星廚

聽聞過星廚有蛇宴，有好有壞，今日湊夠一圍去試吓，圍席安排在教室內，我圍在爐台旁邊，可以見到師傅煮野。我係6:30圍席。坐低時已經有煲 羊腩煲在，其他陸續上菜。羊腩煲，料算足料，除羊味差啲外，味道正常，羊腩腍，整煲黎講可以嘅。瑤柱扒西蘭花瑤柱就唔係好覺眼，冬菇就好足料，味道一般。百花蛇丸 ，明白來貨嘅價錢，但蛇肉比例直頭感覺唔到，我情願你計人頭兩粒，好過炸一堆人頭三至四粒嘅蝦丸，味道比普通蝦棗淡咗少許。重頭戲蛇羹，都係嗰句明白明白來貨嘅價錢，蛇肉比例真係偏少，味道，嗯我當小食嘅碗仔翅食囉，個觀感會貼啲，嗱我都食咗幾小碗(拎黎頂肚，睇後啲會明)個燉三蛇湯，湯色清澈，連湯味都清，撩咗件烏雞嚟食，嗯明白點解無味 。貴妃雞，食咗兩件直接略過⋯⋯蛇湯浸娃娃菜，個湯都咁清淡所以個菜都好清淡，唔係好岩我。蟠龍鱔，上檯後發現有唔熟(不是緊熟)，同職員講，佢哋即回櫃蒸，再上檯岩有邊緊熟，有邊就夠晒熟，夠味嘅，唔知係咪回爐黎，我食果件有啲老，整體尚可。炒糯米飯，依家都唔會期望會有生炒，但願你唔好太差，你蒸完再炒我都接受，但係我見佢嘅程序，米落大鑊水煮陣，隔水再炒⋯⋯，一上檯熱辣辣我拎咗一羹食，飯乾身有臘味油香，花生都香，但糯米無晒味，已經死得，後尾食多幾碗蛇羹仔頂肚。唔知係咪由細到大比人帶去 蛇齋餅糭嘅地方食得多，依5-6年都冇食過蛇宴，係去蛇舖食多，依家啲蛇宴質素係咪都咁上下？總括來講，今次真係我唔識欣賞同唔岩我胃口。戴返頭盔先，我覺得好唔好食≠你覺得好唔好食，好唔好食因人而異。…查看更多

今次同家人去咗廟街嘅星廚做冬，一行十人，真係嚟到飽餐一頓😋。首先試咗瑤柱扒西蘭花🥦，西蘭花爽脆，瑤柱鮮甜，一開始就令人食指大動。接著嚟個百花炸蛇丸🐍，外脆內嫩，蛇肉香味濃郁，每口都充滿驚喜。菊花五蛇羹🍲（共兩窩半）真係唔容錯過，湯底濃郁，蛇肉嫩滑，配上菊花香氣，絕對係冬日暖胃嘅佳品。貴妃雞原隻🐔嫩滑多汁，每啖都係鮮味。羊腩煲🐑係招牌菜之一，羊肉煮得香嫩入味，啲湯底更係令人回味無窮。響螺淮山烏雞燉三蛇湯🍲湯底滋補，材料豐富，每啖都係養生滋味。蛇湯浸娃娃菜🥬清甜爽口，蛇肉湯底嘅香味同娃娃菜完美結合，簡直係舌尖嘅享受。原條陳皮蒸盤龍鱔🐟，鱔魚肉質鮮嫩，加上陳皮嘅香氣，真係一試難忘。臘味糯米飯🍚每粒糯米飯都吸收晒臘味香氣，口感軟糯，非常惹味。最後嚟個香芋西米露🍠，甜而不膩，香芋味濃郁，西米滑溜，為呢餐畫上完美句號。呢餐一共$3450，十位人食，份量非常足夠，用料新鮮，絕不馬虎，啲食物真係食唔曬，大家都好滿意。星廚📍廟街2-8號昆鏡大廈2樓…查看更多

【星厨】今年推出十人用蛇宴！咁就輕輕鬆鬆十位朋友已成局👍無得揀，祇有可樂雙冬生碧羊腩煲個人覺得羊腩唔夠火喉冬筍太少！瑤柱扒西蘭花菊花五蛇(共兩窩半)石榴炸蛇丸密實貴妃雞(原隻)烏雞燉三蛇👍蛇湯浸娃娃菜無牙都食到😅陳皮蒸蟠龍鳝夠新鲜、彈牙👍臘味糯米飯一般！香芋西米露水太多，西米又少。不要寄望太多！…查看更多

