去銅鑼灣平有平食貴有貴食

一班朋友約食飯，都係不外乎約喺旺角或者尖沙咀，中間點嘛。但如果本身係港島人，或者朋友唔介意過海嘅，銅鑼灣都係另一個飯局熱點。之但係，好多人都對老銅有個誤會，覺得呢區食嘢就一定係貴。嗯，部分正確啦，呢度的確係有好多高級餐廳，但其實平平地50蚊有找嘅餐廳都有唔少。今次就等開飯仔同大家介紹下其中幾間，有平有貴，任君選擇。

50蚊有找平食

$32雙拼車仔麵　　榮記粉麵

Photos by Lawerence Lau & hk.to.food
喺百物騰貴嘅香港，呢間喺銅鑼灣又要出晒名嘅麵舖，都仲係賣緊30零蚊碗雙拼車仔麵，都算係咁。餐牌上有廿幾款餸揀，都係正正常常嘅車仔麵配料：魚蛋豬皮牛腩等等，腩肉炆到腍一腍，識嗌一定嗌蘿蔔，索晒啲湯底同腩汁，好鬼入味，當然唔少得豬紅同豬大腸（如果你食嘅話）。就算叫夠五餸都不過係50蚊，你想嗌多啲都唔得，餐廳有上限，最多五餸一麵或者六款淨餸。

30零蚊魚蛋粉　　江仔記粉麵專家

Photos by Jazel & 為食火麒麟
銅鑼灣嘅平民食肆，三十零蚊就可以醫飽個肚。一碗四寶河都係35蚊，有齊魚片魚蛋魚皮餃再加墨魚丸，抵食。魚片滑、魚蛋彈牙，湯底都算幾清，鍾意嘅可以落返兩滴辣油。

40幾蚊雞扒飯　　榮式燒雞扒

Photos by xxslws & minilatte
喺度叫碟雞扒飯或者雞扒撈丁都不過係40零蚊，塊雞扒一啲都唔細㗎，蓋得過晒啲飯，雞皮都煎得幾香脆，就算你係好健康唔食皮嘅，都可以吮下啲汁。雞肉嫩身，連埋薑蔥撈嚟食好香口，最緊要係真係食得飽肚嘛。

正正常常中間價

川辣燃燒麵　　渝酸辣粉

Photos by Undeadmoon & wongmicmic
喺時代廣場行後多兩條街轉入去，有間食川辣麵嘅餐廳，碗碗麵都紅卜卜，啱曬辣鬼。最辣嗰碗應該係燃燒麵（除非唔係），連蔥、肉碎之類一齊食嘅撈麵，辣就辣在佢隻指天椒，愈食愈辣，仲要係麻辣。不過呢度嘅份量都比較細，叫一碗四、五十蚊嘅麵未必夠飽，叫多一兩碟小食，例如水餃，再試埋青瓜豆漿同麻辣奶凍甜品，大約百零蚊埋單啦。

豚骨湯底拉麵　　魂

Photos by Gourmet-S & Michelefeng
想食拉麵，通常都會諗起登龍街，不過其實行過多兩個街口嘅霎西街，都有間唔錯嘅拉麵，99蚊碗。其中青龍仲係每日限量供應嘅添，補充返，青龍即係秘製菠菜汁配豚骨湯底，仲有蟹膏同金箔，令到成碗麵高級咗。其餘3款拉麵都係以豚骨湯底做base，再配其他醬汁。一碗麵加多杯嘢飲，百零蚊走得。

太陽芝士炸雞　　Sodam chicken

Photos by 星星點點 & miqueen7e
講完中式又講完日式，中間價位嘅餐廳講多間韓式嘅畀你哋揀下。必食嘅太陽芝士炸雞，有個農夫包裝住溝咗幾種芝士嘅芝士醬，皮脆包軟，側邊嘅炸雞亦都夠脆，點醬食仲有拉芝效果，198蚊算貴定平，見仁見智。再叫返個沙律或者小食中和返，成餐應該約莫二百鬆啲啦。

座底三百豪食

串燒　　心燒食堂

Photos by wht_rachel & tofufaa
串燒呢家嘢，一串幾粒幾粒，唔覺唔覺就會食咗好多串，三百蚊埋單一定走唔甩，不過好食嘅話，間中豪一餐又有乜所謂吖。嚟到除咗要食燒牛脷心同白膳之外，海膽胡麻豆腐沙律都係必食之選。另外，gimmick又好，真心想食又好，用帶子同黑松露炮製嘅一帶一路都好吸引。

龍蝦生蠔海鮮餐　　The Sky Bar

Photos by shine618 & Cikolam
一餐又有生蠔又有龍蝦食，仲有鵝肝同牛扒，價錢自然有返咁上下。見到一打生蠔一盤咁上都咪話唔興奮，算係幾新鮮，海水味重，而龍蝦肉爽，扒都夠juicy，最尾再食埋疏乎厘呢餐就真係夠晒疏乎。

文：Kar

隨時接收最新資訊
讚好OpenRice專頁！

去銅鑼灣 平有平食 貴有貴食