，肥美嘅五花肉，每塊嘅豬肉上肥瘦都差不多各佔一半夾埋爽口嘅椰菜，同埋入味嘅豆乾，入口非常美味！而另一個就係韮菜鱔糊，鱔嘅份量夠晒多，厚身肉嫩入口好有口感，韮菜爽口鮮嫩，加上個汁夠晒濃味道！第三個就係黃金蝦仁，用鹹蛋黃醬混埋蝦仁一起炒，本身蝦仁肉質彈牙鮮甜，加上了個黃金醬，個味道更佳！東海滬點心，就選了灌湯小龍包，小龍包皮薄，肉餡有口感，最緊要係充滿肉汁！始終大家都好吃得，加多個上海粗炒$65，煙韌嘅麵條，加埋香嫩嘅瘦肉絲，同爽口嘅椰菜，炒得十分好味！完全夠色夠味！…查看更多

同事租住美孚一段日子，喜歡了該地方的環境，索性上樓，近日成為業主，能在這個熱烘烘的樓巿下買樓，的確一啲都不簡單......當然我也一直夢想成為小業主，但這確實是一個夢想！？她新居入伙，去參觀一下也好，當睇下示範單位，發下白日夢也好。講明新居入伙，當然什麼也齊備，無法為我親自下廚，就帶我在附近覓食。老實說，我的確甚少入美孚，對這裏一點也不熟識，只好跟！今晚她帶我來到東海滬嚐滬菜，環境寬敞，裝潢優雅，感覺很舒適。大廳一邊設有一排馬蹄形卡座，座位闊落，坐得很舒服自在；另一邊則有幾張大圍枱，枱與枱之間有一定距離，空間感足。枱上放有四份餐牌，分別有兩份二至八人套餐、一份總廚推介和一本單點餐簿。我本看中豐富實惠的兩款二人餐- 滬江宴($268/2位）及東海滬兩位餐($208/2位)，但同事一心想吃海參，故最後決定單點。餐簿分別有主廚推介、冷盤、湯品、海鮮、肉類、蔬菜、點心、麵類、年糕、甜品和飲品，選擇不算很多。***********************宋嫂魚羹 Fish Pottage ($48)原盅上枱，熱度十足。湯羹透亮，稀稠度適中，見到幼細滑溜的豆腐絲、爽口的荀絲、蛋白花、蔥花 等，還有一些潔白的嫩魚肉茸，但魚肉的份量不算多。先呷一口湯羹，質感滑溜，但所加入的醋汁 較多，啖啖酸醋味，未能嚐到原有味道，可惜！***********************雲南翡翠 Braised Vegetable in Yunnan Style ($78)有四款蔬菜任君選擇，包括白菜仔、津白、小棠菜和筧菜，最後揀了較少吃的莧菜。一大窩，滿滿的。翠綠幼嫩的莧菜上放滿雜菌，還有蝴蝶形紅蘿蔔 點綴。雜菌 種類有三款，包括有秀珍菇、草菇 和鮮冬菇，全部保持爽口，但菇味一般，不過整體味道清淡，少油少鹽，很有益健康的菜式。***********************同事一早己看中的東北紅燒遼參 Braised Sea Cucumber ($168)一碟足足有六大件遼參，另配有爽口無渣的竹荀、爽身多汁的冬菇，還有爆香過的蔥段，若然灑些翠綠的蔥花裝飾下，賣相會吸引些。大大件的遼參 爽彈嫩滑，沾滿鹹香的芡汁，烹調入味，味道濃郁，如果用來佐菜飯就一流。***********************金陵驢打滾 Glutinous Rice Roll with  Red Bean ($35/4件）一客四件，擺放成蝴蝶形狀，挺精緻。每件驢打滾大小相若，能清楚看到層層糯米 外皮環繞著紅豆茸，相當工整，而麵皮外內均灑上黃豆粉，啖啖黃豆香。外皮黏粫柔軟，捲着香甜綿滑的紅豆茸，甜而不膩，味道和口感也不錯，難怪它原是宮廷點心，到現在仍能成為眾所周知的甜點。------------------------------今晚由同事帶領走入美孚覓食，同時發現這個地方也有不少食店，決意下次再獨自來覓食，或許會喜歡了美孚，不過喜歡又如何？休想成為這位同事的鄰居，相信打十世工也買不起。…查看更多

