點解要分開四行寫營業時間呢？ 其實三行好足夠易明，星期一至五 11:00-18:30、星期六日及公眾假期 09:00-18:30、逢星期二休息遇到公眾假期順延一日。幾份餐牌可疑中也不失靈異，這份營業時間收 17:30，另一份收 18:30。依邊寫住 A7 招牌牛三寶伊麵，那邊寫 A7 招牌牛三寶麵。有海參供應？其實都幾九唔搭八，牛柏葉都免強可以既，聯想起車仔麵或越南河，正寫牛柏葉唔係牛柏頁呢，新鮮牛腩與原汁牛腩有咩分別？發現用牛饕魚饕極深奧漢字，識唔識讀架？試叫牛饕河，仲諗住會比牛肚河我添，真係識架喎！饕餮係中國古代貪食怪獸讀音滔鐵。職員們氣氛怪怪的，火藥味十足，還是係他們的獨特溝通方式？水吧出品部喝完肥嬸就喝四眼仔，其實比食客聽到見到都唔好啦。四眼肥嬸都好有霸氣，我勁熱勁口渴未坐低就問有否大檸樂架？竟然粗豪地回應等等啦，等我清埋張檯先！我心諗問句都唔答得咩？您好采我情緒平靜，算數。凍檸樂，支裝格外好飲！先冰後檸檬？檸檬放冰面點吉呢？有部份茶記會替食客吉埋非常細心。操完拳出完汗真係極口渴，飲兩支大可樂先夠喉。牛饕河，等於牛三寶加牛丸牛腩。牛腩片瘦猛猛厚紙皮一樣鞋鞋的，牛丸食不出汕頭的味道，只覺普通火鍋舖質素。河粉淥得濕彈得宜，完整不散碎長啜長有好重要，非常討我歡喜。大量辣椒渣掛在河粉之間，再拖著燙燙豉油滷水湯汁，食得我賞心悅目心花怒放，比牛三寶伊麵更滿意。魚饕麵，湯汁有淡淡魚味也有淡淡炸魚皮咸味。魚片頭軟塾味道溫和，暗啞魚蛋口感索索聲，炸魚皮帶湯半濕仍香口脆卜卜。最好一氣呵成先處理掉整碗魚饕麵，因湯底十分清淡。我只不過食兩注腐乳通菜，回頭再食麵而變得淡茂茂無味道，慘慘豬！就算隊落四五羹辣椒油都未能滿意，罕有地要再加豉油添味。幼麵夠爽彈夠原整，拖著湯掛著辣椒渣啜得痛快，奈何有一丁點非常微弱鹼水味。凍檸水，我係要凍檸茶走甜，點知入錯凍奶茶，我講多次係要凍檸茶走甜，最終變成凍檸水走甜！四眼妹有否用心聆聽？費事換唯有照飲，幸好檸檬夠多夠酸，冰凍解渴。冷面四眼肥妹早排我講 3 次要凍檸茶，錯單凍奶茶，再改都係錯凍檸水！無緊要我好相與照飲。依鑊再黎講 3 次要凍檸茶，點解係都要我飲凍檸水呢？火都黎，退回再沖過，我要凍檸茶走甜呀！凍檸茶走甜，晶凝通透的茶色，茶膽真心清新，茶香搭鮮檸，兩者非常平衡互相呼應，消滯解暑透心涼。黑糖仙草奶茶，見到實體才如夢初醒，原來係奶茶底，仲驚住係涼茶底會太甜，味道正常不太甜。仙草粒即係涼粉？不夠彈不夠爽不夠凍。凍奶茶少甜，粗糙而茶味較突出，合我口味。凍杏仁茶，飲杯冰凍杏仁茶補補身先。剛送到還未夠凍，落力攪拌稍得片刻，有著陣陣杏仁香不太甜。