ip.michelle's Profile

今晚同老公喺沙田新城市廣場諗住買返啲禦寒衣物, 見到「自己人」原來沙田都開咗分店呀! 呢間新派潮粵菜餐廳, 之前同朋友聚會喺荃灣都食過唔錯, 今晚同老公再試下先; 自己人」係以傳統融合創新元素, 製造出精緻美食; 沙田分店嘅餐廳裝修光猛乾淨, 坐得幾舒服。餐牌分咗大廚推介, 頭盤, 小炒, 點心, 飯麵, 甜品, 仲有茶及咖啡及一啲特別嘅啤酒飲品。餐廳係手機自助下單, 另收茶位及加一服務費的。羊肚菌燉螺頭湯 - $69湯頭清甜, 羊肚菌香氣濃郁, 螺頭爽口有咬感, 一啲都唔膩, 仲帶點濃香螺頭味道, 夠滋潤, 啱哂而家咁乾燥嘅天氣飲呀。滷水大墨魚 - $99大墨魚一片片排列, 下面有幾件滷水豆腐; 用火爐仔熱住上菜, 滷水汁味道醇厚, 慢慢滲入食材中, 鹹味適中帶甘香, 唔錯。冰鎮咕嚕肉 - $129用冰鎮方法上菜, 令口感更清涼爽脆; 咕嚕肉外皮炸得金黃香脆, 肉質軟嫩, 個汁酸酸甜甜, 有山楂味道, 好開胃又唔膩, 仲有加多藍莓, 士多啤梨同山楂果, 可以食到多款水果之餘, 成個擺盤都好靚。黑蒜蝦燒賣 (3件) - $49黑蒜味唔算好出, 但鮮蝦鮮甜好爽口, 面頭加上黑魚籽點綴, 味道層次超豐富, 外皮滑嫩薄韌, 內裡豬肉肥瘦適中帶肉香; 呢啲新元素嘅點心類, 都值得一試！熊仔朱古力包 (3件) - $49造型Q爆, 小朋友一定鍾意! 朱古力香濃, 包皮軟綿, 咬落仲有爆漿感覺, 朱古力流哂出嚟, 而且甜而不膩。鳳梨雀仔(3件) - $39用個鳥籠上枱, 打卡啱哂! 3隻小雀仔係鳳梨酥嚟呀, 內裡嘅餡係綿鳳梨餡, 外面個皮好鬆脆, 鹹中帶甜。老菜脯海鮮炒飯 - $99炒飯粒粒分明, 配料有蝦仁帶子, 十分豐富, 再拌入老菜脯, 咸咸地, 咸香氣濃郁, 口感豐富, 真係忍唔住一口接一口咁食呀, 食過翻尋味。…Read More

今日同老公放工出咗北角碼頭海鮮火鍋食放題過下二人世界; 呢度著重有感情又溫度嘅服務, 老闆話雖然列明限時, 佢哋營業時間到凌晨三點, 但他們一般不會趕客人, 仲可以慢慢吃, 好舒服咁傾下計, 店內空間寬敞舒適, 都幾適合公司聚會, 有啲房間可坐十幾人, 真係人情味厚厚呀! 我哋揀咗任食2小時 298元的套餐性價比高嘅任食活海鮮火鍋; 餐廳最吸引係有即撈海鮮, 樣樣都好新鮮, 好生猛, 我老公最愛大頭蝦, 撈起時仲識游水, 跳跳下呀! 蝦夠大隻, 蝦頭好多膏, 鮑魚仲識游水; 聽講老闆日日親自去北角碼頭揀貨, 一日2次補貨, 所以食材十分新鮮, 今日大缸內有大頭蝦, 扇貝, 鮑魚, 花蟹, 帶子, 蜆等等, 款款生猛, 可以自己撈完交俾師傅即場處理。除咗海鮮, 仲可以用QR code揀肉類及其他配料, 日本和牛, 美國牛板腱, 美國安格斯肩胛肥牛, 全部都夠嫩滑; 蝦滑更加係落足料, 用原隻蝦肉打, 食落特別彈牙。生蠔新鮮肥美, 仲有海螺片, 魚片餃子等, 丸類及蔬菜類都可以在另外的凍柜自取, 款式都很多!飲品區都唔輸蝕呀, 茶類, 果汁, 汽水, 支樽裝啤酒要另收費, 有啲仲可以手機落單, 超方便。熟食區超驚喜, 香蒜燒蠔蒜香爆棚, 酥炸魷魚鬚串, 烤腸, 燒雞翼, 串燒雞, 炸物等等…又惹味, 又熱辣辣, 最估唔到有燒榴槤呀!最後緊係食埋甜品啦, 有雪糕批, 雪糕杯, 紅豆雪條等!呢度仲有啲優惠驚喜呀! 晚上10點後進店就有8.8折, 中小學生和長者能享9折, 五歲以下小童直接免費。生日訂餐都可以8.8折。…Read More

