2025繼續有唔少點心放題選擇，今次我哋就幫大家精選幾間唔同風格嘅點心放題餐廳，由經典港式點心到創新fusion款式都有，讓大家一次過滿足晒對點心嘅所有幻想！
人氣90分鐘午市點心放題 御名園 
呢間人氣中菜廳最近推出全新2025版90分鐘午市點心放題，唔只款式多，性價比仲超高，啱晒一大班朋友齊齊開心share。午市放題低至$138起，全場超過40款點心任你揀，包括經典蟹籽燒賣皇、鮮味蝦餃皇、流心叉燒包等～燒賣上鋪滿蟹籽，入口彈牙有層次；蝦餃皮薄餡靚，啖啖都係新鮮蝦；海皇醬蒸鳳爪更加係濃香入味，仲有陳皮脆香燒鵝瀨粉同埋水晶鮮蝦菜苗餃等～
早巿任點任食3小時點心放題 大宅
想搵間有格調又有手工味嘅中菜館嗽返個早巿點心放題，不妨試吓位於銅鑼灣精品設計酒店入面嘅中菜館～由有三十多年經驗嘅行政總廚吳震霈師傅帶領團隊，讓你一次過嘆勻二十多款懷舊中式手工點心，包括傳統臘腸卷，咬落鹹香中帶有臘腸嘅微甜油香，肥瘦比例啱啱好；馬拉糕蒸得夠鬆軟又濕潤，入口仲有陣陣黑糖香氣；上湯灌湯餃手工褶紋整得靚之餘，外皮夠薄夠滑，內餡飽滿，咬開一刻啖啖熱湯湧出。另外仲有招牌水晶蝦餃、蟹籽燒賣、香焗叉燒酥、鮮竹卷、金沙奶黃包、香煎蘿蔔糕等，懷舊感滿滿。
酒店級點心放題 國金軒
圖：人氣高企嘅中菜廳，主打精緻粵菜同高水準點心，佢哋平日午市任食點心套餐水準冇令人失望。好似前菜已經好有誠意，蜜餞黑豚叉燒腍滑多汁，味道香甜；配埋煙燻上素卷，味道層次分明，煙燻味唔會太重，凍食反而更有特色。點心方面真係必試蝦餃！蝦肉爽彈，皮薄得嚟又夠煙韌；蜂巢荔芋角鬆化唔油膩，內餡滑又香；黑松露野菌餃同樣係皮薄餡靚，滿滿黑松露香氣～甜品方面，紅桑子凍糕同楊枝甘露清新解膩，作為結尾就啱晒～
高質素點心 桃里
圖：呢個中午供應嘅點心任食套餐真係驚喜滿滿！一次過可以試勻超過30款即蒸點心同粵式小菜，無論係平日輕鬆飲茶或做商務午餐都好啱。佢哋嘅蝦餃真係大粒得嚟皮薄餡靚，蝦肉實淨彈牙，質素唔輸外面高級中菜廳；灌湯餃更加係必試，入面有啖啖蟹肉，湯鮮餃嫩。另一推介係黑毛豬叉燒，肥瘦適中，喺出面百幾蚊一碟，但呢度可以任食，真係抵食到爆燈。點心款式雖然唔係超多，但全部都好精緻，即叫即蒸，亦唔會一次上太多，啱晒鍾意樣樣試少少嘅朋友。
文：Yanica
編：Cathy