如果同上水采華一樣可以加大就好喇，飲一杯唔夠喉，飲兩杯心裡覺得唔抵飲。炸雞髀，炸得金黃靚靚真心吸引，不知味道如何？迅間送到，感到奇怪那麼快完成？預炸半熟，有單再炸？望望張單想睇睇落單時間，竟然跟我電話依家顯示既一模一樣，即係電腦時間調快左啦。炸得非常出色，歎為觀止！新鮮出爐，皮脆肉嫩，香氣四溢。薄皮索索聲，白肉水潤結實帶彈，肥美香噴噴，最敝調味太咸，毀掉了！滷水雞髀，呎吋縮水不錯夠美觀，既然暖暖端上就大膽一嚐。索一索清新滷水氣味，狠狠大啖咬下皮肉，皮滑肉綿，啖啖肉帶水份，輕醃加上滷水芬芳，處理得宜。招牌牛三寶伊麵，湯底對粉麵非常重要，係靈魂所在！先由湯先試起，非常熟悉既味道，跟我食開車仔麵檔湯底同出一轍，平平無奇單調滷水豉油。牛膀完全係街頭小食店味道，炆到軟腍腍，乾瘦不彈不肥美。牛孖筋兩粒仔，黏黏膠膠少少咸少少羶，金錢肚極爽而豉油味突出。淺嚐原味湯汁後再撈蒜蓉，湯汁即時香濃可口芳郁許多，原來蒜蓉先係主角。伊麵烚得爽彈，不腍不淡還留有蛋香，辣椒油辣味有但欠香口，唔落好過落。太陽蛋沙茶安格斯牛肉出前一丁，無煙看似微溫，放心大啖一啜竟然燙到甩皮！不過越熱越美味。麵質濕滑且嫩滑，吸盡湯汁程亮麗啡色。知道煮即食麵的真諦，當然要跟湯一齊煮，讓湯汁滲入麵條中更加美妙！湯底亦十分濃郁，回味無窮。沙茶安格斯牛肉，薄切鬆軟，清淡醃味不過不失。堅烹調出色，食完依然唔夠喉想添食啊！牛腩蛋芝士三文治，原來係多士來的，我對包皮真的有點抗拒。餡料塞得滿滿，視覺效果一流。牛腩可以再細片一點或再薄一點，大大塊咬得唔方便，難咬斷扯埋出黎。平平無其瘦瘦腩片沒怎樣，竟然被芝士炒蛋番茄喧賓奪主，嫩滑滾滾炒嫩蛋添上半溶芝士，還有甜酸多汁鮮茄拼脆口多士，夾得天衣無縫！極厚多士要擘盡嘴仔一啖咬下，色香味有水準食得過！手打魚肉燒賣王，招牌菜精心炮製，特別手打功夫，唔係粉硬質地唔係陰沉味道，鮮魚味散出陣陣魚甜。先來綿綿黏黏外皮，後來彈彈魚蓉，淨原味已夠滋味，不用傳統加添豉油辣椒油，已經會另人想一食再食！原味清新魚鮮，搭辣椒豉油添點刺激惹味，更生動更立體！辣椒油，配伊麵完全沒半點合拍，居然配河粉使我刮目相看，撈豉油拼燒賣也是不錯選擇。炸手打魚肉燒賣，原味脆脆外皮包著香口極具彈性的魚蓉。點解配甜醬既？試試無妨。炸雞翼，以為炸得金黃香脆我就食唔出？實在太天真喇！薄薄雞皮脆卜卜索索聲一咬爆汁，鳳脂甘甜回味，醃味濃濃有點點隔夜雞氣味。滷水雞中翼，皮光肉滑略咸，食得到八角味。蠔油菜芯，翠綠鮮爽嫩多汁，脆脆菜莖同樣帶甜沒草青，比多間潮州粉麵更高質素，熱熱沾上鮮味蠔油生息不少！腐乳通菜，立立令淋下不少油，趁熱食最緊要，爽爽脆脆微微菜甜輕輕菜青，撈上厚杰濃腐乳醬還可以。