大良鴻輝記

营业中

休息中

同阿哥喺健身室做完gym真係熱到無朋友, 拿拿淋搵個地方坐低食返D凍野急速降溫. 一個叫左西瓜涼粉($24), 一個叫左凍腐竹糖水($17), 西瓜好鬼清甜, 又多, 同涼粉一齊堆滿晒成個碗, 好夠凍, 完全透心涼.平時阿媽都久唔久會煲腐竹糖水, 不過熱食居多, 凍食原來係咁涼快, 食落無咁甜, 多左份清新感覺, 亦食到少少豆香, 幼滑程度好似飲緊奶.

前排病左無晒心機同胃口食野，好慘，今日終於好返9成喇，Honey放左工之後仲特登由灣仔過嚟荃灣搵我，兼且買埋碗愛心糖水比我食，所以點可以唔寫返篇食評嚟歌頌下佢呢？！呢碗熱杏仁溝合桃糊，飲落完全感覺到係真材實料，好滋補，本身唔係十分鍾意杏仁糊個味，但Honey話有益又啱女仔飲喎，都唔知佢係邊度聽返嚟，識埋呢d女人野~好在杏仁糊有合桃糊平衡返個味就好接受到，濃稠程度亦好適中，希望飲完可以盡快100%好返晒啦！

家姐今晚OT到好夜先返黎，我好乖等佢返黎煮麵比佢食，佢都好識做，特登兜路去呢間舊式糖水店買外賣返嚟益我，呢D咪姊妹情囉！我見開始有少少秋意就叫左碗熱蕃薯糖水，湯嘅顏色好清，味道唔會過甜，蕃薯好多，入口清甜香滑，好味過之前阿媽煲果D >.<

今日天氣真係好熱所以經過見到糖水鋪就即刻入去食，都食過好多傳統中式糖水，見到餐牌有咁多涼粉、西米既選擇就諗都唔諗見係鮮果就簡西米露。等左幾分鐘上左睇落平平凡凡，食落成個唔會太甜，又可以充分解暑解渴，入面有芒果、西瓜、哈蜜瓜。。好味啊

荃灣區飯後要食甜品，第一時間會諗起路德圍，但執吓執吓得返松記嗰三間串燒三兄弟，松記永遠多人無食過，另外兩間有點強差人意。離開放棄之際，朋友突然醒起有鴻輝，即時雙眼發光。要等位，而且地方淺窄，坐得非常唔舒服，一食完仲會即時請你走。大部分碗有崩。糖水少甜，真材實料。凍食合桃糊沒有很香，但順喉，幾杰身。

試問有邊個女仔唔想皮膚靚架？！想靚就梗係要由內到外啦，咁先至持久，所以平時食野都好注重，會重點揀d對皮膚好既野黎食~呢度既凍冰花燉蛋已經成為左我既養顏補品，非常味美，又有營養，食落好軟滑，好似食緊布甸咁，凍食更加係透心涼，希望keep住食，遲d皮膚可以好似剝殼雞蛋咁白滑啦！

呢個星期瘋狂OT，可以話係無啖好食，好多時食完LUNCH後就係公司埋頭苦幹，收工後已經無心機食野 >.< 唔得，點可以咁樣對自己架？點無胃口都要搵D野食下，所以就一個人入左黎呢間糖水舖整返碗凍紅豆沙加湯圓，點都要比自己苦中一點甜！紅豆沙材料簡單，有埋蓮子，清熱解毒，煲到起沙好正，味道濃郁，帶有一D香甜味道，舌尖,勁涼快。加左兩粒流芝麻湯丸，個芯熱辣辣又夠流沙，口感軟綿綿，夾埋凍紅豆沙一齊食，一冷一熱，成個人即時醒神晒。

阿媽成日話豆類有益，所以好多時煮餸都鍾意加豆，豆角呀、荷蘭豆呀……不過成日整到無味無道，太啖口真係唔多想食~~其實唔洗阿媽講我都知豆類好有益，所以今晚夜收工，就外賣左碗凍馬來喳咋攞返屋企同阿媽Share~一打開睇到好足料，各式各樣既豆都好多好豐富， 一碗有齊紅豆、眉豆、三角豆、紅腰豆等等，食落甜得黎帶清香椰漿味，唔會甜到膩，凍食仲特別解暑潤喉添，健康又好味~