天氣開始涼有啲想食鍋類, 要點熱暖東西; 知道深水埗新開咗間麻辣香鍋, 之前係旺角食過都覺得唔錯, 今日當然想試吓呢間啦; 進入餐廳, 簡單裝潢, 座位不多, 但都已經坐咗一半人, 而且差不多每台食客都例牌要一大碗自選、或是指定嘅香鍋。招牌香鍋 - $28起香鍋可以選麻辣, 香辣, 不辣, 而辣度也可以自選, 配料最少要叫5樣以上; 之前次次都叫麻辣, 今次就叫咗個醬香香鍋, 要微辣。點咗五款餸, 包括新鮮飽魚(4隻) - $68, 炸蝦球(4隻) - $48, 蓮藕 - $28, 豬頸肉 - $48, 墨魚餅 - $36全部炒到勁香, 醬香加微辣都好香, 雖然冇麻辣咁惹味, 但醬香都好香, 因真係炒得夠鑊氣; 呢鍋真係好足料, 一大碗呈上, 熱烘烘的, 色香味俱全。新鮮飽魚鮮甜好厚實, 爽口, 炸蝦球爽彈鮮甜, 蝦都爽口, 特別要讚佢哋嘅豬頸肉, 切得厚薄適中, 爽口得嚟帶焦香! 墨魚餅爽口彈牙, 仲有累墨魚粒夾係中間, 吸晒醬汁精華; 蓮藕又夠爽甜, 食落去清新解膩。黃金白玉菇 - $78我最鍾意食邪惡系列, 白玉菇一上到枱, 熱辣辣; 金黃色嘅白玉菇夠哂鹹蛋黃味, 又炸到香脆, 外面脆脆咁, 內裡有少少嫩同濕潤, 好好味呀!藤香雞 - $66雞肉切得厚薄均勻, 雞皮爽脆, 肉質相當嫩滑, 藤椒嘅麻香滲入每一寸肉, 辣度唔算好勁, 但麻味夠持久, 夠晒過癮, 味道調得很好, 而且份量夠, 冷盤嚟講, 真心好食, 好滋味呀!凍檸茶 - $18金桔檸檬茶 - $28兩杯飲品都清新解渴, 金桔檸檬茶酸酸甜甜, 味道剛好。…Read More

荃灣呢間明記潮州打冷舖開業好多年, 大大話話都差不多十八年, 應該好多荃灣區朋友一定聽過其大名; 佢主打潮州菜, 打冷, 潮式小食, 馳名滷水等等, 食物選擇都好多款, 味道地道正宗, 多年來保持高水準, 食材新鮮, 風味十足; 佢又唔似大排檔打冷舖咁, 佢啲座位算寬敞舒服, 行上樓梯, 邊嘅空間好大, 係夜宵打冷嘅不二之選。每枱都有醃製嘅鹹酸菜和炸魚仔, 搭配香辣醬油同白酸醋。蠔仔肉碎粥 (細) - $88蠔仔味突出, 肉碎細嫩入味, 仲加有方魚形成鮮鹹不同層次, 不同口感; 粥底米香濃郁, 粥底熬得又綿滑, 蠔仔鮮甜, 味道好融和, 食起嚟暖胃又舒服。滷水雜拼 - $168份量超大, 有最少六種滷水, 有豬耳, 紅腸, 五花腩, 鵝腸, 墨魚, 鵝腎; 豬耳外層彈牙, 內裡軟淋, 有滿滿的膠質感; 五花腩肥瘦相間, 肥而不膩, 入口即化; 鵝腸軟嫩滑口又入味, 墨魚彈牙鮮味, 鵝腎細嫩, 爽口, 有嚼勁, 全部都有獨特嘅滷香氣。海味粉絲雜菜煲 - $128材料豐富, 又係好大煲; 有蝦乾, 鹹香濃郁; 湯底香甜, 菇菌與雲耳, 粉絲, 多種蔬菜吸收了所有食材嘅精華, 提供了多重口感, 充滿鮮味。潮式蠔仔餅 - $118去潮州菜館就梗係要食蠔仔餅, 蠔餅大大塊, 蠔仔餅煎炸到外皮金黃酥脆, 外脆內軟, 蠔仔份量夠晒多, 蠔仔大大粒又飽滿爆汁, 蘸少少魚露更提鮮。韮菜豬紅 – (憑消費滿港幣300 元可加$8換領一碗韮菜豬紅/ 滷水拼盤)原本以為加錢換都係細細碗, 上枱時真係比佢嚇親, 超級大碗! 豬紅特別入味, 口感滑嫩如豆腐, 吸收湯汁嘅咸鮮; 豬紅處理得好好, 無腥味, 而且咸咸辣辣, 好味。配上韭菜同吃, 簡直係絕配。…Read More

