和暢金廚 (南盛街)

噚晚嚟咗呢間小店食晚飯，老闆娘好熱情，佢問我呢排好忙呀，咁耐唔見嘅，其實我係第一次去，跟住又問我以前係咪有去大元村食飯打完場 😅😅睇得出好多都係熟客，隔離檯哥哥見我裝佢條魚，就話今日星班唔係好滑，叫紅柚好啲 🤣🤣🤣 好啦就聽佢講叫咗，的確唔錯，啲配菜好好味，差不多比我清晒 🙈家鄉釀涼瓜可以每件叫，我哋叫咗 4 件，個涼瓜咸咗啲，但釀嘅肉好好味。客家咸雞叫咗個例牌，$35 性價比高，好味，啲薑蓉又比我夾晒 😅豉油王炒麵加大咗 2 人份，覺得都係咸咗啲，可能呢幾年食嘢清咗，出街食咸小小會覺得偏咸。仲有例湯無影相，好好味，仲可以添飲，成件事好得囉。雖然好似叫咗好小嘢，但我真係攬住個肚走，要去散一散步先返屋企 🤭🤭…查看更多

老爸老媽要食早飯，黃昏五點半就要開波，其實係我早餐來的。朋友們讚不絕口地大力推介，當然要親身黎驗證一下，果然好掂喎！舒服溫暖的住家味道，恰似屋企飯一樣，沒有霸道的鑊氣，沒有野蠻的重口味。有趣味的裝修、掛畫及擺設，集百家之大成，雜錦撞到七彩。天花板藍色像海洋，黃色像太陽花，跟牆上的掛畫互相呼應。見眼老闆娘踢晒腳，接待落單出水出菜，還要訓導發呆侍應妺妹，不知好嬲還是好笑，就連廚房師傅都要幫手送餐呢。熟客師拉團一檯接一檯一浪接一浪進場，出出入入出出入入客似雲來有料到﹗住家菜的溫柔敦厚老實味道，金豬蟹盒、鮮氣西星斑、深黃咸雞、蠔氣砵砵、瘋脆萵筍、古惑釀梁家、事頭婆煎海蝦、男不幸白費湯、等等等等等。清血解毒湯，清淡帶甘有肉味而溫和，不會嗆不會苦。補身有益、壯腰補腎、滋陰壯陽，煙酒過多生活無規律，排毒一流。清炒萵筍，真身不是筍，其實係油麥菜的莖。爽脆清甜翠綠，用玻璃芡包著滑嘟嘟，炒得熱熱的。炸客家釀豆腐，即叫即炸滾熱辣﹗炸得金黃通透不油膩，酥脆充滿豆香，外脆內滑香口搭點肉鬆好味道﹗香脆乾爽趙到索索聲，跟甜美豬肉融合得美妙絕倫。不知何解突然想起嗅豆腐，唔該比樽豆瓣醬我啦。咸魚蒸肉餅，極度邪惡呢﹗我有顆正義的心當然要立即消滅殆盡，忍不住要出必殺白飯來應付，人家其實唔想食飯架，太過份喇﹗彈牙幼嫩爆汁的肉餅啊，醃味清新實力萬軍，加上梅香咸魚肉撈啖飯，真係好味的暈得一陣陣。清蒸瓜子斑，火喉剛好微微黐骨，肉嫩到無朋友，斑肉濃濃海魚味道，經濟合理物超所值 $98。沾上魚汁豉油，多多肉搭少少飯，所有精華一次過塞入口，爆棚大滿貫﹗連魚骨魚頭魚鰭都啜得乾乾淨淨。南北杏白肺湯，我還預料屬奶白色的杏汁燉白肺，完全搭錯線﹗比清補涼更清澈的湯水，飲落清淡陣陣豬肺味道，甜而不腥。咬啖豬肺，軟綿彈滑清新脫俗。古法釀涼瓜，腍腍濕濕的涼瓜甘香獨特，捲著實淨鯪魚豬肉餡，清淡的芡汁特顯其樸實的家鄉風味。兒時絕不吃涼瓜，開始喜歡吃涼瓜都係近幾年的事，半生瓜就係半生瓜。老媽係老客家，反而依家有點懷念老媽做的甘甜味濃燙著嘴豉汁炆釀涼瓜呢﹗客家咸雞，三黃雞特別清甜，雞味甘香，皮薄肉滑，浸得陣陣咸鮮四溢而不濁。嫩嫩靚髀滴著肉汁，夾著大量薑蓉更香口醒胃不油膩。金磚蟹餅，炸得透徹均勻零死角，新鮮出爐香噴噴，感覺得到的熱力。狠狠地咬啖，索一聲香脆無比，金黃乾爽兼香口，炸得均勻咬落啖啖肉滿滿結實。蟹肉濕潤，乾濕反差，擦出火花。家鄉蠔砵，新鮮出爐非常燙手，又香又彈又滑，真係非常可疑喎，鴨蛋做的嗎？不只是蠔加蛋的簡單，還有香料作伴，味道更加多姿多彩，油炸鬼鋪面格外香脆。大大舊香料蠔蛋，搭著少少飯塞入嘴仔，那種澎湃的滿足感受，非筆墨所能形容。清蒸西星斑，游水海魚那有得輸，拆肉拌飯淋上魚汁豉油，嫩肉香飯夾甜汁，好味到不能哼出半聲。豉油皇煎蝦，壓軸登場鑊氣十足﹗糖及豉油達到黃金比例，咸甜平衡美味。蝦肉爽甜，混得精采，損得暢快。暖蜂蜜，阿妹侍應強調幾次只有暖飲無熱飲，不用那麼執著吧﹗飲得到天然蜂蜜所調製，溫暖清新的味道。粉葛鯪魚湯，清淡到不能相信，非常薄的湯水，少少葛味，少少魚味，當開胃湯清清味蕾。花雕醉雞例牌，溫度低於室溫，有著清涼的感覺。皮薄肉嫩，不乾不鞋，仍保有少許雞油雞汁。輕輕的花雕味不過份，溫柔舒服的酒香切雞肉。滷水拼盆：豬蹄、鴨胸、雞蛋、豆腐，送飯一流﹗豆腐炸過的外層格外香口索汁外濕內滑充滿豆香；雞蛋入味不過份蛋白彈蛋黃綿甘甜撞滷水回味無窮；豬蹄幾乎全部皮無瘦肉爽脆的豬皮膠彈滷水清香；鴨片嚥韌鬆化黏著肥美鴨皮特別的油脂香。麵醬蒸黑倉魚，只得倉魚、吞拿魚、鯇魚？全部都不合眼緣，唯有格硬揀黑倉啦。沒有豉汁只有麵醬都無緊要。魚肉鬆軟嫩滑，跟白倉的實淨魚質完全不同，更滑溜更多魚汁。拆下大量魚肉淋上魚汁豉油，連大大啖飯掃入。魚肉鮮味無比，飯粒香醇美妙。金牌碗仔翅，翅呢？無翅既？巢極都無金牌既？金牌呢？先來幾口原味，瑤柱雞湯味強烈，史雲生？肉絲彷如大海撈針，欠缺鮮肉的味道，使得整碗陰陰沉沉。寶湖暢和足料香甜滿分，就算加入浙醋及胡椒粉都無補於事。五珍湯，是否淑珍、佩珍、玉珍、愛珍、惠珍嗎？真身係靈芝、姬松茸、舞茸、猴頭菇、蟲草花，食肉獸的我對素湯有點卻步，竟然菇味芬芳，香甜兼備，味道融和溫柔，即刻搶住飲多碗啦！冰鎮鮑魚，兩吋長大小只用麻油輕輕調味，食得到的鮮、趙得到的彈。醃青瓜亦出色，爽爽味道夠濃帶著麻油香，美味啊﹗雲苓白术扁豆衣鱆魚粉葛湯，健康有益兼養生。清清淡淡有點像腐竹的味道，散發微弱的鮮魚味，不太飲到有鱆魚的味道。酥炸生蠔，新鮮出爐剛剛完成熱力迫人﹗已預料非常燙嘴，輕吹兩下慢慢放到牙齒間，仍然高溫。薄身鬆化的炸漿洒上椒鹽，提鮮提味。咬開噴汁，蠔汁鮮味濃，嫩嫩蠔肉，停不了一隻接一隻地消滅。…查看更多