成日黎呢間，今次為佢寫下野先佢有4個招牌：就係芝麻糊、杏仁糊、合桃糊同大良燉鮮奶！而三種糊都有凍食，熱食。熱食既仲可以兩溝。我自己就最鐘意芝麻糊溝杏仁糊！（黑白）但今次我就食左佢另一個招牌，就係大良燉鮮奶！佢同好多傳統燉鮮奶一樣，好滑好香，而且都可以比你選擇熱同凍熱食再加上少少薑汁，真係一流！好推介。但如果好似而家咁夏天，最開心就係食凍食！佢香滑，而且唔會太甜！價錢仲十分平，只係＄20。唯一唔好既係，佢店面好細，多數你食完，傾多兩句就要走啦但明既，而家呢d時勢，仲有d咁平，又好食既糖水店，真係like一like先！

我係合桃糊既忠實fans。呢兩年，鴻輝記一直排係我心目中既第一第二位，今日出開去梗係去食番碗喇!我照舊係要合桃糊，P大人今次試薑汁湯圓。先講合桃糊，明顯地比之前食既稀左，味道淡左，食唔到合桃味lu，失望。薑汁湯圓，見到碗湯圓有d嚇親，樣唔吸引。點知真係唔掂，薑汁糖水基乎真係一碗糖水黎既，無薑味，湯圓皮厚淥到一pat野咁，但入面既芝麻Ok既。總括，味道唔同左，失望。

放左工同幾個波友喺荃灣打波，打到成身汗之後見近近地有間糖水舖就拿拿臨入去坐歎冷氣，大家都有少少餓，所以叫左有D「湯料」食既凍紅豆沙同凍綠豆沙 17蚊碗。唔知係咪老字號既關係，食落味道真係特別「傳統」，而且豆好多，好滿足，綠豆沙食落好清涼解悶熱，好似有咩火都即刻降晒咁！紅豆甜得黎唔會「確喉」，最緊要夠凍，食完又飽又消暑，幾好。

荃灣有名傳統糖水舖，以往堂食真係足料好味！今晚轉買外賣凍芝麻糊真係超失望！回家打開一睇... 得半碗！超縮水！味道方面... 以往芝麻糊香滑有芝麻香！今晚外賣的滑度差不多， 但沒有芝麻香只有一個甜字！堂食同外賣真的差天同地！外賣絕對不會有下次！

炎炎夏日，如果要揀最消暑既野食，我既首選肯定係涼粉，雪凍左既涼粉真係勁滑溜爽口透心涼，當然仲要怒加花奶，無敵！有時貪得意會係超級市場買罐罐頭涼粉返屋企食，不過前幾日黎呢度食左碗自家製涼粉之後，就發現真係有好明顯分別…呢度既涼粉好滑身、好有味，清熱解毒得黎又比龜苓膏好食N倍，我諗呢個夏天我成日都會黎食，日日35度點頂？！

古舊歷史的中式糖水去到荃灣，突然間想食糖水！但又唔知食邊間好，突然見到間頗久歷史的中式糖水鋪！進入店內，鋪頭裝潢簡單。餐牌售賣的湯水不多選擇，而今次就選擇左「大良燉鮮奶$20」及「腐竹蛋糖水$20+湯圓$7/2粒」。「大良燉鮮奶」味道不錯，很香奶味！但質地比較（杰）及乾身！ 另外，「腐竹蛋糖水+湯圓」有好多材料，仲有原隻雞蛋，好多腐竹，不太甜。最驚喜就係額外加既「湯圓」，估唔到芝麻湯圓入面竟然有薑汁，很好味！總括而言，呢間糖水鋪都價錢十分便宜，頗適合喜愛中式糖水的愛好者。

呢排男友成日捱夜睇波，今晚終於到左總決賽，睇埋之後終於有覺好訓喇~見佢咁辛苦，我就做廿四孝女友喺開波前落樓買定糖水一齊食，我就揀左薑茶湯圓($18)，不嬲都知薑可以暖身同驅風，岩晒我呢排個肚成日有好多風，好鍾意薑味濃，唔會太甜，飲落喉嚨好舒服，糖丸大大粒又煙韌，個芝麻餡好流心，滑滑溜好好味!跟手幫男友叫左個熱合桃糊($20)，聽講合桃補腎健腦，男人捱夜最傷就係腎，唔夠訓個腦又無咁靈活，所以梗係要幫佢補補啦!佢話平時好少食合桃糊，估唔到味道甜得黎好滑，合桃味香濃，佢問我做乜唔幫佢叫凍喎?哈哈，熱感覺健康d嘛~ 