，好明顯係愛吃之人。多年前佢帶頭，與幾位好友組成每個月都會見面o既「大食會」，顧名思義係想值此機會聚一聚，兼且大吃一頓啦！「大食會」會員人數至今已增加到十二人，啱啱好一圍，所以大多食中菜為主，十月份聚餐亦不例外，有會友負責做搞手，去試食名中菜館「名廚」。大人聚會，絕少有後輩出席，小肥有幸參與此次聚會全因其中一位會友臨時告假，並誠邀小弟代為出席；唔洗比錢，又有好野食，嘻嘻，試問XO仔又點會say no呢 
？！「名廚」喺銅鑼灣近天后o既一端，離開兩個地鐡站都幾遠吓，其實有少少唔就腳，搭巴士或者小巴嗰區好多時又會塞車，夠時間最好搭電車，有私家車人士可享用代客泊車服務。餐廳有兩層，兩層個入口都唔同，地下主要做散枱，一樓有幾間獨立房，則做私人派對為主。大食會飯局設於一樓一間有私人洗手間o既房內，地方乾淨企理、光猛闊落，餐桌及餐具亦潔亮如新，衛生舒適。唔知係咪因為當晚喺一樓食飯o既客人唔多，喺房間出入o既服務生人數高達四位 ，態度殷勤有禮，各人分工合作，斟茶、斟酒、分餸、換碟，樣樣周到，毫不怠慢，就連經理都落手落腳做埋一份，服務真係好到有少少誇張！據大肥所講，為簡化流程及減少意見爭議，每次「大食會」聚餐都由一位會員負責，包訂位同叫餸，下圖為會友為晚宴特訂之餐單： 
江南小碟之黃金粟米：正如「黃金蝦球」係咸蛋黃炸製而成o既蝦球，「黃金粟米」同樣地都係咸蛋黃煮製而成o既炸粟米粒。真係估唔到當高膽固醇o既咸蛋黃遇著健康o既粟米，依個組合可以咁無懈可擊 
！粟米粒炸得好乾身，入口卻又一啲都唔會乾，爽口香脆，加上咸蛋黃份量又唔會過多，食落一啲都唔溜，超正！ 江南小碟之和味粉絲：小肥煮飯唔叻，不過都知炒粉絲好考功夫，因為如果落得太多水或者汁，粉絲會變成一pat pat，粘得滯或者乾得滯又會黐鍋因此而炒燶；師傅喺用油及用水方面真係掌握得好好，所以粉絲好夠乾身彈牙，值得一讚再讚 ！此外，師傅識得用煲上以確保粉絲上枱後夠熱，大肥尤其欣賞！ 江南小碟之青瓜皮蛋：皮蛋配酸薑或者沙糖就食得多，小肥印象中好似未食過青瓜配皮蛋。依味小碟o既青瓜半腍半爽脆，皮蛋碎爛，皮蛋黃失哂蹤，賣相真係好唔吸引 
！食唔到皮蛋黃之餘，皮蛋同個酸酸o既醋汁極為不夾，XO贈佢兩個字：「唔掂」！ 江南小碟之椒絲鳯尾魚：小肥怕骨，而且對魚仔特別反感，所以冇試。江南小碟之杭椒小煙肉：咁多味小碟之中以依碟杭椒小煙肉最為油膩。杭椒有渣，屬中辣；小煙肉就比較嚡同硬，菜式毫無特色，不吃也吧！ 江南小碟之燒雲腿：燒雲腿一上枱，小肥即回想起自己曾經喺「飯堂」食過，當時係家中一位長輩請客，佢介紹貌似餅乾o既燒物為燒雲腿時，以及眾人食後驚嘆o既情景，小弟仍然歷歷在目。記得「飯堂」所造出黎o既燒雲腿非常輕巧、乾身、薄脆；相比起之下，「名廚」o既燒雲腿就較為遜色，因其外層太厚，雲腿偏韌，整體唔得脆口，XO仔真係有少少失望 
！ 南瓜蠔豉煲湯：南瓜甜品就食得多，小肥都係第一次飲中式南瓜湯，感覺較溶同粉，未知是否同南瓜本身個質感有關呢？！講真自己真係唔係好飲得出蠔豉味，不過味道有少少怪怪囉！ 清蒸切件金老虎：老虎斑蒸得時間啱啱好，肉質鮮甜幼嫩，蒸魚豉油味道亦調校得咸甜適中，好好食！ 蒜片特級靚牛柳：靚牛柳跟配菜以八卦形式排列，顏色鮮艷，望落都幾得意，睇得出烹調師花過心思 。特級牛柳粒肉質鬆軟，又真係好靚bor，配上濃味o既蒜片，份外野味；紅蘿蔔仔同薄薄o既青瓜片則好新鮮，且有水份，唔需要多餘o既醬汁已經好夠清甜爽脆；菜肉兩者對比得好有意思！ 上湯菜遠：唔多食菜o既XO仔都忍唔住要讚吓芥蘭o既色澤好鮮綠，雖然唔係好有研究，不過第一眼起碼覺得嗰碟係「上菜」 ！芥蘭唔硬，味道清甜中帶少少苦，小弟勉強都食咗好多條。 鹽焗雞：鹽焗雞連雜上，雞身少肥少油，看似健康，但雞胸卻又乾又嚡，雞皮又唔夠脆，而且鹽味太重，咸到食唔到任何雞味，小肥勁唔like囉，反而雞腎就好爽口！ 胡椒焗海中蝦：海中蝦煲內o既胡椒味有少少攻鼻，小肥因敏感不能吃，但同桌o既長輩們都有讚中蝦爽口野味。 黃橋燒餅：「黃橋燒餅」個名好熟，唔知係咪睇古裝劇時聽過呢？！黃橋燒餅面好多芝麻，燒得唔係好燶，又唔係話好脆，但仍不失香口，豬肉餡鬆軟，而且一啲都唔油膩，非常適合作為單尾點心！ 上素粉果：蒸粉果層皮好夠薄，入面o既上素餡份量足，青瓜、紅蘿蔔、蘑菇等都切成細粒粒，味道清甜香脆，真係食多幾粒都唔怕滯呀 ！當晚甜品有三款：蛋黃千層糕、煎馬蹄糕、及生磨豆腐花；無奈小肥約咗女仔去跳舞，所以未有機會品嚐就要先離場。「名廚」六小碟，五大菜，兩單尾點心，加三味甜品，埋單每位約一千五百大元 ；嘩，小肥要用成個星期糧先叫做勉強比得起自己嗰份，當然係覺得好貴啦 ！講真餐單入面除咗條魚同中蝦屬海鮮價之外，其餘餸菜都唔應該貴得去邊，要成千五蚊一位，好難會覺得抵食囉，XO仔不得不封餐館為「貴廚」呀！…查看更多
