小草十八怪

Open Now

Now Closed

今日去旺角開會經過呢間餐廳覺得好特別，首先餐廳樓底相當高，大大塊落地玻璃加霓虹燈裝飾吸引我們入內，餐廳選擇好豐富，有午餐、雞煲、石鍋米線、串燒、十八怪前菜小食，叫咗個午餐加啲小食。咖哩牛腩飯類似印度咖哩味相當濃厚有啲辣度，牛腩入味，好香濃，跟餐加兩件蝦多士蝦肉彈牙，外層麵包質感特別好香脆。蝦膠釀豆卜炸到外層酥脆，裏面蝦膠彈吓彈吓，豆卜有豆味，點泰式甜辣醬好夾。紫菜天婦羅魷魚鬚外層炸粉混入紫菜碎特顯咸香。脆炸無骨豬手無咸豬手，本身已有咸味，炸到啱啱好豬皮脆，肉質保留濕潤，炸物同樣點泰式甜辣醬，酸甜味好醒胃。食咗咁多炸物，加個火腿湯浸娃娃菜，清新解熱氣。再加兩杯飲品紅豆冰及特大桶裝凍檸茶，凍檸茶真係好大桶，鮮檸檬茶超級爽。