香港本地人都鍾意食嘅湖南菜 你地唔可以無食過！！ 位於荃灣大河道同沙咀道交界, 開咗間辣湘湘小炒湖南菜; 佢係香港本土湖南菜品牌, 味道最啱港人口味, 可要辣, 唔辣,又或者小辣, 仲係新鮮即叫炒! 猛火爆炒, 夠哂鑊氣, 超級餸飯。餐牌嘅菜式有三十多款, 都係幾十至百幾蚊, 人均消費百幾蚊, 經濟實惠, 好食唔貴。地方夠闊落, 坐得舒服, 卡座沙發位置多, 仲有圓枱適合家庭聚餐。位置交通方便, 招牌醒目容易揾到; 落雨免費送雨遮, 超窩心呀! 果然係最受香港本地人喜歡湘菜排隊王！晚飯時間經常滿座, 逢星期五更誇張, 直到晚上九時仍有人等位呀! 因客人太多, 每檯入座後限食90分鐘。湘式拌魚皮(芥末味) - $79 魚皮好爽彈, 灼水時間剛好, 保持Q彈, 切到一條條, 好似上海幼麵咁; 佢除咗有辣椒嘅辣, 仲有日式芥末味, 好好味嘅前菜, 仲一啲都唔細份呀! 湘味酸菜魚 - $149 魚肉彈牙香滑, 份量都好多, 酸菜味夠香, 仲有粉絲, 辣度適中; 鮮嫩嘅魚肉配上金黃嘅酸菜湯, 酸辣開胃, 湯底香濃, 面仲淋上炸蒜熟油, 令香味提升呀! 食落回味無窮。 膠原脆皮豬手(2隻) - $49 豬手炸到外脆內嫩, 好香脆, 面有好多炒香嘅乾蔥蒜頭料頭, 內裡好多骨膠原, 味道均勻, 香氣十足。辣椒炒肉 - $99 真係有鑊氣, 用爐仔熱住上; 雖然有很多辣椒, 但其實不辣, 好有尖椒青椒嘅香味, 仲有一啲雲耳。用豆豉, 薑和醬油炒起嚟好惹味, 肉片瘦得來這麼嫩滑, 好淋, 攞嚟撈白飯真係好正! 乾鍋肥腸 - $89 都係爐仔熱住上, 可以自己翻炒; 肥腸份量多, 用蒜頭, 辣椒, 蔥, 薑一齊炒, 味道真係好香。炒到外脆內軟, 再加上有少少肥膏, 煙靭軟糯有咬口, 呢個攞嚟撈白飯真係好正。 麻花糍粑 - $39 外香脆內裡非常之軟糯嘅糍粑, 加埋紅糖味香甜, 真係食唔停口呀! 解暑西瓜檸檬茶 - $39 好香濃西瓜味加埋青檸香味, 飲落好夾好舒服。仲可以食埋一大片西瓜當飯後果呀! 鴨屎香檸檬茶(超大杯) - $45 超大杯鴨屎檸檬茶, 真係有一公升咁大杯呀! 甜度適中, 酸酸嘅香水檸檬可以中和辣味, 茶味都夠, 又解渴。這店用自家品牌嘅東北五常大米來煲飯, 一個大飯煲上, 包你食到暖烘烘嘅白飯呀! 呢度可以係香港返工一族的/港漂飯堂, 佢嘅午市套餐人均都係$50左右, 仲免加一; 而家仲有下午茶超 抵食$29起, 有半隻鷄加飲品呀!（僅限荃灣店）…Read More

