《一笑食堂》鸡汤拉面 🍜📍深水埗顺宁道98号美宁中心A座地下13号舖先讲一件无聊事，话说有次去池袋食五感，我出发时响 Google Map 就 search “池袋 五感”，就不加思索揿左头一个 result，跟住出发。去到之后发觉并唔系我预约𠮶间五感，但店名一模一样，我就唔知边个抄边个，亦唔知当中来龙去脉，我只系飞快地冲去”真正”的五感，好彩两店距离都算近，步行15分钟，跑就5分钟，唔跑真系唔得，因为预约左 😫，结果赶到身水身汗。点解会讲呢件事呢？睇到底自有分晓 😂《一笑食堂》一直都有听其他面友提过，而食评几乎都系正面，店长富哥似乎好健谈会主动同客人倾计，想试好耐，今日终于安排到时间探店。今日我点左鸡汤拉面 🍜，论惊喜度，可能系今年内最高嘅一次。首先因为我中午去，所以有做午巿价，碗面只系 55 蚊。碗面一上，富哥主动提点食到咁上下可以加拉面胡椒转味。我习惯每一碗面一上就先闻一闻先，香味就并不强烈嘅，点知一饮个汤，鸡味浓烈，真心可以用响口腔爆发来形容！鸡味唔单单系浓，仲有鲜鸡先有嘅鲜味，呢吓冇可能用鸡粉可以扮得到。虽然menu冇写明，不过呢款明显系鸡白汤，亦见到富哥有用blender打过。讲真我唔太钟意鸡白汤太过白色(个人喜好)，而呢款汤就系自然偏黄色，十分浓郁而咸甜度刚好，我觉得近乎系完美黄金比例。面条方面，细直面，同一般博多风拉面会用嘅细直面大同小异啦，软硬度适中，好食嘅。猪叉烧又系另一惊喜位，猪五花，肉同脂肪之间有一层筋膜，因为系第一次帮衬唔知系咁啱系咁定长期系咁，我就非常钟意，就类似食牛腩嘅人都多数会钟意食崩沙腩，就系贪佢有块筋膜，口感好好，而且肉味甘香可口，又系近乎完美。溏心蛋就正常发挥啦，调味偏淡口不过胜在夹个汤，有流心不过我就钟意再生少少会啱口味d。赞左咁多系咪冇野唔好呢？有一样嘅，我就觉得放高菜有少许唔夹个汤，因为高菜味道有d霸道，捞埋落个汤度有d盖过左汤嘅鲜味，如果用返木耳可能会好d。因为系午巿，加35蚊可加个小食同饮品，我就加左鸡沙律。我未做足功课，以为沙律系沙律菜，原来个沙律系薯仔捞蛋，不过都系好食嘅。整体，55蚊可以享受呢款面，论性价比呢款面系真超高，下次一定要带埋屋企人朋友去探探佢。话说回来，回应返开头，因为我第一次去，唔知间店真实位置，都要揾一揾。响附近，有一间叫”千笑居食屋”嘅店，似系新开张，傻傻的我仲以为自己记错左店名，响门口望左一阵先知此间不同彼间，好彩冇中鬼左入去。…查看更多