朋友早年移民加拿大，今個月返嚟香港放暑假，佢係上海人又係住喺美孚，所以我就揀咗美孚廣場三樓既「東海滬」:)我好少踏足美孚，都唔知道原來有間不錯的滬式食府。裝修時尚休閒、感覺既傳統又新派。四人套餐都係四百幾蚊，好抵食！我哋叫咗套餐再加啲特色小食，店員服務有熱誠，推介了招牌菜揚州肴肉肴肉其實即係豬肉，絕對係滬江既佳餚之一，要有一手精練的烹調方法，肉凍色澤紅嫩，很誘人吧！清而不膩，肉凍口感爽又帶煙韌，晶瑩剔透又薄又滑的豬肉凍。體驗真正上海味道，當然唔少得小揚多汁生煎包啦係我嘅”飛佛”點心之一。最吸引我的唔單止皮薄肉鮮，最最最緊要就係湯汁多到爆出來，底部仲煎成金黄色，非常脆口，果然上海福到春卷 $35真係食手工都唔止，極之講究的師傅手藝先可以做得好，店長說肯定第二道食唔到咁有空氣感又甘脆嘅春卷套餐組合有江南京菜，六款可以揀兩款，我梗係揀王牌嘅雞絲粉皮啦！同埋推介嘅湯羹，上枱熱辣辣的酸辣湯，入口順滑，筍絲條同埋豆腐有咬口。精美小菜有黃金蝦仁，蛋黃炒真係香到不得了，加上彈牙的蝦仁，好味到停唔到口以前屋企樓下有上海舖，每次去到一定會叫一個客飯，菜式就係韮菜鱔糊口味真係好似當年食嗰啲咁，夠晒懷舊又正宗。東海滬王牌點心，灌湯小龍包果然是滿滿的湯，好味道！最後當然係要食甜品啦！金陵驢打滾仲要兩份糯米皮很煙韌，難得的是甜度適中，老人家吃不會過甜，甜而不膩。味道跟口感都不錯！…查看更多

今日約咗舊朋友一行7人吹水飯局，所以要選擇環境舒適嘅地方，第一次試東海滬嘅上海菜。食物都係一般上海菜咁唔會太大碟，味道都唔錯，我地叫咗個四人餐可選擇3個小菜，兩款小食，一款湯羹。另外我地再加其他醉雞🐤，酸辣湯麵，黃金蝦仁炒飯，小食就加咗無錫脆膳，但味道怪怪，似炸膳皮多d,其他食物都幾好味。唔太貴，但又可以吹水成晚😄。但掛住傾計無幫食物影相…查看更多

