將軍會館

公公的生日飯，為方便老人家，選去他家附近的酒樓。平時去海港多，今次去該集團旗下的將軍會館，店內裝潢格局較為新穎一點，設有梳化卡位。這次晚飯沒點套餐，散點一些想試的菜式。點了一份孖寶套餐，牛蒡猴頭菇湯拼豉椒炒莆田蟶子。湯的用料足，舀上來的湯料見到用上很多的猴頭菇，味道清甜濃郁。以價錢而言，蟶子份量尚可，蟶子肉飽滿無沙，吸盡豉汁味道，幾惹味。鮮果咕嚕黑豚肉，蜜桃與新鮮菠蘿代替罐頭菠蘿，咕嚕肉則以黑豚肉去烹調，粒粒都啖啖肉，醬汁味道偏甜。黑豚肉脂肪較多，雖然肉味香一點，但吃得多會有點膩。會館晚市優惠，有四款$38的菜式，可選其中一款。將軍熟成脆皮燒雞，燒雞皮脆肉嫩有汁，不會過鹹，配上脆脆蝦片，這道菜抵食又好味！日式濃湯雜菜煲，幾種蔬菜配上粉絲、魚腐、魷魚、蝦仁、冬菇、鳴門卷等等，配料豐富，加入了魷魚及蝦仁，令湯底有蔬菜的甜外，還多了陣海味香。羊肚菌燒自家製黑豆腐，忘了拍照的一道菜式，但要推介試試黑豆腐，豆味香濃，豆腐又夠滑溜，健康又不失美味。清蒸阿拉斯加長腳蟹配粉絲煲，就是以芽菜、粉絲及蔥花配襯，幸好長腳蟹的質素還不錯，蟹肉鮮甜不會霉，芽菜及粉絲吸到蟹汁鮮味。豉汁白鱔煲仔飯，白鱔有4大件，夠肥美，惟煲仔飯的飯粒不夠乾身，整體還好，但不夠香及惹味。有些菜式的味道不錯，大家最滿意的要數是脆皮雞！…查看更多

服務態度極差，連部長 收銀 經理都係咁，冇下次，埋單行到去，佢都要拎疊錢出嚟數，要等佢數完錢先埋單，經理部長講嘢句句有骨，嘢食幾好食都冇用，咁嘅態度會令到一個食客咩心情都冇晒，就算幾好食都背脊骨落。第一次幫襯，原本係有朋友介紹話嘢食幾好食諗住試吓，佢哋可能對熟客會好啲，我哋呢啲第一次幫襯嘅根本對佢哋嚟講只係增加工作量，所以都唔會有下一次。我諗個個打工仔嘅應該會想間酒樓冇生意，咁樣就唔使做得咁辛苦！！香港飲食業靠你哋，冇下次冇下次冇下次…查看更多

得4 張12人枱，留2張枱俾自己人，情願要客等一粒半鐘都唔放張枱俾其他人坐，難怪香港酒樓做唔住。入面2張12人枱就坐半圍，佢老闆見到唔知咩感受。好，嘈完就安排入座，最慘係食完野仲發現啲野係勁難食，點解仲會有人等枱？點心同炒粉麵飯都咁難食果下勁，完全無心做生意。其實請外勞都解決唔到問題，因為根本係間酒樓既營運有問題，咁樣好快就會又收皮，開間新既又係請同一班人，結果係點大家都知啦。似乎最根本，都係老闆親力親為，落場指導下班員工，做下員工培訓啦。慘。…查看更多

新派酒樓格局服務親民，價錢合理街坊飲茶食飯聚腳首選玉桂乳鸽    -皮脆肉嫩滷香透，玉桂蜜糖裹焦脆骨細多汁吮指回甘金箔蝦餃  -晶瑩剔透裹鮮蝦，金箔點綴貴氣足，蝦肉彈牙筍脆蜜汁叉燒包  -蓬鬆外皮爆甜潤叉燒，醬香濃郁肉嫩滑經典雞包仔  -鬆軟外皮裹嫩滑雞粒，香菇香氣撲鼻蒜香蒸排骨  -蒜味濃郁，排骨嫩滑多汁 芋頭墊底吸盡精華山竹牛肉球  -手打牛肉彈牙多汁，馬蹄碎添爽脆 蘸喼汁更惹味！臘味銀魚煲仔飯  -臘香撲鼻銀魚鮮，飯焦金脆焦香似食薯片黃豆醬炒通菜鑊氣十足通菜脆，黃豆醬鹹香惹味香煎素菜包外皮酥脆內餡清甜，香菇胡蘿蔔絲爽口…查看更多

