之前係半島酒店大堂茶座試過下午茶，今日第一次黎呢度食晚飯。大概兩個星期之前打電話訂位，只係星期四居然要waiting，而結果係wait唔到。於是再打電話問餐廳服務員先話原來遲15分鐘就有枱，點解唔早少少講？真搞笑既訂枱服務員......訂左晚上7點15分，最後6點45分已經有位，其實都無人。麵包籃有3款麵包，分別係圓硬包，芝麻果仁硬包同rye。麵包微暖，全部偏硬，質素真麻麻。Rye入面就軟d。芝麻果仁硬包既芝麻味就幾香。牛油無特別造型，不過好滑。快樂生辰獎賞餐牌有三道菜，包咖啡或茶。每位$528加一。第一道菜4揀1，湯要加錢。4道菜分別係：章魚沙律配烤時令蔬菜、橄欖、羅勒松子醬或羅馬蕃茄及甜椒湯配意式面包脆條或傳統法式肉批配醃磨菇、青菜沙律或龍蝦湯、香草忌廉 另加 $98章魚沙律配烤時令蔬菜、橄欖、羅勒松子醬章魚4片，加左醒胃沙律汁，好開胃又唔韌。下面墊有意式青瓜，意式黃瓜同茄子各兩片，好食。上面鋪上沙律菜同菊花瓣就有d苦。外圍羅勒松子醬好味。傳統法式肉批配醃磨菇、青菜沙律傳統法式肉批一大塊，都厚身，凍凍地，食落唔膩，不過唔係滑個d，肉味唔濃，作為前菜都唔錯，不過真心無特別。伴有少少沙律菜，醃紅蘿蔔同蓮藕片，個人覺得章魚沙律好食d。主菜6揀1，3道要加錢。6道菜分別係： 香煎盲曹配泰國蘆筍、香草布格麥、初榨橄欖油醬或烤豬柳及豬腩肉配椰菜花三款(燒、蓉、薄片)或燒波特磨菇、小扁豆、芹菜根蓉、松露醬或烤澳洲牛柳 另加 $128或烤白雪魚 另加 $128或加配扒大蝦兩隻 另加 $180香煎盲曹配泰國蘆筍、香草布格麥、初榨橄欖油醬香煎盲曹塊皮好脆，魚肉就較為粗，無法啦，盲曹係咁。下底有好多布格麥，食落煙煙韌韌，我第一次食。外圍伴有番茄粒，車厘茄，好酸。仲有5條泰國蘆筍。 烤豬柳及豬腩肉配椰菜花三款(燒、蓉、薄片)豬腩肉一大片，上面加左3點椰菜花醬同椰菜花片，烤得脆脆地，肥膏好多，真係食到一大條肥膏。豬柳就好瘦，味道質感正常無特別。烤椰菜花就無特別。呢道菜都有心思既。甜品2揀1。當然兩樣都試試啦。黑加侖子千層蛋糕配檸檬楓樹糖醬忌廉及杏仁脆脆黑加侖子千層蛋糕足有7層，朱古力慕絲有3層，海綿蛋糕有兩層，果醬就有一層，卡拉卡拉咁，上面加左一片金箔。食落朱古力味中帶黑加侖子既酸味，比我預期中好食呀，唔會太甜。伴碟有3點檸檬楓樹糖醬忌廉及杏仁脆脆，都唔錯。朱古力慕絲配奧利奧牛油脆脆及香草雪糕呢個甜品賣相好靚。脆脆朱古力半球體入面有朱古力慕絲，上面有少少金箔，慕絲唔算滑，不過好彩有脆脆外皮搭夠。碟中間擠有朱古力醬，上面加左一粒榛子。 另外伴有一球溶得好快既香草雪糕配奧利奧脆脆。呢碟朱古力甜品都唔過甜，唔錯。生日送一個半磅既蛋糕。賣相好出，係鮮紅色。蛋糕係海綿蛋糕中間有紅桑子果醬夾心，上面有薄薄一層紅桑子鏡面，再擠上忌廉，放上新鮮士多啤梨，朱古力條，食落酸酸地，仲有粒粒紅桑子咬下 ，都好味道。我地揀左以下咖啡或半島精選名茶。凍朱古力正常，加左少少朱古力碎。飲落有薄荷葉味。凍檸水大大杯，足有5片檸檬。生日優惠每4個送一個，埋單每人$436仲有蛋糕送，慶祝生日真係抵。環境當然無得彈。無敵既富麗堂皇歐洲裝修係我既至愛！加上有現場音樂演奏，多一重感官享受，雖然略嫌大聲左少少，我地左正live band下底。食物方面就普通左d，不過呢個價錢有呢個地方同環境都抵食既，甜品令我喜出望外。…查看更多
