村爺爺龍蝦湯.泡飯.燉湯專家

营业中

休息中

友人同我去油麻地旺角行街，推薦話呢間村爺爺好食。行到門口，就咁望門面就覺得好似普通茶記，無咩特別，望入去環境都比較迫，但係就有成10個人排隊，令我有啲意外，令我諗呢間食物係咪真係咁好味，但食完真係覺得物有所值!兩個人分別叫佐花膠螺片雞煲同埋真<盛> 海鮮龍蝦湯泡飯。(1) 花膠螺片雞煲 ($68)  --> 人氣no.1!雞煲可以加$15轉套餐。套餐包一個飯，一碟菜加一杯野飲。雞湯非常清甜，有雞味，雞用刀一切開就切到，肉質嫩滑。除佐雞之外，螺片既份量十足，絕無欺場。呢個雞煲絕對對得住人氣no.1，唔怪得之咁多人叫呢個餐。(2) 真<盛> 海鮮龍蝦湯泡飯 ($168) 超大碗超級足料，絕對無呃秤。成碗飯既主角就係半隻龍蝦，啖啖肉既龍蝦食落非常爽口， 至於配角就係其他海鮮，包括魷魚，青口，帶子同埋蜆。 全部海鮮都有鮮味，啲蜆有差唔多10幾隻，份量好誇張。 成碗飯既精華就係個龍蝦湯，完全係一碗海鮮湯黎。一啖湯一啖飯咁樣食就係正到爆!最後我同友人將全部湯飲哂。值得一讚既係餐盤有濕紙巾提供，讓容人可以拆完龍蝦殼抹手。總括而言，餐廳咁多人排隊係有原因! 鐘意

有啲失望🤧 比起幾年前食 好似個味唔同咗🤷🏻‍♀️我點咗個牛魔王龍蝦湯泡飯 個湯底無乜龍蝦味 反而似打邊爐清湯底烚咗好多唔同嘅餸之後嘅味 唔知係咪因係個啲餸全部係牛啦🤔 不過講句公道說話 佢嘅餸係多嘅 “牛”製品都多同足嘅 除咗牛丸唔好食 肥牛片都ok ge 但佢啲飯真係好差😂 超級軟… 用一pat 黎形容 唔可以用一粒粒 唔知佢地係唔係落得太多水煮啦😅 未落入湯已經一舊舊…價錢唔算貴 不過就真係唔好諗住佢係龍蝦湯就無失望嘅

今日去左食呢間村爺爺，6點半去到都要排左5分10分鐘先入到去。入到去啲位就比較窄，如果有一袋二袋就要小心啲。我哋叫左極上海鮮龍蝦湯泡飯同鮑魚花膠蟲草花雞煲翅，個翅可以另外加飯加菜嘅，不過我哋驚太大份就無另外加。兩個主菜都好快到，上枱果下好驚艷！兩個都好大份，泡飯有半隻龍蝦同好多海鮮，有峴，青口，魷魚等等，個湯都好飲，有鮮味又唔太咸。另一個雞煲翅有半隻雞咁多，蟲草花都唔少，仲有一粒鮑魚同幾條花膠，個湯都好高質，濃味得嚟飲完唔口渴，魚翅湯撈飯好正！另外我哋叫左個墨魚手指拼手製魚腐，炸得幾好食，熱辣辣食好正。飲品我地加左石榴梳打同菠蘿梳打，係用玻璃樽嘅七喜沖嘅，大大杯，好好食。埋單每人唔使二百蚊，出到門口見到條人龍仲長左，有機會都值得嚟試下！

油麻地既人氣店，我諗村爺爺一定榜上有名。一到食飯時間就大排長龍。今次同老婆嚟叫左幾樣野。首先我要左一碗鮑魚花膠螺頭雞煲翅飯，成隻雞上，高湯鮮味到極點，真係只要個湯嚟撈飯都已值，加上好足料，真係有鮑魚有翅，無取巧無魚目混珠。我老婆就要左個真盛龍蝦湯泡飯，唔好講笑，半隻龍蝦，唔係講笑，食泡飯食到比個鉗開龍蝦你，你就知真材實料，唔係得一條半條龍蝦肉架。其實配料有，帶子，青口，蜆肉，等等，真係海鮮大餐一樣。小食就叫左個，墨魚手指拼魚腐，都好好味。飲品方面，我就要左個即磨日本炭燒咖啡，都十分香濃，老婆就要左杯梳打。呢度性價比超高，用呢個價錢食到呢啲咁正既野，一定回頭。