將軍會館係新派版本嘅海港酒樓，感覺有啲唔同平時去嘅傳統酒樓，菜式多咗啲創新元素，連手搖飲品同蝦多士呢啲都有提供，真係幾得意。清蒸長腳蟹今次叫咗隻5斤蟹，蒸得啱啱好，食落去每啖都係蟹肉嘅原汁原味，蟹肉可以點蟹膏食，又可以撈飯，真係汁都撈埋！蝦多士平時去酒樓都冇見過蝦多士，但呢度竟然有，炸到金黃香脆！黑毛豬叉燒叉燒肥瘦啱啱好，連埋摩摩一齊食，又有唔同感覺。小炒王火喉十足。碌鵝好惹味，有芋頭墊底，索曬鵝油，超香！前菜叫咗酒香鴨舌，唔係好多地方有。…查看更多

不知道是人手不足定係人工不足，一餐中午飯，見證（應該係）部長同侍應阿姐嘈，嘈完部長行開，兩個阿姐繼續用粗口數個部長（西來西去咁）。然後餐飯無論要茶要落單要餐盒，阿姐都要by pass 至少兩次，先肯應一次。埋單見部長同收銀姐姐一齊數個同事唔醒目之類，錢都唔得閒收（至少無粗口）。其實食物做得幾好，乳鴿超出水平，環境裝修都舒服。傳統茶樓係難做，至少呢間食係水準以上好。真心希望大家開工唔好咁燥，生意好大家好～…查看更多

開瓶費：FREE有冰桶，冇酒杯冇開瓶器潮式春菜煲可能星期六，而且8：30，春菜不足，師傅加咗其他菜，鹹肉都有落，唔錯上湯蝦球伊麵蝦球多，4人都分到2-3隻，大隻爽彈。伊麵煮過火偏淋，上湯過鹹少少小炒皇高質但偏油菜浦、腰果、蝦仁、魷魚鬚等等齊全，韮菜爽脆，但建議唔好加炸春卷皮碌鵝半隻底部墊有非常粉淋嘅芋頭件非常吸汁好味。個汁好香好濃郁，鵝肉非常入味又炆得好淋非傳統酒樓裝修，非常新鮮，乾淨企理，鐘意呢種唔用枱布嘅餐廳…查看更多

味道一般，份量不及其他酒樓或同集團的海港足。叫咗個六人餐，比較好嘅係蒸東星班，肉質剛剛好，黑松露海皇藜麥炒飯炒得乾身。陳皮蒸鮑魚，鮑魚口感可以，但真係冇乜陳皮味。碌鵝同叉燒比較失望，個人覺得比較肥。個別黑衫部長戴眼鏡女士態度差，就算人手不足，未能及時回覆客人，應該保持禮貌⋯…查看更多

亳子尾數自動收多啲，點解可以咁做？每張單係咁每日收多好多，仲要張單係睇得好清楚，個收銀有極度冇禮貌，有侍應行埋附近一齊大聲講粗口，究竟班員工有幾唔想做呢份工，班老人家街坊應該冇晒感覺。…查看更多

一行五人用餐，食物整體感覺偏咸，非常適合味覺有退化人仕。假如進食過多而感覺身體不適或導致口乾，餐廳隔離就係中醫診所，如此貼心，實在是物超所值。更值得一提的是，餐廳服務水準不凡，令人客食飽就想走，唔駛等太耐都可以有枱。…查看更多

同黑色衫女侍應講，啲鮑汁鳳爪爛成咁嘅樣，你都俾客食！我哋要俾錢個喎。跟住佢Hea樣話：取消咗佢啦，取消咗佢。我話我哋都已經夾咗，都放咗落碗，跟住佢唔嚟就攞走咗個點心，再嚟攞走埋d碗（入邊已放點心），我話你可以同廚房講聲，呢啲就唔好俾客人啦，佢話冇辦法係咁㗎啦，根本佢完全都冇問我，係要取消定係換過俾我。我話你咁樣處理＇咪唔會進步囉！乜而家啲洒樓知客成個老細咁🙄…查看更多

