一喜車仔麵

Open Now

Now Closed

車仔麵係唔少香港人熱愛嘅美食之一😍，最近試咗間位於土瓜灣嘅車仔麵，呢度平時成日都人山人海。 車仔麵最重要莫過個湯底，今次加咗$3配一喜秘製嘅黃金雞湯，味道鮮甜，感覺足料。餸方面由每款$10 - $15不等，今次都叫咗好多個餸，非常豐富，包括必點嘅秘製特級瀨尿牛筋丸、魚腐、瑞士汁雞中翼、豬大腸、水魷魚同埋牛腩。另外揀咗$10米線，好煙韌彈牙，有嚼勁😋 秘製特級瀨尿牛筋丸：牛味十分濃郁，具有潮汕風味，食落爽口彈牙，咬嘅時候仲要小心必晒啲汁出嚟，唔怪之得牆上貼咗呢張紙提示啦，原來真有其事。 魚腐好有驚喜，食落好似個福袋咁，入面空心，但魚味濃郁。 瑞士汁雞中翼皮爽肉嫩，香甜惹味。 豬大腸沒有餲味，滷水汁亦非常入味。水魷魚咬落爽脆，送車仔麵一流。 牛腩亦炆得咁稔，滷水都算入味，不過如果剪得大舊啲就更加好。 除咗車仔麵之外，餐廳仲有幾款小食真係必食。 汕尾馬駮豬肉丸：如果去過潮汕相信對馬駮魚唔會陌生，呢個汕尾馬駮豬肉丸即口即炸，咬落燙口，表面酥脆，馬駮魚味濃郁，亦沒有半點腥味，口感煙韌彈牙，滿滿嘅膠質。 生炸貢豬🐷：呢個豬扒即叫即炸，完全無加任何炸粉，但食落非常鬆脆，肉汁豐富，真係令人一試難忘。