門口局你排隊人齊先比入，但又一定要門口叫晒嘢食先，因為入到去就知係一個伏字，嘢食嚟到叫佢收走個托盤話老細唔俾，結果我將三個托盤放咗響張枱嘅側邊，食物質素已經垃圾到一個點，入去之前佢話四個人（3大1小）一定要叫四樣嘢食，所以就叫多一個小食，但係個小食魷魚圈係唔熟嘅，叫佢過嚟話俾佢聽個魷魚圈唔熟，佢就話唔熟唔緊要就整熟比我哋，然後我話你取消、佢話唔可以因為我哋四個人，坦白講已經跟足你話一人要叫一樣食物，但係食物唔熟就真係冇辦法，加上嗰三碗湯飯我哋根本見到都食唔落、試問又點敢再叫其他嘢食，嗰位阿姐服務態度真係冇得輸，總括嚟講呢間嘢，因為佢嘅食物質素、服務態度令我不得不幫佢寫個負評，離開佢間店之後仲即刻走咗去「通達食店」食腸粉飲豆漿填補返個肚加降降火

去到排隊見有七八個人度，但係10分鐘左右都可以入到餐廳今次試食海鮮雞件泡飯，蟲草花湯底，好足料！！各類既海鮮都有，有青口，蜆肉等，完全係滿足到海鮮愛好者既caving!! 湯底好鮮甜，配上一碗暖暖既白飯，再加一杯嘢飲，性價比極高！下次可以再嚟 🥰

次次過嚟食都要排隊，不過都快嘅～暫時食咗兩次，質量都唔錯我個人鍾意食辣，所以都會加兩蚊加辣，都幾惹味不過佢話：呢度每個人都要叫一個湯飯，唔可以兩個人share一碗！如果兩個人要叫一碗湯飯就要再加兩樣小菜！Waiter推薦咗個牛魔王嘅湯飯，不過個人感覺就麻麻地，唔建議食牛魔王

雖然已經開業好幾年不過這間小店真的人氣不減永遠任何時候都見到一條排隊人龍等侯時間最快都要十五分鐘今日見有空就姑且等一等食完後覺得....值得等!首先頭盤小食叫了道黑毛豬拼鵝腸王豬肉片肉質未算入口即化不過都非常鮮嫩蘸點醬油一齊食好開胃又美味但最令我驚喜的是鵝腸鵝腸煮得剛好入口好爽脆每條都洗得好乾淨不太肥膩又有少少油脂香至於主角真盛龍蝦湯泡飯真是一大碗超級足料的湯料及白飯分開上細食的人可能只食湯料已夠飽海鮮種類有魷魚、青口、帶子、蜆所有蜆殼類都無沙,而且好鮮味提提食到最後記得要仔細搵搵有無細蜆肉沉落湯底因為蜆肉份量都算多的而龍蝦都有成個手掌咁大隻啖啖肉的龍蝦肉質爽彈其實龍蝦肉好易拆不過店家亦有奉上蟹鉗夾及濕紙巾給客人備用至於湯底飲落亦真的非常鮮甜一口湯一口飯的撈飯食一流湯底仲有好多菜所以食完真的很飽最後來一杯即磨炭燒咖啡其實一上檯氣味非常香濃不過因為只顧食泡飯令咖啡稍為冷卻應該要求店員最後才上檯比較好但總括而言今餐亦是很滿足

Hello 大家好👋🏻！又係我A_W_foodie同大家分享一下「今餐食啲乜！」嘅「隨心食評」今日我嚟到位於油麻地嘅「村爺爺龍蝦湯泡飯燉湯專家」，落到油麻地就諗起佢哋嘅泡飯，所以二話不說就去食。晚餐：極上海鮮龍蝦湯泡飯美食攻略：餐牌太多嘢食，樣樣都想試最好就早啲諗定心水，安排入座嘅靚女都好細心解說，唔明可以問佢。泡飯足料，勁多蜆肉，湯味不太濃但鮮甜，下次要再試吓唔同款式。美食指數：5🌝最高味道：🌝🌝🌝🌜🌑環境：🌝🌝🌜🌚🌚服務：🌝🌝🌝🌜🌑賣相：🌝🌝🌝🌜🌑

今日做嘢經開油麻地附近， 終於嚟到呢間村爺爺朝聖啦，一嚟到見到排曬長龍，但係為咗飲到暖笠笠嘅龍蝦湯同埋雞湯，我同朋友都無懼寒風繼續排隊，排咗20分鐘左右終於入到喇極上海鮮龍蝦湯泡飯呢個餐做緊優惠，78蚊只限堂食包熱飲， 如果要跟埋半隻活龍蝦就要168蚊， 見到隔離枱隻龍蝦都幾大隻幾壯觀，有啲後悔冇加到，不過雖然冇龍蝦我碗海鮮泡飯都好多海鮮，有一隻帶子，四五隻青口，兩三個魷魚圈，仲有十幾隻蜆肉，蜆肉冇沙幾鮮甜，跟埋個龍蝦頭不過冇乜蝦膏，for打卡係唔錯嘅，龍蝦湯都好鮮甜好有龍蝦味花膠螺片雞煲68蚊 加15蚊轉套餐配米線同油菜一碟雞湯真係好清甜有雞味，有好多塊螺片，仲有半隻雞，雞好嫩滑，雞肉好容易就撕得到出嚟， 食完飽到上心口呀，呢個價真係抵到爛，天氣咁凍食完暖笠笠，短期之內一定會再嚟encore呀#foodie #油麻地美食 #旺角美食 #打卡 #雞煲 #龍蝦湯 #hkig #hkfoodieblogger #hongkonger #foodblogger