買兩糯米飯外賣，等咗5 0分鐘先有，等咗15分鐘，第一次追問，只係行去望一下，完全冇回應，20分鐘之後去收銀處追問，就話蒸緊，30分鐘之後再追，就話亂左單，即刻整緊比我，到4 5分鐘就話兩張單貼住左，睇唔到，每次追問都有唔同籍口，50分鐘已經可以食完一餐飯，一定唔會有下次…查看更多

中秋節當晚，因早前時間已付$500留枱費，所以6:00pm準時攞枱，用餐時間6-8pm。6:12pm已落單，當中包括三隻乳鴿。 落單後，店員問餸是現在上定「叫上」，我哋話「叫上」。6:20pm, 叫副店長上菜，佢話而家上，餸會涼，不如等齊人。6:32pm, 我哋再同副店長講唔等齊人，直接上菜。 對方突然表示，三隻乳鴿已無，被其他「大單」攞咗。 我哋話6:12pm 落單時，無人同我哋講無哂，點解會突然無？咩叫「大單」？ 原來「叫上」係會俾「大單」搶？ 此時，巫店長就行出嚟話無就無，佢地無辦法，早order都無，直接將「叫上」既責任放落我哋身上。 仲話「幫」我哋即刻取消其他餸，唔使我哋賣單（其實只上咗湯，都無飲過）。 店長仲話我哋要投訴，寫埋嗰名俾我哋，退返$500。 就叫我哋過主。各位，中秋節慶祝都要俾呢間食店搞到我哋好唔開心，特別係老人家。 過時過節仲值唔值得喺呢間鋪食，自己考慮下。…查看更多

將軍澳商場入面開店一段日子嘅酒樓，裝修光猛、新潮，相比傳統酒樓，我更加鍾意呢類唔鋪枱布、鵝蛋形枱，甚至有卡座嘅中菜館👍芝麻醬皮蛋豆腐芝麻醬超濃郁，皮蛋偏少，切晒粒，再加百頁豆腐，師傅刀功非常好作為頭盤一流沙薑豬手沙薑用上新鮮貨，切碎再混入蒜茸，淋上汁料，豬手切細粒、一口size，骨少又上味，未到好淋，少少爽口非常正鹹肉炒花菜辣度輕微開胃，椰菜花依然爽脆，鹹肉切得薄薄，所有味道非常融合咕嚕肉菠蘿、三色椒都唔夠肉多，脆漿算高質，放咗一段時間都依然帶少少脆口，咕嚕汁酸甜平衡非常開胃好味燒雞半隻過火，肉質偏乾同老，醃肉入味，唔洗醬油都好夠味清蒸龍躉斑由魚肚位開半，蝴蝶形咁蒸會比較快熟上枱，師傅應該都諗過炒檔時段要加快速度😂至於火候剛剛好，魚大、肉質結實有咬口，魚肉啱啱離骨，不過蒸魚豉油太淡、色淺，吊唔起魚嘅鮮味。。。4人6道菜大約$7xx，超飽！另自己帶酒去唔收開瓶費，打電話問嘅時候，Reception話只有茶杯當酒杯，搞笑地講酒刀唔見咗要自備酒刀😆…查看更多

今晚約了朋友在將軍澳新都城3期的「將軍會館」吃晚飯，交通非常方便，離地鐵寶琳站出口只需幾分鐘步程，而且全程有蓋，不怕日曬雨淋。餐廳面積不小，裝修雅緻，座位寬敞舒適，卡位都有小屏風分隔。看過餐牌後，點了幾個家常小菜。餐廳推介熟成燒雞，可自選配搭一道小菜，當然要嚐嚐啦！「將軍招牌熟成燒雞（半隻）」配「鮮茄魚腐浸勝瓜」，燒雞是肥美的黃油雞，皮薄肉厚，外皮燒得香脆，肉質嫩滑多汁，鮮甜可口。魚腐兼具魚肉的鮮味及豆腐的香味，配上爽甜的勝瓜和酸微微的番茄，湯底又濃味，味道讓人有驚喜。「名醬牛柳粒」，安格斯牛柳粒，肥美多汁，牛肉味十足，以薯仔、洋蔥等爆香，加上袐製醬汁，特別惹味。「豉汁白鱔煲仔飯」，熱騰騰原煲送上，打開煲蓋，便聞到陣陣香味。鱔片鮮甜爽滑，入口甘香。飯底焗得很香，但廚師掌握火候得宜，香口而不焦。這裏的菜式有水準，環境又舒適，所以甚受食客歡迎。…查看更多