老婆啱啱搞完個活動，所以，趁開心星期五就一於唔好煮，落街食慶祝吓，雖然話「落街」，但就由街頭行到街尾，因為我哋都較少行嚟美孚廣場、曼克頓山呢邊食嘢。今晚就專登試試「東海滬」，話時話，作為美孚街坊一員，都真喺第一次到訪。餐廳裝修幾骨子雅致，以杏啡色為主調，配以柔和嘅燈光，予人感覺舒服。靠窗對住屋苑平台一邊有啲馬蹄位，配搭帶點時尚。加上今晚客人唔算太多，環境顯得清靜，比起去隔離嘅富臨真喺好好多。主餐牌內先有「自我介紹」，了解到佢哋晌傳統上海菜式之上，都加入創意，期望做出物超所值嘅美饌。再翻開睇睇，有一大頁「主廚推介」，10款菜式配合圖片及文字介紹，確喺幾吸引，所以，我哋都揀咗幾樣嚟試試。其次，主餐牌內嘅類別分為冷盤、湯羹、海鮮、肉類、蔬菜、點心、麵飯、年糕、甜品及飲品。我哋是夜就以細細份嘅冷盤、點心為主，務求試多啲款式。順便就講埋其他收順俾大家參考！另有張不定期嘅總廚推介，叫「總廚」嘅質素喺咪仲勁啲呢？不妨作為參考。此外，亦提供2人、4人及8人自選小菜套餐（$208、$448、$888，另收茶芥加一），既實惠，又彈性，喺我覺得最划算嘅套餐。仲有兩款經濟套餐，分別喺2人或4人，定價非常親民，包晒冷盤小碟、湯羹、熱葷、點心、甜品，前者賣$268，後者都只不過$498，另收茶芥加一。豪少少又人多嘅，就不妨考慮6人或12人套餐，叫得豪少少就更喺菜式豐富啲，所用嘅食材又高級啲，如河蝦仁、遼參、鮑魚……等等，前者要$1,688，後者要$3,680，同樣另收茶芥加一。古雅嘅茶壺，盛載嘅香片很有茶香，配合今晚我哋以小食、點心為主，猶如飲夜茶。順帶一講，茶芥每位$12，另加一服務費，就當然飲多兩啖香茶。慢煮煙燻溏心蛋（2隻） $30煙燻蛋、溏心蛋都喺鍾意嘅食物，因為唔難做，但做得高水準就唔易，東海滬嘅煙燻溏心蛋真喺掂，睇半凝嘅蛋黃已頗對辦，放入口嗰種黏綿溏心感好稠密，蛋味凝香，隨後嘅煙燻味好似爆發咁湧出嚟，雖然形容得有點誇張，但堅好食。香煎素鵝 $52雖然被列為冷盤類，但碟素鵝喺微暖，腐皮咬落十分甘脆而不膩，內裡嘅甘筍絲、冬菇絲增添口感。揚州肴肉 $60啲肴肉切成菱形，再排成花狀，賣相已經好有美感，再睇睇，下層嘅豬蹄肉佔嘅比例非常多，入口有種鬆化感，而上層嘅凍膏清爽有點柔滑感，整體做得幾有水準喎。乾隆文思豆腐羹 $48文思豆腐羹之所以出名在於顯出師傅嘅刀功，將豆腐切成幼絲喺其精髓，更加上竹笙、髮菜，雖然實物唔及餐牌中嘅相片咁靚，但都睇到豆腐確喺切到幼細如絲，而味道偏較清淡。宋嫂魚羹 $48對比個文思豆腐羹，呢個宋嫂魚羹我就覺得好飲啲，外觀跟文思豆腐羹幾相似，但入口有唔少嫩滑嘅魚肉，亦多一入鮮甜味。小揚多汁生煎包 $35通常食生煎包多數貪其脆底，但呢個生煎包就加埋爆汁，因為無諗過有咁多湯汁，所以就一口咬落去，差啲濺到自己。加埋鬆化有肉鮮嘅豬肉餡，同焦脆嘅包底皮，非常好食，不愧喺主廚推介嘅款式。山東香煎韭菜盒 $35又喺另一主廚推介嘅點心，加上喺素包點，就更合老婆心水。一客有2件，再一開二，扁圓嘅韭菜盒塞滿韭菜，入口真喺好有韭菜香味，此外，仲混有蝦米、粉絲、冬菇，口感極有層次；由於兩面都煎過，所以，底面都咁脆口。野菌素花煎餃 $40就老婆口味，點多款素包點，不過，又喺煎餃嚟。睇落好似無咩特別，細心睇其實佢啲摺紋包得幾工整，咬開一啖，啲餃皮薄而平均，配野菌一皮好食。最尾喺嚐甜時間，甜品都有7款供選擇，一口氣點咗兩款：金陵驢打滾及十勝紅豆宮廷豌豆黃，揀佢哋嘅理由好簡單，較特別，又少機會食，兼且亦喺主廚推介。金陵驢打滾 $35單睇個名真喺唔知乜嚟，幸而餐牌有特別介紹，不過，記得喺「樂天皇朝」食過，約一年前嘅事。本來想叉起一件影相，但層糯米皮太煙糯喇，捲起嘅紅豆蓉好清甜，沾滿黃豆粉，十分有特色。十勝紅豆宮廷豌豆黃 $35貴為慈禧太后鍾意嘅糕點，點都要試吓嘅。吸成小花型顯得精緻，上層以日本十勝紅豆做嘅紅豆糕，清甜有好濃嘅紅豆味，而下層以豌豆做嘅豌豆糕，有輕輕豆香，口感柔軟而綿密。對於今晚嘅冷盤、湯羹、點心，出品相當有水準，可謂互相輝映，我哋都食得稱心滿意，不過人少就未有機會試到多啲菜式，如海鮮、肉類、蔬菜、麵飯、年糕……等等，老婆已講定下次做節飯不如喺度搞:)。…查看更多

東海在美孚有這一家較新式的食肆，這天來試試。室內空間敞大，小桌反而不多，大桌不少，全家大細一齊來也可。鎮江肴肉，幾件菱形的對立，晶瑩細緻。湯凍在面頭，水晶一般，豬肉在底；醮點醋，酸香，以往不太喜歡肴肉，覺得太乾，這兒的則不太乾而肉味甚濃。小籠包，揭蓋出煙；皮薄滑溜，咬皮破洞，盡吸肉汁實屬快慰，內裏肉質也不錯。生煎包稍為遜色，雖說包帶肉汁，惟外皮或底皮不夠脆。皮不太薄，但要有厚度才能包著汁。雲吞雞半雞，原裝半隻在鍋內，員工替食客切開，試試雞肉，還有微香雞味，世間難求。湯濃熱燙，還有竹笙在湯中，吸湯味道不錯。荵爆牛肉，鑊氣頗盛，荵不少，甜味濃，牛肉不老，入味不覺鹹。金陵驢打滾，因外形似驢兒打滾而得名。綿綿的紅豆蓉，配上外層煙韌的糯米皮卷起來，吃時蘸上黃豆粉，入口軟滑(摘自餐牌，註：餐牌上這道菜的英文製法寫/譯得不錯啊。)味道偏甜，但以此甜點作結，體積小小，微甜，再喝口熱茶，不錯的收結。:)連牙籤盒子也顯得十分之傳統，很多酒樓，都只會將牙籤，印上酒樓的名字，然後用紙包着。這兒的牙籤盒子，就像大內密探零零發內，用來裝珍珠的珍貴寶盒一般。…查看更多