荃新天地2期真係多咗好多新餐廳, 有時唔知想食咩, 都會嚟搵食, 一定有一間啱你! 呢間海山板神都算新開呀, 主打日韓料理; 餐廳環境開揚闊落, 一室藍灰相襯, 加上少少山海裝飾, 感覺幾寫意呀! 坐低掃QR code落單就可以, 簡單方便; 牌除了主打招牌鐵板飯, 還有壽喜燒鍋, 韓式石鍋, 瀑布芝士咖喱飯及輕食等, 不收加一服務費, 價錢大眾化, 好抵食呀!韓式芝士牛肉漢堡包配薯條 - $63漢堡包對半切開, 浸喺高溫鐵板裡面嘅滿滿芝士醬內; 個包身鬆軟有彈性, 夾有生菜, 鮮蕃茄, 漢堡扒; 漢堡扒口感扎實, 味道適中, 薯條熱辣辣, 又夠香脆; 芝士一路熱住就保持住半溶嘅狀態, 漢堡包蘸住芝士醬食, 真係滿足我呢個芝士控呀! 剩下嘅芝士醬還可以用來蘸薯條呀!美國肉眼牛扒配飯 - $108熱辣辣鐵板美國肉眼牛扒, 混合黑椒香蒜嘅惹味, 高溫鐵板保持熱辣辣, 上菜時鐵板夠熱, 滋滋咋咋, 香氣四溢; 肉眼牛扒都有7-8成熟, 但完全唔會柴, 仲切 好一片片令食客食得放便; 白飯另外上的, 仲可免費選擇加飯。牛舌 - $49額外點了一份, 燒得外層焦脆甘香, 塗上醬汁, 撒上黑椒, 好惹味; 口感煙韌有嚼勁, 都爽口, 肉質緊實, 油脂適中, 真係唔錯呀!鮮果水果茶 – 跟餐特飲 $24跟餐都係加$24, 都幾抵飲; 鮮果水果茶有好多不同類型嘅生果係入面, 茶味香濃, 酸酸甜甜, 清新又好飲, 又可解膩。百香果益力多绿茶 – 跟餐特飲 $24跟餐都係加$24, 百香果味道十足, 益力多味唔算好出, 但酸甜味道, 好清爽, 可化解油膩感。鮮果蜜瓜聖地 - $68杯雪糕好吸精呀, 有兩球雪糕, 分別係芒果味同雲呢拿味, 雪糕好滑好味! 有一大片蜜瓜係面, 底有好多切粒嘅哈蜜瓜同蜜瓜, 仲有忌廉同士多啤梨做點綴。食埋呢個甜品真係大滿足呀!…Read More

葵廣真係好多小食店, 間間都各有特色; 呢間小店係新開餐廳, 主打Fusion小食, 價錢唔算貴, 但份量就滿滿的, 而且食物全部都係即叫即整, 新鮮熱辣, 連炸物都係即叫即製呀!2款餸+麵底 - $69我揀咗扇貝片, 蟹肉, 炸生蠔配稻庭烏冬, 醬汁要正義味道秘製醬; 扇貝片份量都幾多, 都有6-8片, 蟹肉一絲絲, 加埋3隻炸香嘅生蠔, 新鮮熱辣辣, 烏冬用正義味道秘製醬撈好, 秘製醬汁有啲似燒汁, 都幾香甜, 配烏冬好夾, 再加埋啲金蒜粒, 紫菜絮, 好惹味。泰式卜卜蜆 - $55呢碗卜卜蜆有14隻蜆, 啲蜆隻隻都脹卜卜, 個底仲有啲青瓜絲; 泰式汁好好味, 好掛汁, 用嚟撈埋啲青瓜絲當泰式沙律食都唔錯呀!炸薯條配明太子沙律醬汁 - $35呢款炸薯條, 可加鹽酥雞/ 魷魚鬚/ 虎蝦(8隻) 都係$35一份; 但我只想食炸薯條配明太子沙律醬汁, 因佢個明太子沙律醬汁真係好食, 再加咗少少紫菜粉係面, 好惹味呀!…Read More