上到去餐廳坐滿一圍又一圍枱的食客，我哋坐的位置可以望到大廚係開放式廚房度拋鑊 — 超級大隻鑊呀😮*:.｡..｡.:*･蛇宴･*:.｡. .｡.:*🐑 雙冬生碧羊腩煲．大大煲，好足料，羊腩夠腍，枝竹入味．仲有新鮮生菜可以加入去淥熟𠻹🥦 瑤柱扒西蘭花．每人得幾棵仔，感覺份量少一啲🐍🍲 菊花五蛇羹 (共兩窩半!)．多雞絲、多粉絲、連蛇肉也切得很絲，唔係好食得出來，不過幾好味，本人食咗2碗😋🐍🍢 石榴炸蛇丸．炸得像石榴，乾身不油膩，口感爽彈，我覺得味道有啲似蝦丸😂🐓 原隻密實貴妃雞．滷得入味，雞肉嫩滑多汁，沒太多皮下肥🐓🐍🍲 響螺、淮山、杞子、烏雞燉三蛇．清晰嘅燉湯，味道非常之濃厚，很好飲，一碗唔夠，要飲2碗起😋🥬 蛇湯浸娃娃菜．娃娃菜入味又甜美，我食咗很多條菜呀！🐟 原條陳皮蒸蟠龍鱔．蟠龍鱔因為太肥厚肉，初時上枱嘅肉似乎未熟，有啲咬唔到，店員再送回去蒸多一陣就ok啦，入味嘅，很多豆豉和蔥👍🏼🍖🍚 臘味糯米飯．粒粒飯都軟糯口感，入味，又多臘肉臘腸粒，炒得幾好味🍯 香芋西米露．西米不太多，但暖暖的，滿椰香，香芋粒粉口，味道不太甜，就吸引到我食咗2碗😋埋單都係 HK$3,280 (10位用)，另收加一服務費，都幾抵食喎。…查看更多

舊老闆真係好好食吾到金X, 訂左第2間食蛇晏一桌8人座位都幾闊雙冬生碧羊腩煲食完身體已經暖起黎瑤柱扒西蘭花菊花蛇羹 - 共兩鍋食完呢碗成身都熱晒仲開始出汗石榴炸蝦丸響螺、淮山、杞子烏雞燉三蛇保身到不得了密實貴妃雞雞肉滑溜溜陳皮蒸盤龍鱔吾係好食得出有陳皮蛇湯浸娃娃菜食左甘多樣食番樣清清地臘味糯米飯糯米飯相比之前的每樣相比分量比較少左d香芋西米露本人覺得甜左少少可樂係兔兔賀年版…查看更多

秋風起三蛇肥🐍又係食蛇嘅時候🐍🐍又可以同屋企人進補😆今年好彩有屋企人預早book咗星廚嘅蛇宴🐍🐍仲特別帶埋小朋友一起食蛇🐍我個仔竟然見到碗蛇羹都無驚🤫還食咗五碗仔🐍🐍真係估唔到小朋友都咁愛食🤦咁都好以後可以負責同姨媽和爺爺食🐍😆👍👍今晚菜單如下：蛇宴🐍🐍菊花（五蛇/花膠）羹- 唔使講🤫👍👍小朋友都愛食🥳雙冬生碧羊腩煲- 羊腩煲都好出色🐏🐑我個小朋友都很喜歡食而佢裏面嘅材料當然有羊肉肥瘦均勻、枝竹、冬菇、生菜、荀等等味道唔會太濃所以都好適合小朋友食瑤柱扒西蘭花- 西蘭花經過上湯煮後後再加芡汁, 個芡好勁唔會咁容易變水👍👍 石榴炸蝦丸- 呢個蝦丸我食得最多鬆脆可口🦐密實貴妃雞- 雞🐓🐔好夠味,啲汁滲透入的雞肉裏面好juice而且唔會太鹹響螺、淮山、杞子、烏雞燉（三蛇/花膠）-雖然有啲驚但係我都試咗一碗仔飲落口嘅感覺係精華嘅所在好勁呢一碗湯🐍上湯浸娃娃菜- 夠林😌陳皮蒸盤龍鱔- 佢蒸鱔好夠味不過多骨唔夠肥, 但係有媽媽的味道😌😋🌹臘味糯米飯- 足料而且啲臘肉切到好細粒每一啖都有好滿足香芋西米露- 呢個真係食唔落喇只好外賣回家嘆😆雖然我唔食蛇🐍但係佢有好多都同成無關嘅食物我可以食😋😋整體都好有住家菜嘅風味冇味精唔口渴😋😌👍大人細路都食得開心每一道菜都很有水準唔會有一道突然間失準👍👍…查看更多

