牛霸王

Open Now

Now Closed

今次同朋友去咗間隱世日式小店，試咗幾款招牌菜，真係款款有驚喜！最正一定係佢哋嘅手打和牛漢堡扒丼飯，每日限量手打製作，用澳洲和牛整成，漢堡扒上面放左蘭王蛋同泡菜配料， 非常吸睛。漢堡扒超級juicy，秘製醬汁甜甜哋好開胃，撈埋日本珍珠米同橙黃色嘅蘭王蛋一齊食，蛋香同肉香完美融合，真係可以媲美東京人氣店「挽肉與米」！ 😋😋仲試咗佢哋嘅豚肉壽喜燒（1-2人份），一鍋上枱即時打邊爐， 湯底甜度剛好，唔會太鹹。豚肉片肥瘦適中，吸晒壽喜燒汁嘅精華，仲有大量娃娃菜，豆腐，金菇等配料，煮到入味又好食。冬天食真係暖笠笠，好滿足！ 小食方面，雞皮餃子絕對係必點！用雞皮包住豬肉餡再炸，外皮脆到不得了，入面仲keep到肉汁，邪惡得嚟又好味。甘栗紫薯餅就可以當甜品😝，外脆內軟，紫薯蓉香甜綿密，中間仲有粒粒甘栗，口感豐富。 飲品叫咗柚子蜜，清清甜甜，正好可以中和返啲油膩感。 總括來講，呢間店嘅食物質素真係超出預期，由主食到小食都做得好好，而且價錢合理。特別推薦佢哋嘅和牛漢堡丼，絕對係必試之選！