已經好耐冇行旺角中心! 而家改變咗好多, 除了購物外, 旺中二樓還有立食區, 其中有間和牛波士, 新開張冇耐, 朋友推薦嚟食佢嘅和牛關西燒。呢暑係日式外賣店, 佢以和牛做主打, 店前有塊鐵板, 即叫即燒, 見住佢整到新鮮熱辣, 都真係好吸引! 呢間嘅和牛關西燒係推介必食, 主食仲有炒麵或飯, 小食款式更加多。和牛關東燒 - $48有4種口味比你選擇, 仲可以加五蚊爆芝士; 我揀咗關西大阪風, 底係2片和牛, 加薄身粉糊, 加大量芝士碎, 再加兩隻蛋, 對摺好就上碟, 加埋沙律醬, 木魚碎, 紫菜碎, 真係好惹味, 食到豐富和牛, 和牛嘅肉質極為鮮嫩, 芝士, 雞蛋嘅香味, 口感同味道都好吸引!鐵板鰻魚丼 - $58鰻魚都好肥美, 加咗白芝麻及紫菜絲。厚肉鰻魚經過鐵板煎烤, 外焦內嫩, 淋上特製鰻魚醬汁, 香氣撲鼻, 搭配熱騰騰珍珠米白飯, 口感豐富, 好美味。咖喱吉列芝士豬扒丼 - $78賣相都好吸引, 飯面有紫菜碎同酸甜嘅薑絲; 吉列芝士豬扒都幾厚身, 咬落鬆軟多汁, 芝士做到有拉絲; 咖喱汁夠濃郁, 但唔會辣, 仲帶有日式咖喱嘅甜味, 撈飯食真係好味。…Read More

位於荃灣大河道同沙咀道交界, 開咗間辣湘湘小炒湖南菜; 佢係香港本土湖南菜品牌, 味道最啱港人口味, 可要辣, 唔辣,又或者小辣, 仲係新鮮即叫炒! 猛火爆炒, 夠哂鑊氣。餐牌嘅菜式有三十多款, 都係幾十至百幾蚊, 人均消費百幾蚊, 經濟實惠。地方夠闊落坐得舒服, 卡座沙發位置多, 仲有圓枱適合家庭聚餐。位置交通方便, 招牌醒目容易揾到; 落雨免費送雨遮, 超窩心呀!呢間舖係排隊王嚟呀, 晚飯時間經常滿座, 逢星期五更誇張, 直到晚上九時仍有人等位呀! 因客人太多, 每檯入座後限食90分鐘。湘式拌魚皮(芥末味) - $79魚皮好爽彈, 灼水時間剛好, 保持Q彈, 切到一條條, 好似上海幼麵咁; 佢除咗有辣椒嘅辣, 仲有日式芥末味, 好好味嘅前菜, 仲一啲都唔細份呀!湘味酸菜魚 - $149魚肉彈牙香滑, 份量都好多, 酸菜味夠香, 仲有粉絲, 辣度適中; 鮮嫩嘅魚肉配上金黃嘅酸菜湯, 酸辣開胃, 湯底香濃, 面仲淋上炸蒜熟油, 令香味提升呀! 食落回味無窮。膠原脆皮豬手(2隻) - $49豬手外皮香脆, 但唔會好似燒豬皮咁啦, 但好香脆, 面有好多炒香嘅乾蔥蒜頭料頭, 內裡好多骨膠原, 味道均勻, 香氣十足。辣椒炒肉 - $99真係有鑊氣, 用爐仔熱住上; 雖然有很多辣椒, 但其實不辣, 好有尖椒青椒嘅香味, 仲有一啲雲耳。用豆豉, 薑和醬油炒起嚟好惹味, 肉片瘦得來這麼嫩滑, 好淋, 攞嚟撈白飯真係好正! 乾鍋肥腸 - $89都係爐仔熱住上, 可以自己翻炒; 肥腸份量多, 用蒜頭, 辣椒, 蔥, 薑一齊炒, 味道真係好香。炒到外脆內軟, 再加上有少少肥膏, 煙靭軟糯有咬口, 呢個攞嚟撈白飯真係好正。麻花糍粑 - $39外香脆內裡非常之軟糯嘅糍粑 , 加埋紅糖味香甜, 真係食唔停口呀! 解暑西瓜檸檬茶 - $39好香濃西瓜味加埋青檸香味, 飲落好夾好舒服。仲可以食埋一大片西瓜當飯後果呀!鴨屎香檸檬茶(超大杯) - $45超大杯鴨屎檸檬茶, 真係有一公升咁大杯呀! 甜度適中, 酸酸嘅香水檸檬可以中和辣味, 茶味都夠, 又解渴。這店用自家品牌嘅東北五常大米來煲飯, 一個大飯煲上, 包你食到暖烘烘嘅白飯呀! 呢度可以係香港返工一族的/港漂飯堂, 佢嘅午市套餐人均都係$50左右, 仲免加一; 而家仲有下午茶超抵食$29起, 有半隻鷄加飲品呀!（僅限荃灣店）…Read More