油麻地找自取外賣餐廳⋯ 見到2餸飯的選擇不錯，無味精湯也很吸引。飲品不是茶記的選擇，促使我立即下單試試佢⋯ 點知無令我失望。飯仲可以揀白飯/+藜麥/+紅米/+糙米。真係幾窩心⋯份量是正常偏多⋯$48有2餸飯有湯重有竹庶茅根水，午餐來說請問重想點？「飯」真係要讚，自疫情開始，天天外賣真係令人心情變差⋯因為坊間D飯一係太乾太硬，一係太濕太淋⋯佢個飯就真係好高分（對我來說）一定要再食。天天都不同餐單，可以一星期食2次⋯…查看更多

以為只有蛇宴，原來依家有埋午市套餐，用operice個app訂咗個3餸飯仲包埋一杯熱飲，轉頭就去拎得。返到office,一打開，整整齊齊又乾淨，有菜有蛋仲七味雞翼都幾惹味，仲包埋杯熱薏米檸檬好鬼正，好有住家菜feel同埋食完係唔口渴囉。。。咁樣都係$38，邊到搵??? 成盒飯整體真係幾好食又抵食。。。唔錯唔錯！之後再係個app訂多盒淨餸焗蝦，留今晚返屋企食加餸，仲可以預訂幾點去拎，好方便。依輪唔想煮的我，又多個我買外賣嘅好地方…查看更多

星厨個名好熟因為我有個阿姨常常來這裹上cooking堂，當朋友們話吃蛇宴，即時諗起要試星厨，由吃第一道菜到最後甜品，每道全枱人都好滿意，真是好難得。星厨本身係個cooking school, 所以吃蛇宴坐的就是班房內，最多可坐6枱(4枱在大房近爐灶，另外兩枱在细房), 坐室間不是好闊落，但絕對沒有背迫背情況。7:15pm才能入席，早到要在外面等，枱職員分配，自己不可以調枱。先來個羊腩煲，味道好好，羊肉質地又好，吃完再煮埋d生菜吃，我枱有個uncle將個汁當湯飲。跟著來三窩蛇，雖然我們十二人有一半男士戰鬥力强，但大家吃了兩窩，第三窩分三家人打包。蛇丸九成九似蝦丸，都好味。鱔好肥美，調味又好，好出色的菜。蛇湯好足料，好補。其他菜，雞，生炒糯米飯，甜品都做得好好。未吃完已經plan梗下次組織另一批朋友來吃。…查看更多

好多人去星廚管理學校都係食蛇宴，但其實佢本身係一間烹飪學校，當然以教煮嘢食為主啦！今次可以參予「寺院精進料理」嘅烹飪班，果然幾特別，講真要食到「精進料理」都唔易啦，莫講係烹飪班啦！今次除咗你可以親自煮好一個「精進料理」放上網呃like外，仲可以學到以下：*日本精進料理歷史及簡介*掌握日式"一汁三菜"製作技巧*示範日式素高湯種類及製法*梅子涼拌使用*味噌湯基本做法與秘訣*炸物料理技巧*禪食體驗如果大家都想試下「自己料理自己煮」，可以上星廚管理學校網站睇睇幾時開班！煮嘢食除咗食物重要外，餐具都好重要星廚已一早預備好金菇炸到成把扇咁，好靚！完成品！大根大葉梅子涼拌海帶豆腐本菇味噌湯金平牛蒡野菜天婦羅…查看更多

