已經係第二次嚟家嫂一家大小嘅尖沙咀分店食嘢啦，一早打咗電話book枱，因為次次去都好爆滿，加上佢係無限時，個個都食到收工，最好book定枱，去食之前，餐廳會whatsapp定menu過嚟，講埋安排暖幾多號枱，如果想要家嫂花膠老火湯底嘅話，就要同餐廳講定要留，不過我哋就冇要。時間可以由5:30食到10:30pm，我哋係6點幾去到，未齊人都入得，可以喺出面攞住飲品先，亦都可以叫住小食食住先，等齊人再上菜。有超多飲品，唔止罐裝，仲有好多冷泡茶、滋潤飲品，桂園杞子之類，另一邊仲有熱的泡茶，醬汁又係好多。未齊人我哋已經食住小食先，有15款，而且味道唔錯，蜆螺冇沙，蝦多士好脆。不過小心，唔好叫咁多，每樣試一次就好，唔係就中咗餐廳圈套，掛住食小食食唔到其他啦。齊人就可以上菜啦，第一樣係食刺身船，我哋4個人所以唔算好壯觀，多人食嘅話，個刺身船要兩個店員一齊搬先得。刺身人頭計每人每款一塊，好好食，新鮮冇腥味，又好厚切，如果任食就太好啦。三文魚好厚切，帶子好鮮甜，蝦都完全冇腥味。之後就食雞煲，我哋叫咗微辣，不過唔辣，甜甜地幾好食，食咗一次我哋就轉火鍋啦。火鍋都有七款湯底揀，家嫂花膠老火湯鍋就係要先預訂的，當時就有六款可以揀，只可以揀一個湯底，我哋就揀咗清香椰子湯鍋，好香。火鍋一開始會上盤海鮮，海鮮係任食的，不過冇寫喺火鍋任點menu度，因為海鮮係每晚不同的，要睇返當晚係咩海鮮，呢個海鮮盤有嘅海鮮都係可以任食，叫店員過嚟落單就得。我哋主要一直點鮑魚、蠔、魚，魚係慒仔魚同鱔，都好食，蠔完全唔腥，鮑魚好彈牙。火鍋任點menu仲有好多野，肉只有兩款有肥牛、豚肉，仲有丸、菜、鍋肴，全部都唔錯，牛肉係美國肥牛，但都唔錯，唔會好鞋或者勁肥，豚肉係黑豚肉，都完全唔鞋，好嫩，都有再叫。每人400幾雖然唔係平，但有刺身雞煲海鮮火鍋食，仲可以食足5個鐘，就好抵食。…查看更多