太子有間好有氣氛嘅炭燒工房 - 晉家門炭燒工房; 依間懷舊中國風嘅餐廳, 每次經過都比佢嘅紅磚外牆所吸引, 店內以水泥牆配搭木系餐檯餐椅, 店面不大, 格局雅緻, 窗戶能看到街景, 環境簡潔舒適; 餐廳以西式料理為主, 有意粉, 意大利飯, 牛扒, 沙律, 以及串燒等, 而佢既串燒即叫即燒, 火候拿捏得宜, 佢價錢唔貴, 但好高質。香辣燒魷魚 - $68燒得夠香, 唔算好辣; 魷魚夠彈牙, 鍾意食魷魚一定要試下啦!鹽燒牛舌(一串) - $38一串有三件厚切牛舌, 口感軟腍爽口, 肉味香濃, 厚切得啱啱好, 入口爽脆。沙嗲雞肉串(2串) - $38雞肉嫩滑, 燒得微微焦香, 雞肉肉質滑嫩, 有肉汁, 但一啲都不乾柴; 雞串自家醃製, 微微沙爹醬嘅香味, 帶有少少甜味, 充滿南洋風味呀!一口和牛(一串) - $38和牛粒都嫩滑, 有少少肥, 加上燒得焦香, 所以和牛粒燒出嚟有肉汁, 好香好惹味。煙肉車厘茄 (2串) - $38煙肉車厘茄串燒真係好食, 估唔到係咁夾; 煙肉燒到香噴噴, 車厘茄好多汁, 一咬就爆汁, 乾濕入口啱啱好。炸燒賣 - $28食燒賣必配辣椒油; 燒賣係即叫即炸, 十分香口, 外皮超級酥脆, 內餡鮮嫩, 軟糯, 配上麻辣椒油超開胃。荔枝青檸沙冰 - $45荔枝味好香, 夏天飲好啱, 加埋青檸, 味道好清新, 一啖即刻透心涼, 而且成杯沙冰都好襟飲, 又解渴。青檸薄荷梳打- $28青檸薄荷梳打唔單止顏色好靚, 而且解渴清甜, 值得一試。…Read More

今晚想食星馬菜, 好自然就諗起之前有幫襯過嘅呢間 - 蘇山雞飯星馬餐廳; 佢啲晚餐相當抵食, 上次食完都已經覺得好好食, 所以再回頭嚟食啦! 未到七點餐廳已經差唔多滿座, 真係好受歡迎! 餐廳內有卡位茶餐廳格局, 座位舒適, 而店舖採用QR code落單, 方便快捷。星洲叻沙摻摻 - $73我比較鐘意食粉面, 就點了這個摻摻, 都好大碗好多料, 有蝦, 青口, 豆卜, 魚蛋, 魚片半隻蛋, 通菜, 芽菜等; 摻摻意思就係油面加米粉, 而叻沙湯底很濃, 好香椰汁味, 又有少少辣味, 真係好惹味。泰式魚餅 (四件）– 跟餐加$22泰式魚餅有驚喜, 食到香茅味而且魚餅好彈牙, 加埋個泰式辣椒醬, 風味十足, 甜辣香味, 同魚餅真係好夾。雪糕薄荷朱古力咖啡 - 跟餐特飲加$18一球薄荷雪糕加埋濃郁嘅咖啡, 雪糕半溶落咖啡令咖啡苦中帶點甜, 幾特別; 薄荷雪糕中有朱古力碎, 加上是薄荷味, 感覺涼涼地, 夏天飲非常清新。仁當巨霸牛肋骨配白飯 - $128仁當即係巴東, 係印尼五大國菜之一; 巴東汁濃郁, 味道香濃但略帶甜, 佢個醬由乾蔥, 辣椒, 香茅, 蒜, 南薑, 薑, 黃薑, 羅望子等等而製成, 所以聞到好香, 食落層次豐富; 佢一條超大條嘅牛肋骨連火爐仔上枱, 店員好細心幫你起埋肉, 剪開細細件; 牛肋骨肉燉得軟糯入味, 好滑; 可配烤餅, 白飯或者椰漿飯, 我哋揀咗白飯伴埋巴東汁食, 真係一碗飯都唔夠呀!鮮油咖央多士 – 跟餐加$19撐著一把小傘的鮮油咖央多士賣相漂亮, 鮮油咖央多士極度邪惡, 大大塊厚切椰香牛油係多士中間, 再抹滿咖央醬, 新鮮即製, 暖暖香脆多士加半融化嘅牛油入口, 好滿足。凍檸水 - 跟餐加$12…Read More