朋友介紹入會，做會員訂蛇宴，怛白講它價錢最優惠的。 12人 價錢$2780。 菜式分別有：1.瑤柱扒西蘭花 (￣∇￣)2.石餾炸蛇丸 很香口，有點蝦膠彈性3.菊花五蛇羹 3窩 -每人有3碗比想像中稀，雞肉絲多些，而薄脆無得加，有點失望很普通，蛇羹並不出色……4.密實貴妃雞超滑味道像豉油雞5.雙冬羊腩煲 足料，很多羊腩，羊腩不夠淋，可以再炆耐些比較好食。6.烏雞燉三蛇湯 極了讚賞，很清而味道濃，燉湯飲下舒服，而且無味精，很香雞味和蛇肉味，飲完有重很補感覺，湯料有烏雞一隻，雞腳多件，黨蔘，淮山，響螺，杞子，北棋……7.蛇湯浸娃娃菜 正常8.陳皮蒸蟠鱔 食得出條鱔好新鮮，又滑又惹味可配白飯同吃，椒汁很正9.臘味糯米飯 不像生炒，應該電飯煲煮，很濕失望-_-# 10.香芋西米露 -不太甜，芋粒很綿，椰汁很香，甜品增加了全宴滿足感總括，人多聚會，一年食一次都可以食物水準有些飄忽，不穩定，懷疑係學生幫手煮。…查看更多

飯局搞手好友每年一度搞蛇宴，選址離不了星廚，因為她曾是這兒的學生，而且價錢真的實惠，$2580/圍，12人計，每位$215，最重要是有3窩蛇羹，每人可分2－3小碗，只吃蛇羹已經差不多回本。 當然環境服務欠奉，如果講得客氣，大家如坐平民版的廚師桌，可一面吃一面欣賞大廚功架，講得直接啲，就是在大廚房內放桌椅，如員工用膳般，膠布鋪木板桌丶圓凳仔丶自助開水等，而且一晚兩輪，如吃快餐般速度出菜，限時兩小時，但大部分人包括我們，一小時多已經吃完離去。十款菜式，無加一，送汽水啤酒十二罐。瑤柱扒西蘭花 火速上菜的第一道，賣相亦有一些粗糙，瑤柱全部碎成幼絲，西蘭花煮至全腍但沒有支離破碎，冬菇切片不過薄有口感，芡汁黏稠未有過份，幸好調味不俗，下了雞粉令味道豐富。石榴炸蛇丸 炸至似石榴有凹凸外表的蛇丸勝在即炸即吃，新鮮酥脆，炸漿薄，熱騰香口，內𥚃軟滑，蛇肉混合豬肉的餡料，醮以酸汁吃，是不俗的酸甜開胃惹味的前菜，星廚的蛇丸，水準可以。菊花五蛇羹 自從有了急凍蛇肉，蛇羮亦變得更加普及，大家不用到環境峽窄的蛇王x店，這兒是否由大廚生劏我未有追問，作為食客，但求足料味道好便成。一般人無法看出蛇肉及瘦肉的比例，我的感覺是，蛇肉的份量是一年比一年遞減了，但整體材料算足，亦有不少木耳絲，口感爽而啖啖肉絲，湯頭黏稠，味道豐富滋味，室外只有攝氏幾度的晩上，我吃了5小碗，頓覺溫暖！密實貴妃雞 其實我期望有蛇汁雞，但相信這個只是鼓油雞，雪藏雞的材料，沒有雞味亦無雪味，肉質不嚡亦非很滑，但鼓油浸泡時間足，吃得到功夫。雙冬生碧羊腩煲 石油氣爐原鍋上，份量十足，選材不俗，連骨羊腩件嫩滑不羶，腐皮丶馬蹄丶竹芛亦不少，備以大量生菜，這一煲，抵食！響螺丶淮山丶杞子丶烏雞燉三蛇 冬日暖物不斷，烏雞燉三蛇亦是足料熬成，原只烏雞可見，味道醇厚鮮甜，我亦不客氣，喝了3碗；湯料已經無味，不必吃。蛇湯浸娃娃菜始終是廚師學校，調味方面不會錯，娃娃菜嫩腍，被豐富湯汁餵飽，清甜不膩。陳皮蒸蟠龍鱔 我喜歡鱔，肉質緊密不鬆散，纖維彈性十足，而且鮮甜，口感甚佳，以大量陳皮豆鼓蒸之，消取了淡水魚的泥味，濃郁滋味。臘味糯米飯非常失敗的一道，相比往年失色，糯米飯先蒸後炒而非生炒，現在已經在所難免，但水份過多，亦未有炒至乾身，口感失分！臘味尚算豐富，有鹹香，油份沒有過多，可惜濕飯的感覺未能接受，同枱朋友食量亦不高，我們只吃了一半。香芋西米露合格而非出色。總括來說，我是來吃三道菜的，蛇羹丶蛇湯及鱔，其他菜式，不要期望太高。以過去多年總計，我已經是第四次光顧，也許明年不會再來了。…查看更多