三個人等位，排隊時有個似老闆既男侍應比2張完全一樣既餐牌我哋睇住先，過2分鐘佢過嚟幫我哋落單，我哋指餐牌落泡飯，佢就話呢張唔啱要睇另一張，然後收走左張一模一樣既餐牌，我哋就黑人問號，睇清楚冇寫日期或時間限制，佢再嚟落單我又指多次一樣既餐佢又落到單。上菜時明明我哋叫2杯熱華田，姐姐上左2杯熱檸水，我哋同佢講左2次我哋要2杯熱華田，姐姐望住我哋笑跟住行開咗又冇同其他同事講，我哋？？！？！有啲嬲左，再同返落單‘老闆’講，先換返比我哋。講返碗飯，同幾年前食差好遠，同行有人食花膠雞件泡飯，牛魔王就係打邊爐落肥牛鮮牛同牛丸。。。湯有牛味都好飲既，份量好大，一定飽。食到尾，就係我碗牛魔王到食到膠紙 （有圖），’老闆‘好似行開左唔係鋪面，就同姐姐講左聲，姐姐有道歉有問洗唔洗換過碗，我已經食飽就比錢走算，不過就真係唔敢再去。

📍 村爺爺 龍蝦湯泡飯 （油麻地）天氣咁凍好想食熱野！ 以前經過呢間睇到餐牌都覺得幾吸引 今日就黎試下 都幾多人排隊🫣-真盛龍蝦湯泡飯 好大碗呀～有半隻龍蝦、元貝、青口、魷魚等其他海鮮 湯頭都幾鮮撈飯都唔錯～-鮑魚花膠蟲草絲苗白飯有鮑魚 龍眼肉 花膠 蟲草等食材～個人好中意食呢個 啲雞肉好嫩滑～有成半隻雞架 個湯好濃雞味撈飯食勁正 好好味 一啖接一啖好快比我清曬😝-鵝腸皇拼黑毛豬片點埋個秘製醬汁好好食🤓-菠蘿梳打 石榴梳打唔錯 好大杯～

好耐之前已經想試呢間村爺爺泡飯 見到啲龍蝦好吸引 價錢又好抵食咁😍 今日嚟到竟然唔使等好耐 可能因為早咗少少 因為過咗一陣之後就開始排隊餐牌款式選擇好多 湯底都勁多款 唔想食泡飯可以轉麵底▶️ 花膠干貝雞龍蝦湯泡飯 ($78)好大碗湯 入面仲要勁多料🤯個湯飲落去少少甜甜地 味道天然冇落味精 濃味得來又唔過鹹👍🏻會飲到少少花膠嘅味道 同埋一啲薑辛味不過就唔算好飲得到龍蝦味🐔 雞肉真係好多好多 全部都係肉腍得來冇筋骨 好食元貝就唔算好多 同埋識落比較硬 會攝起啲牙罅度🙊仲好健康有好多生菜🥬生菜入味多汁🍚飯質偏硬身但唔覺係煮得唔熟 反而令佢浸落湯唔會散開 質感好好食整體來講就係成個湯泡飯都好正🤤湯底會令到你想不停咁飲-份量超足 材料算靚 味道好食😋服務OK 做嘢快手 不過淨係收cash環境都算OK 唔會坐得好迫呢個價錢來講算好抵食 (去完新加坡同日本返嚟 覺得香港啲嘢食真係貴到離譜 差唔多全部都過$100🫠反映香港嘅生活指數真係好高 通脹率快)係一間令到我會想再嚟試佢其他湯底同埋款式嘅餐廳

唔好以為呢到只有車仔麵同泡飯！個日見凍凍地見餐牌有雞煲，就即管一試😋果然冇令人失望椰子🥥味好香濃，令成隻雞食落都唔油膩😋好香口，好開胃👍🏻推介大家可以去試🥰

呢排黎開油麻地心思思想試下呢間超人氣泡飯，加上天氣凍冰冰，食泡飯簡直系一流！就算系中午一點到，都要排30分鐘排，等緊入去時，店員都好好會比定餐牌大家睇！一有位坐就等食！推薦：⭐️花膠螺片雞海鮮龍蝦🦞泡飯（$108）：一上台個架世已經令我哋哇一聲，因為預計唔到材料會如此豐富，呢個價錢真係抵食！每一樣海鮮到十分新鮮，而湯頭亦都鮮味十足，簡直系偷飯神器！⭐️花膠螺片雞湯米線（$68）：呢房燙一上台相對冇上面嗰款咁令人驚訝，但係湯頭亦都相當清甜可口，花膠份量亦都十分足，整個雞比亦誠意滿分！相當滿足！店員熱情，店舖小店味濃，推薦大家經過油麻地又無咩諗頭，可以一試！味道：🌼🌼🌼服務：🌼🌼🌼🌼環境：🌼🌼🌼🌼抵食：🌼🌼🌼