行過深水埗大南街附近見到呢間黃色大字新開幕嘅茶餐廳-新島冰室, 見入面環境乾淨衛生, 夠曬闊落; 冰室主打中式飯類, 咖喱, 蔥油, 滑蛋飯, 焗飯, 抵食二人小菜套餐, 河粉, 烏冬, 雜扒餐等等, 總有一款啱食。每位客人入嚟都會送一碗例湯先, 例湯青紅蘿蔔粟米豬骨湯超足料, 超甜。落單可以用QR code自助落單, 超方便呀!椒鹽鮮魷 - $92外脆內軟嘅椒鹽鮮魷, 表面薄薄嘅脆漿, 炸到金黃色, 入面鮮魷係極容易咬開, 份量都係好大份, 椒鹽味唔算重, 但食落鹹香惹味, 一口接一口; 如同朋友飲返杯嘅話, 叫呢個就啱哂啦。西蘭花炒斑球 - $92跟住嘅西蘭花炒斑球, 斑球大大件, 食落去好鮮味, 好有鑊氣嘅小菜, 西蘭花煮得青青綠綠墊底, 斑球外皮煎走過油, 魚肉都幾結實, 啖啖都係新鮮魚肉, 送飯一流。八珍豆腐煲 - $82個煲燒到好紅 上檯時吱吱聲 呢啲就, 係港式風味; 八珍豆腐煲, 有蝦, 叉燒, 豆腐, 魷魚, 豬肉片, 雞肉, 菇, 白菜仔; 蝦同魷魚都勁新鮮, 爽口彈牙, 豆腐輕輕炸過, 叉燒好淋, 豬肉片, 雞肉都好嫩, 一啲都唔柴, 仲有啲薑段同菇片, 唔錯。飲品 / 白飯凍檸水, 小菜要凍飲加$7 / 鴨屎香檸茶, 小菜要凍飲加$9白飯加$10…Read More

呢間係深水埗新開嘅懷舊點心專門店 - 百味小棧, 佢係即場製作, 即叫即蒸點心店; 夜晚有時都會想飲啖茶食個包, 我就真係幾鐘意飲茶食點心; 呢度除咗有點心外, 仲有煲仔飯, 生滾粥等; 店舖設有卡位雅座, 整體光猛明亮, 而且服務周到, 水滾茶靚, 茶芥都係六蚊位, 非常化算實惠。蝦餃皇 4粒- $33 每隻蝦餃非常巨大, 外皮晶瑩剔透, 口感緊實彈牙, 4隻都係$33, 超抵食, 入面兩隻大蝦, 彈牙鮮甜, 咬落都係鮮味多汁, 少量豬肉增添滑潤。蟹籽燒賣皇 4粒- $33蟹籽燒賣皇都係大大粒, 豬肉餡肥瘦適中, 口感紮實, 頂部蟹籽點綴, 增添口感, 冇得輸啦。鮮蝦韭黃腸 - $31腸粉皮係極致幼滑, 韌性十足, 口感順滑, 帶有淡淡米香, 蒸後呈現半透明狀; 新鮮海蝦,彈牙度堪比蝦餃, 嫩韭黃切段鋪底, 蒸製後釋放獨特香味。魚翅灌湯餃 - $40外皮承載熱辣辣嘅湯, 飲一啖湯汁鮮味十足。內裡餡料豐富, 有蝦, 豬肉, 同魚翅頭, 湯與餡同吃, 好鮮味, 滋味十足。虎皮煎釀尖椒 - $23我見有幾枱客人都叫這個尖椒; 一碟有4件, 仲要係大大隻釀到滿滿嘅鯪魚肉, 煎到香脆, 淋上甜醬油, 好食到唔停口呀!豬油煲仔飯 - $88豬油煲仔飯可自選配餸, 三款餸都係$88; 我地揀咗臘腸, 豉汁白鱔同臘鴨脾; 煲仔飯即叫即煲, 熱辣辣上枱,淋上豬油, 再淋上煲仔飯醬油, 蓋蓋焗一陣, 打開香噴噴, 啲米飯軟, 仲有飯焦; 伴埋甜香切片臘腸, 臘鴨脾一齊食, 好味呀! 豉汁風味白鱔, 肉質厚實夠彈牙, 煲仔飯仲有嫩綠腍甜菜心, 滋味一流！超飽肚。鮑魚螺頭燉雞湯 - $48超抵嘅燉湯有三款燉湯, 有人參石斛, 川貝百合, 鮑魚螺頭燉雞; 我鐘意鮑魚螺頭燉雞湯, 燉湯有冬菇, 兩舊螺頭, 兩件鮑魚, 有雞件, 而且湯味濃, 真材實料。呢個價錢真係超抵!鐵觀音飲茶時我都好鐘意叫鐵觀音, 有助消化, 抗氧化。…Read More