曾經同班「死佬」朋友搞過兩年蛇宴飯局，由於依家比較少酒樓會晌秋冬推出蛇宴，所以，近兩年都無搞咯。繼三聖海鮮夜同大埔私房菜，一班老細一時興起又話想搵番次蛇宴，先後問過深水埗嘅蛇王協同蛇王業，大家覺得有點貴之餘，主因喺菜式太「蛇」:(，10道菜有8道都喺蛇菜，覺得「負擔」太大。後尾搵到富臨都有做蛇宴，但未計茶芥加一，亦唔包酒水，都已經$3,480，即喺埋單四千起計 。最後，有提議「星廚管理學校」嘅蛇宴。聽個名就知喺間烹飪學校，來頭喺點，小弟就唔多講，反正人家有官網（www.starchef.edu.hk），網頁有齊學校歷史、創辦宗旨、傳媒報導……等等。總之，教學之餘，秋冬會辦吓蛇宴，過年會辦吓團年、春茗。飲食，好多時會講到「不時不食」，即喺食材要夠時令，今晚嘅蛇宴更喺近乎「煮完即食」，夠晒新鮮熱辣，點解？一睇現場環境你就即刻明晒，幾步之隔就喺灶頭，「開放式」廚房就在眼前，我哋就喺對住個「廚房」開餐，仲要被安排坐到正對住嗰張枱，故此，一邊食，一邊睇大廚做菜，雙料娛樂。再講多少少現場環境，將平日上烹飪班做菜實習用嘅大鋼枱拍為長形，鋪上膠枱布，就成為我哋用餐飯枱。因為地方所限，拍好6張「飯枱」，留番少少通道，再多點地方都無，但逼得嚟好有氣氛，又有啲地踎感。原來「星廚」嘅蛇宴頗有人氣，所以，是晚爆滿收場！蛇宴共有10道菜（$2,380），當中只有4道菜包含蛇嘅成份，送汽水、啤酒共12罐，無任何雜費，圍起每人都唔便嚿水，非常之抵食:)。每年10月搞到翌年2月，逢星期日晚供應，分兩輪，6:00-8:00pm及8:30-10:30pm。由於專注只做全場6枱客嘅生意，煮完即食，一道菜接一道菜接，節奏明快，食完所有嘢都只不過喺10:00pm左右。雖然蛇宴包咗12罐汽水、啤酒，唔夠飲可即場買，每罐$6，不過，訂枱時講明只有可口可樂及獅威，所以，歡迎自攜飲品。我哋一班死佬就最心多，搵幾個人買嚟兩打汽水，樣樣有啲，實行人哋「隊」酒，我哋就「隊」汽水，一於盡興而歸，高高興興除舊歲！校方再三叮囑，記得準時出席，絕對唔等人就開餐，果然，一到8:30pm就大廚出馬，開爐起鑊。除咗晌街邊大牌檔之外，相信都無乜幾何可以睇到廚房做菜嘅場景，仲要一次過煮6圍枱份量，真喺唔嘢少。佢哋又唔介意你哋影相，睇住煮菜全程，個大廚好似玩魔術咁，兜吓炒吓，第一道菜咁就可以出場。第一道菜上枱都會比較氣氛熱烈，好似去咗飲咁，全場爆滿，「飲杯」聲此起彼落，好不熱鬧！最難得喺搞咗咁多次死佬飯局，依次「夫添」最齊人，所以，就更加熱鬧。瑤柱扒西蘭花整晚菜式都跟番菜單一道道菜上枱，先嚟嘅瑤柱扒西蘭花，西蘭花仍有少少爽月脆，茨汁無過漿，內裡有唔少瑤柱碎、瑤柱絲，味道剛好。石榴炸蛇丸是晚第一道「蛇」菜，以一圍12人計，人人兩粒。外層沾上麵包粒，賣相猶如石榴。蛇丸炸得好香脆，新鮮熱辣放入口，一咬彈牙又爽口，正呀！菊花五蛇羹（3窩）蛇丸上枱無耐，隨即就捧嚟3大窩蛇羹，份量絕無欺場，人人兩碗已經走唔甩，晌蛇鋪食一碗都幾十蚊啦，依家小弟就前後食咗3碗，真喺翻本呀。