冷面四眼肥妹又係您呀？我講一次、老闆覆單一次、您再問多我一次都係要漏腐乳通菜，您怕我會食唔晒嗎？太陽蛋豬扒出前一丁，賣相整齊骨子加上即煮丁麵，充滿誠意非常非常高興！太陽蛋蛋白焦香微脆香口吸引。用筷子插入中出，拖著甘甜蛋液大啖啜，滾燙出煙色香味爆發！彈滑濕潤滲滿甜美湯汁，丁麵真係堅得拍爛手掌！諗起上水高佬明煮半生熟丁麵我食，白雪雪黐牙脆卜卜，食到反眼。煎豬扒輕𢲡輕鬆不過份，質地爽口滑嘟嘟。有香腸味？應該係蒜味來的。紫菜腸仔火腿午餐肉太陽蛋出前一丁，出前一丁烹調技巧出色，思前想後魚饕麵還是出前一丁好呢？最終仍是不敵誘惑。其實紫菜跟麻油豉油湯不太合襯，如果豬骨湯或清雞湯會更適合，送幾片時菜比起紫菜會更高興。腸仔炸得透徹結實多汁略咸，火腿有煎過更香甜誠意可加，午餐肉半脆半鬆化但實在太咸。食完飲左三四杯冰水都仲係好頸渴喎，出前一丁應該唔關事，腸仔火腿太陽蛋都唔關事，最可疑係炸雞翼其次就午餐肉。香煎蘿蔔糕，擺盤有趣，左一篤甜醬，右一篤辣醬，蘿蔔糕放中間。說好都的煎蘿蔔糕呢？變成炸蘿蔔糕，您當炸油糍咩！麵粉炸完變硬殼油淋淋兼黐牙，唯有淨係吸啜裡面蘿蔔糕肉。其實本身蘿蔔糕黏厚有蘿蔔甜臘味香，仲有濃郁胡椒，調味相當不錯，掉去炸完全浪費！雲吞蝦子撈麵，放低已聞到強烈蝦子香，果然足料！不是淨蝦子撈呢！真身為豉油皇蝦子撈，趁著仍有餘溫急急品嚐。先來原味大啖趙，沒有剪我的長壽麵實在太知我心意，興奮地一氣呵成！蝦子甘甘鮮鮮回味無窮，咸咸帶著鮮味餘波，還有芬芳豉油皇，不用添加辣椒油。我表示味道濃郁吸引亦有著極爽彈幼麵，水準達標。清湯堅係罷鬼，清如水，淡如霧，不是大地魚、不是蝦子、不是骨湯。雲吞藏著嚥韌蝦仁，鬆化豬鬆，全瘦無肥肉，落味略濁欠鮮，中規中矩。牛雜撈粗，非常清的清湯。深啡黑色都的滷牛雜，還是老牛雜？濃咸濁野蠻霸道！期待已久的牛腸使我失望而回，腍啤啤腸皮，牛肺質量一般地平淡。粗麵粉口偏硬，不滑不彈不香，蠔油略咸，要用淡淡的清湯洗一洗。紫菜牛丸牛筋丸河，豉油紫菜辣油湯撞得蠻惹味！牛丸牛筋丸不易分辨，較粗糙的是牛筋丸，較圓滑的是牛丸，兩者都十分爽口多汁，牛筋丸味道略勝一籌。牛生瓜原汁牛腩伊麵，平凡豉油湯底撈埋炸蓉香口味濃更甜美。我係要新鮮牛腩喎，非常好奇原汁跟新鮮到底有咩分別。牛生瓜不腥不嗅，質地似豬肚但更有咬口，炆得味道清新不咸不濁，早前黑蚊蚊的咸咸滷水牛雜嚇死朕。肥美腩片，有一刻聯想到日本鬆軟肥叉燒拉麵，用彈牙長長伊麵捲住大啖大啖食極之暢快開心。黑柏葉蝦子撈麵，次次都有海蔘，到想食就無！是但試試點黑柏葉。韌過紙皮，韌過橡筋，其實拖拖滾湯已可食用，師傅非常忍真地烚？豉油皇蝦子撈有點咸啊。…查看更多