油麻地新開嘅咗一間潮州菜館 - 金和潮菜, 主打傳統打冷小菜, 滷水, 冷盤, 熱炒等經典潮菜; 店舖裝潢簡約, 光猛, 環境乾淨, 坐得舒服唔焗促, 氣氛超有大排檔感覺。食物份量慷慨之餘, 價錢親民, 只收茶芥唔收加一, 適合三五知己聚餐。經 OpenRice 訂位另外再有優惠, 就係食滿$300(不含酒水)可以加$8多一碟雜錦拼盤或者韭菜豬紅, 但最緊要係味道幾好。滷水三拼 - $148我哋要咗鵝腎, 墨魚, 大腸; 滷水唔會遮蓋食材原味, 鵝腎入味又爽口, 大墨魚爽口又鮮甜, 好淋唔會韌, 配搭醋汁蘸料, 酸酸地好開胃; 大腸好大件, 又唔會有騷味, 滷水味好入味; 底層仲有滑滑豆腐花生, 呢碟拼盤份量係大大碟, 覺得好抵食。欖菜肉碎四季豆 - $108炒得夠鑊氣, 火候剛好, 欖菜鹹香突出, 鹹度適中, 與肉碎一齊炒都唔覺太肥膩, 四季豆爽脆, 口感清爽; 分量十足, 好似食極都仲有, 用嚟伴飯一流呀!籠仔- 金銀絲蒸開邊蝦飯 - $128即叫即蒸, 係你估唔到咁大籠, 用炒飯做底, 炒飯炒得非常之香, 加埋金蒜和銀蒜蒸開邊蝦夠晒惹味, 仲加入少少瑤柱絲, 鮮味十足; 新鮮嘅蝦肉質鮮嫩, 而且啲飯吸哂蒸蝦嘅鮮汁, 口感味道更加美味。茶介 - $15/位熱茶清香解膩, 食完重口味小菜飲返杯, 舒服晒。…Read More

深水埗都有高質法國菜, 這家以Iron Man作門面標誌嘅C2 Lab, 店內簡約工業風加Lab嘅裝潢, 帶點玩味。坐在窗邊高腳吧枱對住街景, 都可以chill住食, 而且環境舒適又有格調; 店員好仔細介紹時令食材, 價錢係法國菜中都叫親民, 抵食！平日夜晚都人氣爆棚, 超旺場, 一定要預訂先有位呀!意式三文魚帶子配青檸油醋汁 - $108主菜+$88或者主菜同湯 +$108就可以食到意式三文魚帶子配青檸油醋汁, 再加湯! 煙三文魚同帶子都係薄切, 用咗自家調製青檸油醋汁, 酸甜清新可口, 沙律菜沾上醬汁後很開胃！份量剛好, 做前菜啱啱好呀!黑松露忌廉湯 + 手工麵包濃郁黑松露香撲鼻而來, 加埋忌廉, 質地綿滑不膩。附贈嘅麵包外脆內軟, 仲暖暖的, 真係好好食, 同個湯係絕配！燒北海道劍魚腩配柑橘油醋汁 - $268劍魚腩係非一般的魚柳, 佢真係一件好厚嘅大魚腩, 約有一吋多的厚度, 燒到魚香味都出哂嚟; 但肉質因為厚都大件, 燒完都會比較實同有咬口, 面舖滿柑橘油醋汁, 可以去到魚腩的腥味; 下面配香料調味嘅秋葵, 粟米仔, 蓮藕片同紅蘿蔔仔, 全部都鮮甜爽脆, 底層係自家製薯蓉, 仍然吃到粒粒薯仔, 認真之作呀!意式卡邦尼手工扁意粉 - $138正宗又好食, 醬汁很濃稠, 食落都好creamy, 蛋香與芝士比例恰好。煙豬肉條係厚切, 煎得香脆好味; 手工扁意粉彈牙有嚼勁, 硬度適中, 掛哂汁, 面仲加有芝士條, 增加不同口感呀!Caliterra Sauvignon Blanc - $78呢杯智利葡萄酒, 入口有清爽嘅柑橘調香氣帶點青草氣息, 果香和礦物感達成完美平衡, 配搭各類海鮮都唔錯。…Read More