兜一兜蛇羹可見真材實料，加啲薄脆、菊花瓣同食，啖啖蛇肉、木耳絲，口感柔滑，果然行氣活血，食罷成身暖晒，個個死佬除淨件 Ｔ恤！（註：如想再添薄脆，需另付$10碟，而且數量有限）密實貴妃雞唔知點解叫「密實」，總之喺隻好食嘅豉油雞，鹹甜細緻，皮下脂肪又少，雞肉好嫩滑，師傅手勢真有一手。雙冬生碧羊腩煲一大煲羊腩煲，同樣份量十足，便攜式氣體爐滾住食，食得我哋更加熱血。雙冬指冬菇同冬筍，加埋一大碟生菜，啲羊腩炆得好食到不得了，軟腍微羶，醬香滋味。就連啲生菜，沾滿醬汁後都寧捨好味，只喺奈何無白飯供應，而生菜想俾錢食多碟都唔得，因為被之前第一輪食客搶購一空。響螺、淮山、杞子、烏雞燉三蛇大家食得興起之時，已送上一大盅燉湯，撈一撈驗明正身，原隻烏雞，仲有響螺、蛇肉，又喺童叟無欺之作，好嘢自然無得呃。烏黑嘅燉三蛇湯，溫醇清香夠火喉，啖啖精華入口。蛇湯浸娃娃菜幾味香濃嘅菜式，喺時候以一道較清淡嘅菜式作間場。平時超市幾蚊一包嘅娃娃菜，經蛇湯浸一浸，再淋上玻璃茨，有種升價十倍嘅效果。娃娃菜食落很清甜，帶點點鹹香味。陳皮蒸蟠龍鱔蒸鱔恰到好處，肉質爽脆而油潤，又充滿幽幽陳皮果香，兼且惹味非常，食得大家都讚。碟底嘅陳皮豉汁，相信如有白飯供應，我哋實可以幫手食到清澈見底。臘味炒糯米飯平時去飲或食一啲酒席，去到尾聲嘅粉麵飯，大抵都喺作為墊肚之用，不過，晌度卻喺一場表演。雖然糯米飯唔喺生炒而成，但煮好嘅糯米飯，由下鑊炒，加醬油，加臘味，以至調味，如要炒得夠「勻巡」，睇落認真唔喺一件易事。晌依個環節，都有好多趣事發生，以上所有菜式都有大廚負責，而糯米飯先由幫工阿叔露兩手，一次過炒一大鑊糯米飯真喺不易為，見佢炒得幾辛苦，有少少力有不逮，再由大廚示範一吓真功夫，之後連在場「監工」嘅校長羅有昌師傅都忍唔住表演吓，果然功架不凡，睇得大家好開心。好睇還好睇，但好唔好食先？糯米飯炒得分明，上色均勻，飯粒煙糯入味，可謂平凡中見真章。香芋西米露酒席敬送嘅糖水，通常都喺預到啱啱好一人一碗，不過，「星廚」真喺唔志在搵錢咁，樣樣都大大份，就連最後嘅香芋西米露，都整一大大大窩你嘆，有幾大窩？有相為證，滔完一轉，都仲可以人人再添。質素雖無驚喜，但絕對唔差，西米無話黐埋一嚿嚿，芋頭夠粉香，又夠椰汁味。美心壽比南山蛋糕班大佬話好耐無搞過食壽包或生日蛋糕，所以，訂咗個美心「壽比南山」蛋糕嚟賀一賀依幾個月生日嘅老死，蛋糕嘅食評，另文再寫，但想藉個蛋糕講吓依度嘅5星服務。你見之前啲相，就知枱面好街坊，鋪張白色膠枱布就開餐，食到尾自不然污污糟糟，滿枱唔喺醬汁，就喺雞骨魚骨，但啲阿姐唔單止幫我哋清理好晒個枱面，仲拎咗啲碟同叉，以為兩把餅刀俾我哋用，實在喜出望外咁好招呼，而且，喺分文不收，絕無切餅費，所以，點可以唔講幾句讚一讚佢哋吖。雖然地方淺窄，但勝在夠氣氛，而且，啲阿姐、阿哥招呼非常好，有求必應，快手快腳樣樣自動波，值得一讚再讚。我哋13件死佬，加埋自攜汽水，每人唔使兩嚿水，食到捧肚走，仲要好好食咁先真喺叫抵嘛！要食又要等年尾，絕對值得下年再嚟過，真喺想搞番次死佬、死婆慶團年呀！…查看更多