超值套餐$50有餸有飯有湯，仲可以叫特價小食。素湯清甜，好味道。汽水$6罐。A 客家咸雞，脾翼尖位好滑，但胸位稍嚡，咸味夠唔會死咸，好啱送飯（飯好大碗）。C 支竹蝴蝶腩，牛腩炆得夠淋又入味，個汁又係勁啱送飯。另外叫咗3款小食，有2款係特價小食。黃金蟹盒（$20，2件起），其他地方比較少見嘅菜式。咬開有蟹肉，聞落幾香蟹味，食落都有少少蟹味，不錯。客家釀豆腐（$10），味道正常，沒有太大驚喜。蜆蚧鯪魚球（$22），蜆蚧唔過咸而且酒味濃，鯪魚球同樣味道正常（最重要冇碎骨）。3款小食都係即叫即制，上枱時熱辣辣。…查看更多

懷舊菜小店，吳永皓師傅徒弟店。朋友話帶我去好多次，卒之試咗啦。餐牌選擇一般多。老闆娘話返咗鮑魚，就試咗冰鎮鮑魚$68一隻，見到水吧放咗一盤啱啱包好嘅素鵝$38，又試埋。朋友介紹食家鄕蠔鉢$40同客家鹹雞$34。 個人like素鵝同鹹雞，超有雞味。特色懷舊菜特色店，街坊價，不錯。…查看更多